ഇനി വിട്ടുകളയില്ല... കൂടത്തായി കേസില്‍ ജോളിയെ ചോദ്യം ചെയ്യുനെത്തുന്നത് എസ്പി ദിവ്യ എസ് ഗോപിനാഥും സംഘവും; കേസ് ഐപിഎസ് ട്രെയിനിംഗിലും ഉള്‍പ്പെടുത്തി; കൂടത്തായിയിലേക്ക് വിദഗ്ധസംഘം എത്തും; ശക്തമായ തെളിവ് ശേഖരിക്കാന്‍ അന്വേഷണം കൊഴുപ്പിക്കുന്നു
കൂടത്തായി കൂട്ടകൊലപാതകം സര്‍ക്കാരിനും പോലീസിനും ഉണ്ടാക്കിയ മൈലേജ് ചെറുതല്ല. ഉപതെരഞ്ഞെടുപ്പ് വേളയില്‍ മറ്റ് ധാരാളം വിഷയം ഉണ്ടായിട്ടും ജോളിയുടെ കഥകള്‍ക്കാണ് റേറ്റിംഗുള്ളത്. ഇത് സര്‍ക്കാരിനെ സംബന്ധിച്ച് വലിയൊരനുഗ്രഹമാണ്. അതിനാല്‍ തന്നെ ഒരു പഴുതും ഇല്ലാതെ അന്വേഷണം ശക്തമാക്കാനാണ് സര്‍ക്കാര്‍ തീരുമാനം. ഏറ്റവും സമര്‍ത്ഥരായ ഉദ്യോഗസ്ഥരെ ഇറക്കി ജോളിയെ നിയമത്തിന് മുന്നില്‍ കൊണ്ടു വരിക എന്ന ഭാരിച്ച ജോലിയാണ് പോലീസിനുള്ളത്. അതനുസരിച്ചാണ് ഉന്നത പോലീസ് സംഘം എല്ലാ തന്ത്രങ്ങളും ഒരുക്കുന്നത്.
ഇതിന്റെ ഭാഗമായി കൂടത്തായി ദുരൂഹ മരണങ്ങളുമായി ബന്ധപ്പെട്ട കേസില്‍ അന്വേഷണം നടത്താന്‍ എസ്പി ദിവ്യ എസ് ഗോപിനാഥിന്റെ നേതൃത്വത്തിലുള്ള വിദഗ്ധസംഘം ഇന്നെത്തും. ഫോറന്‍സിക് വിദഗ്ധരും ഡോക്ടര്‍മാരും അടക്കമുള്ള സംഘമാണ് ഇത്. ഇവരുടെ പരിശോധനയ്ക്കും റിപ്പോര്‍ട്ടിനും ശേഷമായിരിക്കും മൃതദേഹാവശിഷ്ടങ്ങള്‍ വിദേശത്തേക്ക് അയക്കുന്ന കാര്യത്തില്‍ തീരുമാനമുണ്ടാവുക. കുറ്റാന്വേഷണ ചരിത്രത്തില്‍ ഏറെ പേരെടുത്ത ആളാണ് ദിവ്യ എസ് ഗോപിനാഥ്. അവരുടെ അന്വേഷണ അനുഭവങ്ങള്‍ ഈ കേസില്‍ വളരെയധികം ഗുണം ചെയ്യും. അഡ്വ. ആളൂര്‍ ഈ കേസ് ആത്മഹത്യയാണെന്ന് പറഞ്ഞു കഴിഞ്ഞു. വര്‍ഷങ്ങള്‍ പഴക്കമുള്ള ഈ കേസ് തെളിവുകളുടെ അഭാവത്തില്‍ എളുപ്പത്തില്‍ ആത്മഹത്യയാക്കാന്‍ ആളൂര്‍ വക്കീലിന് കഴിയുകയും ചെയ്യും. അങ്ങനെ വന്നാല്‍ ജോളി രക്ഷപ്പെടും. ആ നിലയ്ക്ക് ഇത് കൊലപാതകങ്ങളാണെന്ന് തെളിയിക്കേണ്ട ബാധ്യത കൂടി പോലീസിനുണ്ട്. അങ്ങനെ വലിയ ഉത്തരവാദിത്വമാണ് ദിവ്യ എസ് ഗോപിനാഥിന് വന്നിരിക്കുന്നത്. ദിവ്യ അതെല്ലാം തരണം ചെയ്യുക തന്നെ ചെയ്യും. ഇനി എല്ലാ പ്രതീക്ഷകളും ദിവ്യയിലാണ്.
കേസില്‍ മുഖ്യപ്രതിയായ ജോളിയെ ഇന്നും അന്വേഷണ സംഘം ചോദ്യം ചെയ്യും. പൊലീസ് വീണ്ടും പൊന്നാമറ്റം വീട്ടിലെത്തി തെരച്ചില്‍ നടത്തുമെന്നും സൂചനയുണ്ട്. എന്നാല്‍ ഈ തെരച്ചിലില്‍ ജോളിയടക്കമുള്ള പ്രതികളെ ഇവിടെ എത്തിച്ചേക്കില്ലെന്നാണ് അറിയുന്നത്.
ഫോറന്‍സിക് വിദഗ്ധരുടെ സംഘവുമായി ഡിജിപി ചര്‍ച്ച നടത്തിയിരുന്നു. കൂടത്തായി കേസ് തെളിയിക്കുന്നത് പൊലീസിനെ സംബന്ധിച്ച് കടുത്ത വെല്ലുവിളിയാണെന്നാണ് ഡിജിപി ലോക്‌നാഥ് ബെഹ്‌റ ഇന്നലെ പറഞ്ഞത്. ഇതുവരെയുള്ള അന്വേഷണം തൃപ്തികരമാണെന്നും. ആവശ്യമെങ്കില്‍ അന്വേഷണസംഘത്തില്‍ കൂടുതല്‍ വിദഗ്ധരെ ഉള്‍പ്പെടുത്തുമെന്നും അദ്ദേഹം പറഞ്ഞിരുന്നു. റൂറല്‍ എസ്പി ഓഫീസില്‍ അന്വേഷണ സംഘത്തിന്റെ പ്രത്യേക യോഗം വിളിച്ച ഡിജിപി കേസിന്റെ തുടര്‍ നടപടികള്‍ ഇന്നലെ ചര്‍ച്ച ചെയ്തിരുന്നു. കേസിലെ രണ്ടാം പ്രതി മാത്യു, മൂന്നാം പ്രതി പ്രജുകുമാര്‍ എന്നിവരെ ഇന്നലെ ചോദ്യം ചെയ്തിട്ടില്ല.
കൂടത്തായി കേസിനെ ഐപിഎസ് പരിശീലനത്തിന്റെ ഭാഗമായി ഉള്‍പ്പെടുത്തി. വടകര റൂറല്‍ എസ്പി ഓഫീസില്‍ ആരംഭിച്ച കേരളത്തിലെ പത്ത് എഎസ്പിമാര്‍ക്കുള്ള പരിശീലനത്തില്‍ ഈ കേസും പ്രതിപാദിക്കും. ഉത്തരമേഖലാ റേഞ്ച് ഐജി അശോക് യാദവാണ് ക്ലാസെടുക്കുന്നത്. പരിശീലനത്തിന് എത്തിയ എഎസ്പിമാര്‍ക്ക് ജോളിയെ ചോദ്യം ചെയ്യുന്നത് നിരീക്ഷിക്കാനുള്ള സൗകര്യവും ഒരുക്കി.
അതേസമയം കൂടത്തായില്‍ ആറില്‍ അഞ്ച് പേരെയും കൊലപ്പെടുത്തിയത് പൊട്ടാസ്യം സയനൈഡ് ഉപയോഗിച്ചാണെന്നാണ് ജോളി ചോദ്യം ചെയ്യലില്‍ സമ്മതിച്ചു. അഞ്ച് കൊലപാതകങ്ങള്‍ പൊട്ടാസ്യം സയനൈനഡ് ഉപയോഗിച്ചാണ് നടത്തിയതെന്നും ജോളി വ്യക്തമാക്കി. അന്നമ്മയെ കൊല്ലാന്‍ മറ്റൊരു വിഷമെന്ന് ഉപയോഗിച്ചതെന്ന് ജോളി വെളിപ്പെടുത്തിയതായാണ് വിവരം. മറ്റ് രണ്ട് പേരെ കൂടി കൊല്ലാന്‍ ലക്ഷ്യമിട്ടിരുന്നെന്നും ജോളി ചോദ്യം ചെയ്യലിനിടെ വെളിപ്പെടുത്തി. ഈ വെളിപ്പെടുത്തലുകള്‍ക്ക് ശക്തമായ തെളിവ് കണ്ടെത്തേണ്ടതുണ്ട്. അല്ലെങ്കില്‍ ആളൂര്‍ വക്കീല്‍ ജോളിയെ പുഷ്പം പോലെ ഇറക്കും. അതുണ്ടാകാതിരിക്കാനുള്ള കഠിന പ്രയത്‌നത്തിലാണ് പോലീസ്.
https://www.facebook.com/Malayalivartha
