ജഡ്ജിക്കെതിരെ \'ശുംഭന്‍\' പരാമര്‍ശം നടത്തിയതിന്റെ പേരില്‍ സുപ്രീംകോടതി നാലാഴ്ചത്തെ തടവിന് ശിക്ഷിച്ച സി.പി.എം സംസ്ഥാന സമിതി അംഗം എം.വി.ജയരാജനെ ഹൈക്കോടതി തിരുവനന്തപുരം പൂജപ്പുര സെന്‍ട്രല്‍ ജയിലിലേക്ക് അയച്ചു. ഇന്ന് രാവിലെ 11.40നാണ് ജയരാജന്‍ ഹൈക്കോടതി രജിസ്ട്രാറുടെ മുന്നിലെത്തി കീഴടങ്ങിയത്.
നാലാഴ്ചയാണ് തടവ് ശിക്ഷയെങ്കിലും നേരത്തെ ഹൈക്കോടതി ഈ കേസില്‍ ആറു മാസം തടവിന് ശിക്ഷിച്ചതിനെ തുടര്‍ന്ന് ഒന്പത് ദിവസം ജയിലില്‍ കഴിഞ്ഞതുകൊണ്ട് ജയരാജന് ഇനി 21 ദിവസം മാത്രമേ തടവുശിക്ഷ അനുഭവിക്കേണ്ടതുള്ളൂ. കൈയില്‍ രണ്ടു ജോഡി വസ്ത്രങ്ങളും പുസ്തകങ്ങളും ജയരാജന്‍ കരുതിയിരുന്നു. പത്തു മിനിട്ട് കൊണ്ട് നടപടിക്രമങ്ങള്‍ പൂര്‍ത്തിയാക്കി ജയരാജനെ പൊലീസിന് കൈമാറി.

തുടര്‍ന്ന് പൊലീസ് വാനിലായിരുന്നു ജയരാജനെ തിരുവനന്തപുരത്തേക്ക് കൊണ്ടുപോയത്.
ഞായാറാഴ്ച രാത്രി മലബാര്‍ എക്‌സ്പ്രസ് ട്രെയിനില്‍ എറണാകുളത്തേക്ക് യാത്രതിരിച്ച ജയരാജന്‍ ഇന്ന് പുലര്‍ച്ചെ പാര്‍ട്ടിയുടെ എറണാകുളം ജില്ലാ കമ്മിറ്റി ഓഫീസായ ലെനിന്‍ സെന്ററില്‍ എത്തി. തുടര്‍ന്ന് ലോട്ടറി വില്‍പനക്കാരുടെ പ്രതിഷേധ മാര്‍ച്ച് ഉദ്ഘാടനം ചെയ്ത ശേഷമാണ് ജയരാജന്‍ ഹൈക്കോടതിയിലെത്തി കീഴടങ്ങിയത്. മുദ്രാവാക്യം വിളികളോടെയാണ് ജയരാജനെ പ്രവര്‍ത്തകര്‍ ജയിലിലേക്ക് യാത്ര അയച്ചത്.ജയരാജന്റെ അഭാവത്തില്‍ പരിയാരം മെഡിക്കല്‍ കോളേജിന്റെ ഭരണ ചുമതല വൈസ് ചെയര്‍മാന്‍ ശേഖരന്‍ മിനിയോടനായിരിക്കും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha