കണ്ണൂരില്‍ ശ്രീകണ്ഠപുരം മഞ്ഞപ്പാറയിലെ അനധികൃത ചെങ്കല്‍ ഖനനത്തിനെതിരേ കര്‍മസമിതിയുണ്ടാക്കി ആറു മാസം മുമ്പ് നാട്ടുകാര്‍ കളക്ടര്‍ക്ക് പരാതി നല്‍കിയിരുന്നു. പരിസ്ഥിതി നിയമം ലംഘിച്ച് ജന ജീവിതത്തിന് ഭീഷണി സൃഷ്ടിച്ചാണ് അനധികൃത ചെങ്കല്‍ ഖനനം നടക്കുന്നതെന്ന് കാണിച്ചാണ് 150 ഓളം കുടുംബങ്ങള്‍ ഒപ്പിട്ട പരാതി നല്‍കിയത്. എന്നാല്‍ പരാതി നല്‍കിയിട്ടും നടപടിയില്ലെന്ന് നാട്ടുകാര്‍.

തുടര്‍ന്ന് അന്വേഷണം നടത്തി റിപ്പോര്‍ട്ട് നല്‍കാന്‍ കളക്ടര്‍ ശ്രീകണ്ഠപുരം വില്ലേജ് അധികൃതരോട് ആവശ്യപ്പെട്ടിരുന്നെങ്കിലും നടപടിയൊന്നുമുണ്ടായില്ലെന്ന് പറയുന്നു. പത്തേക്കറോളം വരുന്ന പ്രദേശത്ത് രാപ്പകല്‍ വ്യത്യാസമില്ലാതെയാണ് ഖനനം നടക്കുന്നത്. സമുദ്രനിരപ്പില്‍ നിന്ന് 200 അടിയോളം ഉയരത്തില്‍ ജൈവ വൈവിധ്യങ്ങള്‍ നിറഞ്ഞ പ്രദേശം പൂര്‍ണമായും ഖനന മാഫിയകളുടെ കൈകളിലാണിപ്പോള്‍.

ഇവിടുന്ന് താഴ്‌വാരത്തെ വീടുകളിലേക്ക് കഴിഞ്ഞ പ്രളയത്തില്‍ മണ്ണിടിച്ചിലുണ്ടായിരുന്നതായി പറയുന്നു. ഇതേത്തുടര്‍ന്ന് റവന്യൂ അധികൃതര്‍ സ്ഥലത്ത് പരിശോധന നടത്തിയിരുന്നെങ്കിലും ക്വാറിക്കെതിരേ നടപടി സ്വീകരിക്കാന്‍ തയാറായില്ലെന്ന് നാട്ടുകാര്‍ പറയുന്നു. കനത്ത മഴ പെയ്താല്‍ ചെങ്കല്‍ ക്വാറിയിലെ ചെളിവെള്ളം വീട്ടുകിണറുകളില്‍ ഒഴുകിയെത്തി വെള്ളം മലിനമാകുന്ന അവസ്ഥയുമുണ്ട്. ക്വാറികളുടെ പ്രവര്‍ത്തനം തടഞ്ഞ് മണ്ണിട്ട് മൂടിക്കണമെന്നാവശ്യപ്പെട്ട് വില്ലേജ് ഓഫീസിന് മുന്നില്‍ പ്രക്ഷോഭം നടത്താനൊരുങ്ങുകയാണ് നാട്ടുകാര്‍.