തോക്ക് ചൂണ്ടി മോശമായി അഭിനയിപ്പിച്ചെന്ന വെളിപ്പെടുത്തലുമായി യുവ നടി മെറീന മൈക്കിള്‍. വട്ടമേശ സമ്മേളനം എന്ന ചിത്രത്തിന്റെ നിര്‍മാതാവിനും അണിയപ്രവര്‍ത്തകര്‍ക്കുമെതിരെയാണ് താരം രംഗത്തെത്തിയിരിക്കുന്നത്. സംവിധായകന്‍ ശ്രീകുമാര്‍ മേനോന്‍ തന്നെ അപായപ്പെടുത്താന്‍ ശ്രമിക്കുന്നെന്ന് നടി മഞ്ജുവാര്യര്‍ ഡി.ജി.പിക്ക് പരാതി നല്‍കിയതിന് പിന്നാലെയാണ് മലയാളസിനിമയെ ഞെട്ടിച്ചുകൊണ്ട് മറ്റൊരു നടി തനിക്ക് സെറ്റില്‍ നിന്ന് നേരിട്ട ദുരനുഭവങ്ങള്‍ വെളിപ്പെടുത്തിയത്. വട്ടമേശ സമ്മേളനം എന്ന പേര് കേട്ടപ്പോഴേ ആരെങ്കിലും ഇങ്ങിനെ സിനിമയ്ക്ക് പേരിടുമോ എന്ന് തോന്നിയിരുന്നു. മുംബയില്‍ നിന്നുള്ള പ്രൊഡ്യൂസറും ബെന്‍ ചെയ്ത ബിപിന്‍ ആറ്റ്‌ലിയെ പോലൊരു സംവിധായകനും ഉള്ളതിനാലാണ് കമ്മിറ്റ് ചെയ്തത്. ഷൂട്ടിംഗിനെത്തി അഭിനയിച്ചു തുടങ്ങിയപ്പോഴാണ് കൈവിട്ട കളിയാണെന്ന് മനസിലായത്. എത്രയും മോശമായിട്ട് അഭിനയിക്കാമോ അങ്ങനെ ചെയ്യാനാണ് സംവിധായകനും നിര്‍മാതാവും ആവശ്യപ്പെട്ടത്. അങ്ങനെയൊരു സിനിമ ചെയ്യേണ്ടിയിരുന്നില്ലെന്ന് ഇപ്പോള്‍ തോന്നുന്നെന്നും മറീന പറഞ്ഞു.

സെറ്റില്‍ ലക്ഷ്വറി സൗകര്യങ്ങളുണ്ടായിരുന്നു. മിക്ക ആര്‍ട്ടിസ്റ്റുകള്‍ക്കും കാരവന്‍ ഉണ്ടായിരുന്നു. അതുകൊണ്ട് സന്തേഷിച്ചിരുന്നു. പക്ഷെ, ക്യാമറയ്ക്ക് മുന്നില്‍ ചെന്നപ്പോഴാണ് കളി മാറിയത്. നന്നായി അഭിനയിക്കരുത് എന്നായിരുന്നു നിബന്ധന. ആര്‍ട്ടിസ്റ്റ് എന്നനിലയില്‍ അത് ദോഷം ചെയ്യുമെന്ന് പറഞ്ഞിട്ടും കേട്ടില്ല. നന്നായി അഭിനയിച്ചാല്‍ അന്നേരം കട്ട് ചെയ്യും. മോശമായി അഭിനയിക്കുന്നതിന് തോക്ക് വരെ ചൂണ്ടി. ശരിക്കും ഭയന്ന് പോയെന്നും നടി പറയുന്നു. നിര്‍മാതാവിനൊപ്പം അഞ്ചാറ് പേര്‍ എന്നും ഉണ്ടായിരുന്നു. അവരുടെ മുന്നില്‍ താന്‍ നിസ്സഹായ ആയെന്നും മെറീറ പറയുന്നു. ഇങ്ങിനെ അഭിനയിച്ചാല്‍ തന്റെ കരിയറിന് തന്നെ പ്രശ്‌നമാകുമെന്ന് പറഞ്ഞിട്ടും നിര്‍മാതാവ് വഴങ്ങിയില്ല. വിപിന്‍ ആറ്റ്‌ലി കഥപറയാന്‍ വന്നപ്പോള്‍ നൊമ്പര നിമിഷങ്ങള്‍ എന്നായിരുന്നു സിനിമയുടെ പേര് പറഞ്ഞിരുന്നു. വട്ടമേശ സമ്മേളനം ഒരുപാട് ചെറു സിനിമകളുടെ ആന്തോളജിയാണ്. നിര്‍മാതാവ് വിപിന്‍ ആറ്റ്‌ലിയുമായി വഴക്കുണ്ടാക്കി ചിത്രത്തിലെ ഭാഗത്തിന്റെ പേര് പ്ര്‍ര്‍ എന്ന് ആക്കി. പ്ര്‍ര്‍ എന്ന പേര് ആരോടെങ്കിലും പറയാന്‍ കൊള്ളുമോ എന്ന് മറീന ചോദിക്കുന്നു. പലരും ഈ പേര് പറഞ്ഞ് കളിയാക്കി വിളിക്കുന്നുണ്ടെന്നും വീട്ടുകാരെയും കൂട്ടുകാരെയും എങ്ങനെ അഭിമുഖീകരിക്കുമെന്നും താരം ചോദിക്കുന്നു.

സാധാരണ ഏത് കുഞ്ഞ് സിനിമയുടെ നിര്‍മാതാവും എങ്ങനെയും പടം സൂപ്പര്‍ഹിറ്റാകണം എന്നാണ് ആഗ്രഹിക്കുന്നത്. അതിനായി അവര്‍ എന്തും ചെയ്യും. നല്ല ബജറ്റില്‍ സിനിമ എടുത്തിട്ട് അത് എട്ട് നിലയില്‍ പൊട്ടണം എന്ന് ആഗ്രഹിക്കുന്ന ഒരു നിര്‍മ്മാതാവിനെ ആദ്യമായാണ് കാണുന്നത്. ഒരു ഘട്ടത്തില്‍ ഈ ചിത്രം ഇറങ്ങില്ലെന്നാണ് പ്രതീക്ഷിച്ചിരുന്നത്. ട്രെയിലര്‍ കണ്ടപ്പോഴാണ് അണിയറപ്രവര്‍ത്തകരുടെ ഉള്ളിലിരുപ്പ് മനസ്സിലായത്. ഏറ്റവും മോശം സിനിമ, കൊള്ളാത്ത അഭിനേതാക്കള്‍ ഏറ്റവും മോശപ്പെട്ട സിനിമയുടെ മോശപ്പെട്ട ട്രെയിലര്‍ എന്നൊക്കെ ക്യാപ്കഷന്‍ നല്‍കി മാര്‍ക്കറ്റ് ചെയ്യുകയാണെന്നും മറീന പറയുന്നു. വട്ടമേശ സമ്മേളനം വെള്ളിയാഴ്ച തിയേറ്ററുകളിലെത്തും. മെറീനയുടെ ആരോപണം ശരിവയ്ക്കുന്നതാണ് ചിത്രത്തിന്റെ ട്രെയിലര്‍. അമര്‍ അക്ബര്‍ ആന്റണി, എബി എന്നീ ചിത്രങ്ങളില്‍ നായികയായ മെറീന ഏറ്റവും പുതിയ ചിത്രമായ വികൃതിയില്‍ ശ്രദ്ധേയമായ വേഷമാണ് ചെയ്തത്.

വട്ടമേശ സമ്മേളനത്തിനെതിരെ സംവിധായകന്‍ ജൂഡ് ആന്റണിയും രംഗത്തെത്തിയിരുന്നു. തന്നെ അഭിനയിക്കാന്‍ വിളിച്ചുവരുത്തിയിട്ട് അപമാനിക്കുകയാണ് അണിയറപ്രവര്‍ത്തകര്‍ ചെയ്തതെന്നും ആ സിനിമയെ കുറിച്ച് മിണ്ടിപ്പോകരുതെന്നും ഒരു സ്വകാര്യ ചാനലിന് നല്‍കിയ അഭിമുഖത്തില്‍ ജൂഡ് ആന്റണി പൊട്ടിത്തെറിച്ചിരുന്നു.