വട്ടിയൂര്‍ക്കാവ് നിയമസഭാ ഉപതെരഞ്ഞെടുപ്പിന്റെ ഫലം നാളെ അറിയാം. 62.66 ശതമാനം സമ്മതിദായകരാണ് ഉപതെരഞ്ഞെടുപ്പില്‍ വോട്ട് ചെയ്യാന്‍ ബൂത്തുകളിലേക്ക് എത്തിയത്. ആകെ 1,23,804 പേര്‍ സമ്മതിദാനാവകാശം വിനിയോഗിച്ചതായാണ് ഔദ്യോഗിക കണക്കുകള്‍. തപാല്‍ വോട്ടുകള്‍ ഉള്‍പ്പെടുത്താതെയാണിത്. മണലയം സെന്റ് ആന്റണീസ് പള്ളി ഹാളിലെ 51ാം നമ്പര്‍ പോളിങ് സ്‌റ്റേഷനിലാണ് മണ്ഡലത്തിലെ ഏറ്റവും ഉയര്‍ന്ന പോളിങ് രേഖപ്പെടുത്തിയത്. 78.11 ആണ് ഇവിടുത്തെ പോളിങ് ശതമാനം. പേരൂര്‍ക്കട പി.എസ്. നടരാജപിള്ള മെമ്മോറിയല്‍ ഹയര്‍ സെക്കന്‍ഡറി സ്‌കൂളിലെ 30ാം നമ്പര്‍ ബൂത്തില്‍ 77.21 ശതമാനവും കൊടുങ്ങാനൂര്‍ ബി.വി.എച്ച്.എസ്.എസിലെ 67ാം നമ്പര്‍ ബൂത്തില്‍ 75.66 ശതമാനവും പോളിങ് രേഖപ്പെടുത്തി.

കവടിയാര്‍ സാല്‍വേഷന്‍ ആര്‍മി ഹയര്‍ സെക്കന്‍ഡറി സ്‌കൂളിലെ 135ാം നമ്പര്‍ ബൂത്തിലാണ് മണ്ഡലത്തിലെ ഏറ്റവും കുറഞ്ഞ പോളിങ്. 45.2 ശതമാനം വോട്ടര്‍മാര്‍ മാത്രമേ ഇവിടെ വോട്ട് ചെയ്തുള്ളൂ. ജവഹര്‍നഗര്‍ എല്‍.പി. സ്‌കൂളിലെ 85ാം നമ്പര്‍ ബൂത്തില്‍ 47.9 ശതമാനവും കുന്നുകുഴി ഗവണ്‍മെന്റ് യു.പി. സ്‌കൂളിലെ 165ാം ബൂത്തില്‍ 49.68 ശതമാനവും സമ്മതിദായര്‍ വോട്ട് ചെയ്തു. ഈ മൂന്നു ബൂത്തുകള്‍ ഒഴികെ മണ്ഡലത്തിലെ മറ്റെല്ലാ ബൂത്തുകളിലും 50 ശതമാനത്തിനു മുകളില്‍ പോളിങ് രേഖപ്പെടുത്തിയിട്ടുണ്ട്. ഏറ്റവും കൂടുതല്‍ പോളിങ് രേഖപ്പെടുത്തിയ 51ാം ബൂത്ത് അടക്കം 26 പോളിങ് സ്‌റ്റേഷനുകളില്‍ 70 ശതമാനത്തിലേറെ പോളിങ് നടന്നു.

1,97,570 വോട്ടര്‍മാരാണ് വട്ടിയൂര്‍ക്കാവില്‍ ആകെയുള്ളത്. പോള്‍ ചെയ്ത 1,23,804 പേരില്‍ 61,209 പേര്‍ പുരുഷന്മാരും 62,594 പേര്‍ സ്ത്രീകളുമാണ്. ഒരാള്‍ ട്രാന്‍സ്‌ജെന്‍ഡറും. മണ്ഡലത്തിലെ പുരുഷ വോട്ടര്‍മാരില്‍ 64.89 ശതമാനം പേര്‍ വോട്ട് രേഖപ്പെടുത്തിയപ്പോള്‍ സ്ത്രീ വോട്ടര്‍മാരില്‍ 60.62 ശതമാനം പേരാണ് വോട്ട് ചെയ്യാന്‍ പോളിങ് ബൂത്തുകളിലേക്ക് എത്തിയത്. വോട്ടെടുപ്പ് പൂര്‍ത്തിയാക്കി ഇലക്ട്രോണിക് വോട്ടിങ് യന്ത്രങ്ങള്‍ വോട്ടെണ്ണല്‍ കേന്ദ്രത്തോടു ചേര്‍ന്നുള്ള അതിസുരക്ഷാ മുറികളില്‍ ഭദ്രം. കേന്ദ്ര സേനയുടെ പ്രത്യേക സുരക്ഷയിലാണു യന്ത്രങ്ങള്‍ സൂക്ഷിച്ചിരിക്കുന്നത്. സുരക്ഷയ്ക്കു സംസ്ഥാന പൊലീസിനെയും വിന്യസിച്ചിട്ടുണ്ട്.

പട്ടം സെന്റ് മേരീസ് ഹയര്‍ സെക്കന്‍ഡറി സ്‌കൂളാണ് വട്ടിയൂര്‍ക്കാവ് നിയമസഭാ മണ്ഡലത്തിന്റെ വോട്ടെണ്ണല്‍ കേന്ദ്രം. വോട്ടെടുപ്പ് നടന്ന 168 ബൂത്തുകളില്‍നിന്നുമുള്ള ഇലക്ട്രോണിക് വോട്ടിങ് യന്ത്രങ്ങളും വിവിപാറ്റും പൊലീസ് അകമ്പടിയോടെ ഇന്നലെ രാത്രിയോടെ ഇവിടേയ്ക്ക് എത്തിച്ചു സ്‌ട്രോങ് റൂമുകളിലേക്കു മാറ്റി. വരണാധികാരിയുടേയും തെരഞ്ഞെടുപ്പ് നിരീക്ഷണത്തിനായി കേന്ദ്ര തെരഞ്ഞെടുപ്പ് കമ്മിഷന്‍ നിയോഗിച്ച ഒബ്‌സര്‍വറുടേയും സാന്നിധ്യത്തില്‍ ഇവ സ്‌ട്രോങ് റൂമില്‍വച്ചു പൂട്ടി സീല്‍ ചെയ്തു.

ബൂത്ത് അടിസ്ഥാനത്തില്‍ പ്രത്യേക നിരയായാണ് സ്‌ട്രോങ് റൂമുകളില്‍ ഇലക്ട്രോണിക് വോട്ടിങ് യന്ത്രങ്ങളും വിവിപാറ്റും സൂക്ഷിച്ചിരിക്കുന്നത്. വോട്ടെടുപ്പ് ദിനമായ നാളെ രാവിലെ എട്ടു മണിയോടെ സ്‌ട്രോങ് റൂമുകള്‍ തുറക്കും. വരണാധികാരിയുടെ സാന്നിധ്യത്തിലാകും സീല്‍ പൊട്ടിച്ച് റൂമുകള്‍ തുറക്കുന്നത്. തുടര്‍ന്ന് കൗണ്ടിങ് കേന്ദ്രത്തില്‍ സജ്ജമാക്കിയിട്ടുള്ള ടേബിളുകളിലേക്ക് ബൂത്ത് അടിസ്ഥാനത്തില്‍ത്തന്നെ യന്ത്രങ്ങള്‍ മാറ്റും.