കയ്പമംഗലം വഴിയമ്പലത്തെ പെട്രോള്‍ പമ്പ് ഉടമയെ കൊന്ന് വഴിയരികില്‍ തള്ളിയതിനു ശേഷം പമ്പുടമയുടെ കാറുമായി കടന്ന മൂന്നംഗ സംഘത്തെ മലപ്പുറം ജില്ലയിലെ അങ്ങാടിപ്പുറത്തുനിന്ന് റൂറല്‍ പൊലീസ് പിടികൂടി. കാറും കണ്ടെടുത്തു. വഴിയമ്പലത്തെ ഭാരത് പെട്രോളിയം പെട്രോള്‍ പമ്പിന്റെ ഉടമ കയ്പമംഗലം കാളമുറി അകമ്പാടം കോഴിപ്പറമ്പില്‍ കെ.കെ. മനോഹരനാണ് (68) കൊല്ലപ്പെട്ടത്.

ദിവസവും അര്‍ധരാത്രി മനോഹരന്‍ ലക്ഷങ്ങള്‍ വരുന്ന കലക്ഷന്‍ തുകയുമായി ഒറ്റയ്ക്ക്് വീട്ടിലേക്കു പോകുമെന്ന വിവരമാണ് പ്രതികളെ ആക്രമണത്തിനു പ്രേരിപ്പിച്ചതെന്നാണ് വിവരം. എന്നാല്‍, തിങ്കളാഴ്ചത്തെ കലക്ഷന്‍ തുകയായ 5 ലക്ഷം രൂപ പമ്പിലെ ഓഫിസില്‍ തന്നെ സൂക്ഷിച്ചാണ് മനോഹരന്‍ വീട്ടിലേക്കു മടങ്ങിയത്.

ഇതറിയാതെ മറ്റൊരു വാഹനത്തില്‍ മനോഹരനെ പിന്തുടര്‍ന്ന മൂന്നംഗ സംഘം, അതിവേഗം മറികടന്നെത്തി കാറില്‍ ഇരച്ചുകയറുകയും മനോഹരനെ കീഴ്‌പ്പെടുത്തുകയുമായിരുന്നെന്നാണ് പൊലീസ് കരുതുന്നത്. രക്ഷപ്പെടാനുള്ള ശ്രമത്തിനിടെ മനോഹരന്‍ ഉച്ചത്തില്‍ നിലവിളിച്ചപ്പോള്‍ ആളുകള്‍ ഓടിക്കൂടുമെന്നു കരുതി പ്രതികളിലൊരാള്‍ വായ പൊത്തിപ്പിടിച്ചു. ഇതേ തുടര്‍ന്നാണ് മനോഹരന്‍ ശ്വാസംമുട്ടി മരിച്ച്‌തെന്ന് പൊലീസ് കണക്കുകൂട്ടുന്നു.

ഏകദേശ കലക്ഷന്‍ തുകയെക്കുറിച്ചും മനോഹരന്‍ പമ്പില്‍നിന്നു വീട്ടിലേക്കു പുറപ്പെടുന്ന സമയത്തെക്കുറിച്ചും കുറ്റവാളികള്‍ക്കു കൃത്യമായ ധാരണ ഉണ്ടായിരുന്നെന്നാണ് വിവരം. പമ്പില്‍നിന്നു 2 കിലോമീറ്റര്‍ ദൂരമേയുള്ളൂ വീട്ടിലേക്ക്. പമ്പിന്റെ പരിസരത്തുനിന്ന് മനോഹരന്റെ കാറിനെ 300 മീറ്ററിലേറെ പിന്തുടര്‍ന്ന ശേഷമാണ് കുറ്റവാളികള്‍ മറികടക്കാന്‍ ശ്രമം തുടങ്ങിയത്. പരിഭ്രമത്തിനിടെ കാറിന്റെ പിന്നില്‍ കുറ്റവാളികളുടെ വാഹനം തട്ടിയതായും സംശയമുണ്ട്. മറികടന്നു മുന്നില്‍ നിര്‍ത്തിയശേഷം കാറില്‍ കയറി ബലപ്രയോഗത്തിലൂടെ മനോഹരനെ അക്രമികള്‍ കീഴടക്കി.

വാഹനത്തില്‍ പണം ഇല്ലെന്നു മനസ്സിലായതോടെ 30 കിലോമീറ്ററിലേറെ ദൂരെ മമ്മിയൂരില്‍ മൃതദേഹം റോഡരികില്‍ തള്ളി മലപ്പുറം ഭാഗത്തേക്കു കടക്കുകയായിരുന്നു. അങ്ങാടിപ്പുറം റെയില്‍വേ സ്റ്റേഷന് 200 മീറ്ററകലെയുള്ള പാര്‍ക്കിങ് ഏരിയയില്‍ കാര്‍ ഉപേക്ഷിച്ച ശേഷം സംഘം രക്ഷപ്പെടാന്‍ നോക്കുമ്പോഴാണ് പിടിയിലായതെന്നു വിവരമുണ്ട്. കെഎല്‍ 47 ഡി 8181 നമ്പര്‍ കാറില്‍ നിന്നിറങ്ങി മൂന്നുപേര്‍ നടന്നുപോകുന്നതു കണ്ടതായി പ്രദേശവാസി പൊലീസിന് വിവരം നല്‍കിയിരുന്നു.