ഡല്‍ഹിയിലുണ്ടായ ആം ആദ്മിയുടെ തിരഞ്ഞെടുപ്പ് വിജയത്തെക്കുറിച്ച് ശിവസേന നേതാവ് ഉദ്ദവ് തക്കറെ പറഞ്ഞത് ഏറെ ശ്രദ്ധ നേടിയിരുന്നു. ആം ആദ്മിയുടെ വിജയം തരംഗമല്ല അത് ഒരു സുനാമിയാണെന്നാണ്. എന്തായാലും ഡല്‍ഹിയില്‍ ആഞ്ഞടിച്ച ആംആദ്മിയുടെ സുനാമിയില്‍ തകര്‍ന്നടിഞ്ഞത് ഇന്ത്യയിലെ രണ്ട് പ്രമുഖ പാര്‍ട്ടികളാണെന്നതാണ് ശ്രദ്ധേയം. ബിജെപിയും കോണ്‍ഗ്രസും. 70ല്‍ 67ഉും നേടിയുള്ള ആം ആദ്മിയുടെ വിജയം മറ്റ് സംസ്ഥാനങ്ങളിലും സുനാമിയായി മാറുമോ എന്ന് ഭയത്തിലാണ് രാഷ്ടീയ പാര്‍ട്ടികള്‍. അടുത്ത് തന്നെ നിയമസഭാ തിരഞ്ഞെടുപ്പ് നേരിടേണ്ട കേരളം, തമിഴ്‌നാട്, പഞ്ചാബ് തുടങ്ങി വിവിധ സംസ്ഥാനങ്ങളില്‍ ആം ആദ്മിയുടെ വിജയം സ്വാധീനം സുനാമിയായി പ്രതിഫലിക്കുമെന്നതില്‍ സംശയമില്ല.
പ്രത്യേകിച്ച് കേരളം,പഞ്ചാബ് തുടങ്ങിയ സംസ്ഥാനങ്ങളില്‍ ആപ്പ് ബോംബായി മാറാന്‍ സാധ്യതയുണ്ട്.

കഴിഞ്ഞ വര്‍ഷം ഡല്‍ഹിയില്‍ ആദ്യമായി ആംആദ്മി പാര്‍ട്ടി അധികാരത്തില്‍ വന്നപ്പോള്‍ ഇന്ത്യയിലെ വിവിധ സംസ്ഥാനങ്ങളില്‍ അതിന്റെ തരംഗമുണ്ടായിരുന്നു. കേരളത്തില്‍ നിന്ന് നിരവധി യുവതി യുവക്കളാണ് അപ്പിന്റെ കൊടിപിടിച്ച് ഇറങ്ങിയത്. എഴുത്തുകാര്‍, സെലിബ്രിറ്റികള്‍, ടെക്കികള്‍, സാധാരണ ജനങ്ങള്‍, വീട്ടമ്മമാര്‍ തുടങ്ങി പല മേഖലയിലുള്ളവര്‍ ആം ആദ്മിയില്‍ അംഗത്വമെടുത്തിരുന്നു. ഇപ്പോഴുണ്ടായ വിജയം സംസ്ഥാനത്ത് നിന്ന് ആം ആദ്മിയിലേക്ക് പ്രവര്‍ത്തകരുടെ പ്രളയം ഉണ്ടാകുമെന്നാണ് രാഷ്ടീയ നിരീക്ഷകര്‍ പറയുന്നത്.
ആം ആദ്മി പാര്‍ട്ടിയുടെ തകര്‍പ്പന്‍ വിജയം സംസ്ഥാനത്തെ രാഷ്ട്രീയ കേന്ദ്രങ്ങളിലും അമ്പരപ്പ് സൃഷ്ടിച്ചിട്ടുണ്ട്. കോണ്‍ഗ്രസ് തറപറ്റിയതില്‍ ബി.ജെ.പിയും ബി.ജെ.പി പരാജയപ്പെട്ടതില്‍ കോണ്‍ഗ്രസും പരസ്പരം ആശ്വസിക്കുമ്പോള്‍ രണ്ടു കൂട്ടരും പരാജയപ്പെട്ടതിലാണ് ഇടതു കക്ഷികള്‍ ആഹ്‌ളാദിക്കുന്നത്. അപ്പോഴും തങ്ങളുടെ കാലിനടിയില്‍ നിന്ന് മണ്ണ് ക്രമേണ ഒലിച്ചു പോവുകയാണെന്ന് മൂന്ന് വിഭാഗം നേതാക്കളും സമ്മതിക്കുനുണ്ട്.
കേരളത്തില്‍ കഴിഞ്ഞ ലോക്‌സഭാ തിരഞ്ഞെടുപ്പിലെ ബി.ജെ.പി മുന്നേറ്റം കോണ്‍ഗ്രസിലും ഇടതു പക്ഷത്തും ഒരുപോലെ ആശങ്കയുണര്‍ത്തിയിരുന്നു. യു.ഡി.എഫിന്റെ, പ്രത്യേകിച്ച് കോണ്‍ഗ്രസിന്റെ വോട്ടുകള്‍ ചോരാനുള്ള സാഹചര്യമാണ് നിലവിലുണ്ടായിരുന്നത്. എന്നാല്‍ ആം ആദ്മിയുടെ വിജയം തങ്ങള്‍ക്ക് നേട്ടമാകുമെന്നാണ് ഇരുപാര്‍ട്ടികളും പറയുന്നത്. ബി.ജെ.പിയുടെ തിളക്കത്തിനുണ്ടാക്കിയ മങ്ങല്‍ കോണ്‍ഗ്രസിന്റെ ആ വോട്ട് ചോര്‍ച്ചയെ ഒരു പരിധിവരെ തടയുമെന്നും വിലയിരുത്തുന്നുണ്ട്.
ബി.ജെ.പിക്കാകട്ടെ അവരുടെ ആവേശം കെടുത്തുന്ന വാര്‍ത്തയാണ് ഡല്‍ഹിയില്‍ നിന്നുണ്ടായത്. അമിത് ഷാ പാര്‍ട്ടി പ്രസിഡന്റായതിന് ശേഷം കേരളത്തില്‍ നിയമസഭയില്‍ പാര്‍ട്ടിക്ക് അക്കൗണ്ട് തുറക്കാന്‍ ആസൂത്രിതമായ യത്‌നം നടക്കുകയായിരുന്നു. ബി.ജെ.പിയുടെ മെമ്പര്‍ഷിപ്പ് കാമ്പെയിന്‍ സര്‍വ്വകാല റെക്കോര്‍ഡിട്ടാണ് ഈയിടെ പൂര്‍ത്തിയായത്. മോഡി പ്രഭാവം കേരളത്തില്‍ ബി.ജെപിയുടെ ആവേശം ഉയര്‍ത്തുകയും പുതിയ പ്രതീക്ഷകള്‍ക്ക് ചിറക് നല്‍കുകയും ചെയ്തിരുന്നു. പ്രകടമായ ആ ഉണര്‍വ്വിനാണ് ഇപ്പോള്‍ ഉലച്ചിലുണ്ടായത്.
ഡല്‍ഹിയില്‍ കോണ്‍ഗ്രസും ബി.ജെ.പിയും തകര്‍ന്നടിഞ്ഞതില്‍ കമ്മ്യൂണിസ്റ്റ് കക്ഷികള്‍ സന്തോഷിക്കുന്നുണ്ടെങ്കിലും അവരിലും ആശങ്ക വളരുന്നുണ്ട്. ഇടതു കക്ഷികള്‍ ഏറ്റെടുക്കേണ്ട ദൗത്യമാണ് ഡല്‍ഹിയില്‍ ആം ആദ്മി നടപ്പാക്കിയത്. കേരളത്തില്‍ പാര്‍ട്ടിയുടെ പ്രക്ഷോഭങ്ങള്‍ തുടര്‍ച്ചയായി പരാജയപ്പെന്ന സാഹചര്യത്തില്‍ തങ്ങളുടെ പ്രവര്‍ത്തന ശൈലി അടിയന്തരമായി മാറ്റാനുള്ള ആലോചനയിലാണ് പാര്‍ട്ടി ഇപ്പോള്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha