മഞ്ചേശ്വരത്ത് ആദ്യ റൗണ്ട് വോട്ടെണ്ണല്‍ പൂര്‍ത്തിയായി. യുഡിഎഫ് സ്ഥാനാര്‍ത്ഥി എം സി ഖമറുദ്ദീന്‍ ആണ് മുന്നിട്ട് നില്‍ക്കുന്നത്. 830 വോട്ടുകള്‍ക്കാണ് കമറുദ്ദീന്‍ മുന്നിട്ട് നില്‍ക്കുന്നത് .അതേസമയം രണ്ടാം സ്ഥാനത്ത് ബിജെപി സ്ഥാനാര്‍ത്ഥി രവീശ തന്ത്രി കുണ്ടാറാണ്. മൂന്നാം സ്ഥാനത്ത് സിപിഎം സ്ഥാനാര്‍ത്ഥി ശങ്കര്‍ റൈ ആണ്. മഞ്ചേശ്വരത്ത് ചിലയിടത്ത് മുസ്ലീം ലീഗ് പ്രവര്‍ത്തകര്‍ വിജയാഹ്ലാദ പ്രകടനവും തുടങ്ങിയിട്ടുണ്ട്. മഞ്ചേശ്വരം യുഡിഎഫിനും എല്‍ഡിഎഫിനുമൊപ്പം ബിജെപിയെ കൂടി അകമഴിഞ്ഞ് പിന്തുണയ്ക്കുന്ന മണ്ഡലമാണ്.

അടുത്ത കാലത്തായി മണ്ഡലത്തില്‍ പ്രധാന മത്സരം യുഡിഎഫും ബിജെപിയും തമ്മിലാണ്. 2016ലെ നിയമസഭാ തിരഞ്ഞെടുപ്പില്‍ ഇത് ഏറ്റവും കടുപ്പമേറിയ മത്സരമായിരുന്നു. യുഡിഎഫ് സ്ഥാനാര്‍ത്ഥി പിബി അബ്ദുള്‍ റസാഖ് വെറും 89 വോട്ടിന്റെ ഭൂരിപക്ഷത്തിലാണ് ഇവിടെ വിജയിച്ചത്. സുരേന്ദ്രന്‍ പിന്നീട് തിരഞ്ഞെടുപ്പിലെ കൃത്രിമം കാണിച്ച് കോടതിയെ സമീപിക്കുകയും ചെയ്തിരുന്നു. അതേസമയം അബ്ദുള്‍ റസാഖിന്റെ മരണത്തെ തുടര്‍ന്നാണ് ഇവിടെ തിരഞ്ഞെടുപ്പ് നടക്കുന്നത്. മഞ്ചേശ്വരം, വോര്‍ക്കാടി മീഞ്ച, പൈവളികെ, മംഗല്‍പാടി, കുമ്ബള, പുത്തിഗെ, എന്‍മകജെ എന്നീ പഞ്ചായത്തുകള്‍ ഉള്‍പ്പെട്ടതാണ് ഈ മണ്ഡലം. 1967 വരെ സ്വതന്ത്ര സ്ഥാനാര്‍ത്ഥിമാരാണ് മഞ്ചേശ്വരത്തില്‍ നിന്ന് നിയമസഭയിലെത്തിയത്. 1977ല്‍ സിപിഐയുടെ എം രാമപ്പ വിയിച്ചതോടെയാണ് ഇടതിന് മണ്ഡലത്തില്‍ ആധിപത്യം ലഭിച്ചത്.

1980, 1982 വര്‍ഷങ്ങളില്‍ ഈ മണ്ഡലം സിപിഐ നിലനിര്‍ത്തി. ചെര്‍ക്കളം അബ്ദുള്ളയിലൂടെ പിന്നീട് ഇത് മുസ്ലീം ലീഗിന്റെ കോട്ടയായി മാറുകയായിരുന്നു. 1987, 1991, 1996, 2001, വര്‍ഷങ്ങളില്‍ അദ്ദേഹം ഇവിടെ നിന്ന് നിയമസഭയിലെത്തി. സിഎച്ച് കുഞ്ഞമ്ബുവിലൂടെ എല്‍ഡിഎഫ് മണ്ഡലം തിരിച്ചുപിടിച്ചെങ്കിലും പിന്നീട് ഇത് യുഡിഎഫ് തന്നെ സ്വന്തമാക്കി. നിലവില്‍ യുഡിഎഫിനാണ് മണ്ഡലത്തില്‍ ഏറ്റവും ശക്തിയുള്ളത്. സുരേന്ദ്രന്‍ മത്സരിക്കാത്തത് ബിജെപിയെ ബാധിക്കുമോ എന്നും ഉറപ്പില്ല.

ഇത്തവണ ശബരിമല വിഷയമൊക്കെ മഞ്ചേശ്വരത്തെ തിരഞ്ഞെടുപ്പ് പ്രചാരണത്തില്‍ ഉയര്‍ന്ന് വന്നിരുന്നു. അഭിപ്രായ സര്‍വേകളില്‍ യുഡിഎഫ് മണ്ഡലം നിലനിര്‍ത്തുമെന്നാണ് പ്രവചിച്ചത്. യുഡിഎഫ് സ്ഥാനാര്‍ത്ഥി എംസി ഖമറുദീന്‍ 36 ശതമാനം വോട്ട് നേടുമെന്നാണ് പ്രവചനം.

മഹാരാഷ്ട്ര, ബിഹാര്‍ എന്നിവിടങ്ങളിലെ ഓരോ ലോക്സഭാ മണ്ഡലങ്ങളില്‍ നടന്ന ഉപതിരഞ്ഞെടുപ്പിന്റെ വോട്ടെണ്ണലും ഇന്ന് നടക്കുന്നുണ്ട്. 21-നാണ് എല്ലായിടങ്ങളിലും വോട്ടെടുപ്പ് നടന്നത്.