രാത്രി ജയിലില്‍ എത്തിച്ചതു മുതല്‍ കൂടത്തായിയിലെ കൊലപാതക പരമ്പരയില്‍ റിമാന്‍ഡില്‍ കഴിയുന്ന ജോളി ജയിലില്‍ മാനസിക അസ്വസ്ഥത പ്രകടിപ്പിച്ചിരുന്നതായി റിപ്പോര്‍ട്ട്. ഇതേത്തുടര്‍ന്ന് ജോളിക്ക് ജയിലില്‍ പ്രത്യേക നിരീക്ഷണം ഏര്‍പ്പെടുത്തി. മൂന്ന് വനിതാ വാര്‍ഡന്മാരെയാണ് ജോളിയെ നിരീക്ഷിക്കാന്‍ നിയോഗിച്ചിട്ടുള്ളത്. ജോളി നേരത്തെ ആത്മഹത്യയ്ക്ക് ശ്രമിച്ചിരുന്നു എന്നതു കൂടി കണക്കിലെടുത്താണ് പ്രത്യേക നിരീക്ഷണം ഏര്‍പ്പെടുത്തിയത്.

അതേ സമയം പൊന്നാമറ്റം വീട്ടില്‍ നിന്ന് മുഖ്യപ്രതി ജോളിയുടെ ഭര്‍ത്താവ് ഷാജു സാധനങ്ങള്‍ മാറ്റിയതായി റിപ്പോര്‍ട്ടുണ്ട്. ഇന്നലെ വൈകിട്ടാണ് ഓട്ടോറിക്ഷയില്‍ ചാക്കുകെട്ട് കൊണ്ടുപോയത്. ചാക്കില്‍ പുസ്തകങ്ങളാണെന്നാണ് ഷാജു പറഞ്ഞതെന്ന് ഓട്ടോ െ്രെഡവര്‍ വ്യക്തമാക്കി. സാധനങ്ങള്‍ കൊണ്ടുപോകാന്‍ വലിയ വണ്ടി വേണമെന്നും ഏത് വീടാണെന്ന് ചോദിച്ചപ്പോള്‍ പ്രശ്‌നമുള്ള വീടാണന്നും ഷാജു പറഞ്ഞതായി ഓട്ടോ െ്രെഡവര്‍ വെളിപ്പെടുത്തിയതായി ഒരു സ്വകാര്യ വാര്‍ത്താചാനല്‍ റിപ്പോര്‍ട്ട് ചെയ്യുന്നു. ഷാജു പൊന്നാമറ്റം വീട്ടില്‍ നിന്നും സാധനങ്ങള്‍ മാറ്റിയ കാര്യം നാട്ടുകാരും സ്ഥിരീകരിച്ചിട്ടുണ്ട്.