മന്ത്രിയാകാനുള്ള ഗണേഷിന്റെ ശ്രമങ്ങളെ മുളയിലെ നുള്ളി പി.സി. ജോര്ജ്, മുന്നണിക്ക്‌ അപമാനം, ബുദ്ധിയുള്ള മുഖ്യമന്ത്രി ആ മണ്ടന്‍ തീരുമാനമെടുക്കില്ല, മുഖ്യമന്ത്രിയാകാന്‍ ഉമ്മന്‍ചാണ്ടിയെക്കാള്‍ യോഗ്യന്‍ കെ.എം. മാണി
മന്ത്രിസഭാ പുനസംഘടന സജീവമായതോടെ വീണ്ടും മന്ത്രിയാകാന്‍ ഗണേഷ്‌കുമാര്‍ അണിയറയില്‍ നീക്കം തുടങ്ങിക്കഴിഞ്ഞു. അതിന്റെ ആദ്യപടിയായി യാമിനി ചോദിച്ച തുക നല്‍കി കേസൊതുക്കി. അച്ഛനായ ബാലകൃഷ്‌ണ പിള്ളയുടെ എതിര്‍പ്പ്‌ മാറ്റാനായി അദ്ദേഹത്തെപ്പോയി കണ്ടു. എന്നാല്‍ പലതവണ തന്നെ കളിപ്പിച്ച മകനെ അദ്ദേഹം വിശ്വസിച്ചില്ല. അവസാനം എന്‍എസ്‌എസ്‌ ആസ്ഥാനത്തുപോയി സെക്രട്ടറിയുടെ കാലു പിടിച്ചു. ഇതിനിടയ്‌ക്ക്‌ ബാലകൃഷ്‌ണപിള്ളയെ ക്യാബിനറ്റ്‌ റാങ്കോടെ മുന്നോക്ക കമ്മീഷന്‍ ചെയര്‍മാനാക്കാനുള്ള ശ്രമം ഗണേഷ്‌കുമാറിന്‌ തിരിച്ചടിയായ്‌.
വീണ്ടും മന്ത്രിയാവാനായി ഗണേഷ്‌കുമാര്‍ ചരടുവലിക്കുന്നത്‌ കണ്ട്‌ ചീഫ്‌ വിപ്പ്‌ പി.സി. ജോര്ജ് രംഗത്തെത്തി. ഗണേഷ്‌കുമാറിനെ മന്ത്രിയാക്കാന്‍ കഴിയില്ല. രാജിക്ക്‌ ഇടയായ കാര്യങ്ങള്‍ ഇപ്പോഴും നിലനില്‍ക്കുകയാണ്‌. യാമിനി പറഞ്ഞ കാര്യങ്ങള്‍ ഗണേഷ്‌ സമ്മതിച്ചതാണ്‌. യാമിനിയുടെ സത്യവാങ്‌മൂലം നിലനില്‍ക്കുന്നിടത്തോളം ഗണേഷ്‌ പാപിയാണ്‌. യുഡിഎഫില്‍ ചര്‍ച്ചചെയ്യാതെ ഗണേഷിന്റെ മന്ത്രിസഭാ പ്രവേശനം സാധ്യമല്ലെന്നും അദ്ദേഹം പറഞ്ഞു.
കേരള കോണ്‍ഗ്രസ്‌ ബി ചെയര്‍മാന്‍ ആര്‍ ബാലകൃഷ്‌ണപിള്ളയ്‌ക്ക്‌ ക്യാബിനറ്റ്‌ റാങ്കോടെ ചെയര്‍മാന്‍ സ്ഥാനം നല്‍കിയിട്ടുണ്ട്‌. ഈ സാഹചര്യത്തില്‍ ഒറ്റ എംഎല്‍എ മാത്രമുള്ള പാര്‍ട്ടിക്ക്‌ വീണ്ടുമൊരു മന്ത്രിയെ എങ്ങനെ കൊടുക്കാനാവും. എങ്കില്‍ പലപാര്‍ട്ടികള്‍ക്കും വീണ്ടും മന്ത്രിസ്ഥാനം കൊടുക്കേണ്ടി വരും. ബുദ്ധിയുള്ള മുഖ്യമന്ത്രി ഗണേഷിനെ മന്ത്രിയാക്കാനുള്ള മണ്ടന്‍ തീരുമാനം എടുക്കുമെന്ന്‌ കരുതുന്നില്ലെന്നും ജോര്ജ് പറഞ്ഞു.
ഗണേഷ്‌ മുന്നണിക്ക്‌ അപമാനമാണ്‌. എംഎല്‍എ ആയി തുടരുന്നതു പോലും ശരിയല്ല. ഗണേഷിനെ മന്ത്രിയാക്കാം. പക്ഷേ അത്‌ മുഖ്യമന്ത്രിയുടെ പാര്‍ട്ടി ഒറ്റയ്‌ക്ക്‌ ഭരിക്കുമ്പോഴേ കഴിയൂ. കൂട്ടുകക്ഷി ഭരണത്തില്‍ വിഷയം ഘടകകക്ഷികളുമായും ചര്‍ച്ച ചെയ്യണം. മുഖ്യമന്ത്രിയെക്കാള്‍ യോഗ്യന്‍ കെ.എം. മാണിയാണ്‌. മുഖ്യമന്ത്രിയാകാനും അദ്ദേഹം യോഗ്യനാണ്‌.
https://www.facebook.com/Malayalivartha
