വിവാദ അഭിമുഖം താന്‍ ഔദ്യോഗികമായി നല്‍കിയതല്ലെന്ന്‌ ചെന്നിത്തല
മുഖ്യമന്ത്രിയെ വിമര്‍ശിച്ച്‌ താന്‍ ആര്‍ക്കും ഔദ്യോഗികമായി അഭിമുഖം നല്‍കിയിട്ടില്ലെന്ന്‌ കെ.പി.സി.സി പ്രസിഡന്റ് രമേശ്‌ ചെന്നിത്തല. ന്യൂ ഇന്ത്യന്‍ എക്‌സ്‌പ്രസ്സില്‍ വന്ന അഭിമുഖത്തെക്കുറിച്ച്‌ മാധ്യമ പ്രവര്‍ത്തകരോട്‌ പ്രതികരിക്കുകയായിരുന്നു അദ്ദേഹം. എന്നാല്‍ മാധ്യമ പ്രവര്‍ത്തകരുടെ കൂടുതല്‍ ചോദ്യങ്ങള്‍ക്ക്‌ മറുപടി നല്‍കാന്‍ ചെന്നിത്തല തയ്യാറായില്ല.
കേരളത്തില്‍ പാര്‍ട്ടിയും സര്‍ക്കാരും തമ്മിലുള്ള ബന്ധം പഴയതു പോലെ ആകില്ലെന്നും, മുഖ്യമന്ത്രിക്ക്‌ സ്വന്തം വഴി തെരെഞ്ഞെടുക്കാമെന്നും, താന്‍ തന്റെ വഴി നോക്കുമെന്നും ചെന്നിത്തല തുറന്നടിച്ചു എന്നാണ്‌ അഭിമുഖത്തില്‍ പറയുന്നത്‌. കൂടാതെ ഗണേഷ്‌ കുമാറിന്റെ മന്ത്രി സഭാ പ്രവേശനത്തെ എതിര്‍ക്കുമെന്നും അഭിമുഖത്തില്‍ പറയുന്നു.
തനിക്ക്‌ മന്ത്രിയാകാന്‍ താല്‍പര്യമില്ലെന്ന കാര്യം മുഖ്യമന്ത്രിക്ക്‌ അറിയാമായിരുന്നു. എന്നിട്ടും കേരളയാത്രയുടെ അവസാനം തന്നെ വീണ്ടും വീണ്ടും മന്ത്രിയാകാന്‍ നിര്‍ബന്ധിച്ചു. ഇതൊക്കെ തന്നെ അപമാനിക്കാന്‍ വേണ്ടിയായിരുന്നു എന്നാണ്‌ മനസിലാകുന്നതെന്നും ചെന്നിത്തലയുടേതായി ന്യൂ ഇന്ത്യന്‍ എക്‌സ്‌പ്രസ്സില്‍ വന്ന അഭിമുഖത്തില്‍ പറയുന്നു.
കേരളാ യാത്രയുടെ സമാപനത്തിനു പിന്നാലെ രമേശ്‌ മന്ത്രിസഭയില്‍ എത്തുമെന്നാണ്‌ പ്രതീക്ഷിച്ചിരുന്നത്‌. എന്നാല്‍ രമേശ്‌ ആവശ്യപ്പെട്ട ഉപമുഖ്യമന്ത്രി പദമോ ആഭ്യന്തര മന്ത്രിസ്ഥാനമോ നല്‍കാന്‍ ഉമ്മന്‍ ചാണ്ടിയും എ ഗ്രൂപ്പും തയാറാകാത്തതിനെ തുടര്‍ന്നാണ്‌ പ്രതിസന്ധി ഉടലെടുത്തത്‌. തുടര്‍ന്ന്‌ മന്ത്രിസഭാ പുനഃസംഘടന ഇല്ലെന്ന്‌ ഉമ്മന്‍ ചാണ്ടി പ്രഖ്യാപിക്കുകയും ചെയ്‌തിരുന്നു.എന്നാല്‍ മാധ്യമ പ്രവര്‍ത്തകരുടെ കൂടുതല്‍ ചോദ്യങ്ങളില്‍ രമേശ്‌ പ്രതികരിച്ചില്ല. ഇതെല്ലാം കെട്ടിച്ചമച്ച വാര്‍ത്തകള്‍ ആണോ എന്നതിനും അദ്ദേഹം മറുപടി നല്‍കിയില്ല.
https://www.facebook.com/Malayalivartha
