ഇട്ടിപ്പാറ ബസ് സ്റ്റാന്ഡിനുള്ളില് മാലിന്യം കുന്നുകൂടുന്നു
റാന്നിയ്ക്കടുത്ത് ഇട്ടിയപ്പാറയില് മാലിന്യ സംസ്കരണ പദ്ധതികള് വൈകുന്നതു മൂലം ടൗണിന്റെ ഹൃദയ ഭാഗം തന്നെ മാലിന്യവും മലിനജലവും എല്ലാം കൂടി ശ്വാസം മുട്ടുകയാണ്.
ഇട്ടിയപ്പാറ ബസ് സ്റ്റാന്ഡിന് പുറകുവശമാണ് മാലിന്യ കൂമ്പാരം. നാളുകളായി ചാക്കുകളിലും പ്ലാസ്റ്റിക് കവറുകളിലുമാക്കി വ്യാപാര സ്ഥാപനങ്ങളില് നിന്നും തട്ടുകടകളില് നിന്നുമുള്ള മാലിന്യം ഇവിടേക്ക് കൊണ്ടിടുകയാണ്. രാത്രികാലങ്ങളിലാണ് ഇവ ഏറെയും ഇവിടെ നിക്ഷേപിക്കുന്നത്. കൂമ്പാരത്തിന് ഇടയിലേക്ക് മാലിന്യം ഇടുന്നവര് തന്നെ തീയിടുക കൂടി ചെയ്തു തുടങ്ങിയതോടെ വായു മലിനീകരണവും ഇരട്ടിയായിട്ടുണ്ട്.
മാലിന്യത്തിന് തീയിടുമ്പോള് അത് അവിടെ കിടന്ന് പുകഞ്ഞ് പരിസരമാകെ അസഹ്യമായ ദുര്ഗന്ധമാണ് ഉണ്ടാകുന്നത്. പ്ലാസ്റ്റിക്കുകളും മറ്റും കത്തിയുള്ള ദുര്ഗന്ധം പ്രദേശമാകെ വ്യാപിക്കുന്നു. ശ്വാസകോശ രോഗങ്ങള്ക്കും അലര്ജിക്കും ഇത് ഇടവരുത്തുന്നു. മഴ പെയ്തൊഴിഞ്ഞാലും മാലിന്യപ്പുകയ്ക്ക് ശമനമില്ല. ഇങ്ങനെ മാലിന്യം കത്തിക്കുന്നത് സംബന്ധിച്ച് പരാതി ഉയര്ന്നപ്പോള് കുഴിച്ച് മൂടുന്ന രീതിയും തുടങ്ങിയിട്ടുണ്ട്. അടുത്തിടെ ബസ് സ്റ്റാന്ഡിന് സമീപത്തെ മാലിന്യക്കെട്ടുകള്ക്ക് തീയിട്ടത് ഇപ്പോഴും പലഭാഗത്തായി നീറി പുകയുന്നുണ്ട്. മഴക്കാലത്ത് മാലിന്യങ്ങള് പമ്പാനദിയിലും വലിയതോട്ടിലും ചെന്നെത്തുന്ന സ്ഥിതിവിശേഷമാണുള്ളത്.
10 ലക്ഷം രൂപ ചെലവില് തുമ്പൂര്മൂഴി പദ്ധതി അണിയറയില് ഒരുങ്ങുന്നുണ്ടെങ്കിലും പ്രവര്ത്തനം തുടങ്ങിയിട്ടില്ല. ജൈവ മാലിന്യങ്ങള് സംസ്കരിച്ചു വളമാക്കാനും പഞ്ചായത്ത് പദ്ധതി ആവിഷ്കരിച്ചിട്ടുണ്ട്. പ്ലാസ്റ്റിക് വസ്തുക്കള് സംസ്കരിക്കുന്നതിനും യൂണിറ്റ് പണിതിട്ടുണ്ട്. ബസ് സ്റ്റാന്ഡ് പരിസരത്ത് കെട്ടി കിടക്കുന്ന മാലിന്യങ്ങള് കുഴികളെടുത്തു മൂടിയാലേ ശാശ്വത പരിഹാരമാകൂ.
ജൈവം, അജൈവം എന്നു വേര്തിരിച്ച് ശേഖരിച്ചാല് മാലിന്യ പ്രശ്നം ഒരു പരിധി വരെ കുറയ്ക്കാനാകുമെന്ന് ഈ രംഗത്തെ വിദഗ്ധര് പറയുന്നത്. എന്നാല് ഇങ്ങനെ വേര്തിരിച്ചു സൂക്ഷിക്കുന്ന പ്ലാസ്റ്റിക്കും കടലാസും കൂടുകളും കവറുകളും മറ്റും ശേഖരിച്ച് പുനരുപയോഗ കേന്ദ്രങ്ങളിലേക്ക് അയയ്ക്കാന് പഞ്ചായത്ത് തലത്തിലോ മറ്റ് ഏജന്സി തലങ്ങളിലോ സംവിധാനം നിലവിലില്ല. അശാസ്ത്രീയ രീതിയിലെ മാലിന്യ സംസ്കരണവും മാലിന്യം വലിച്ചെറിയലും തടയാന് ബസപ്പെട്ടവര് തയാറായില്ലെങ്കില് റാന്നി നേരിടേണ്ടി വരുന്നത് വലിയ ആരോഗ്യപ്രശ്നമായിരിക്കും.
https://www.facebook.com/Malayalivartha