സമദൂരത്തില് നിന്ന് ശരിദൂരത്തിലെത്തിയ എന്.എസ്.എസിന് ആര്.എസ്.എസ് എട്ടിന്റെ പണിയാണ് വട്ടിയൂര്ക്കാവില് നല്കിയത്, എല്.ഡി.എഫ് സ്ഥാനാര്ത്ഥി വി.കെ പ്രശാന്തിന്റെ വിജയം അതാണ് വ്യക്തമാക്കുന്നത്
സമദൂരത്തില് നിന്ന് ശരിദൂരത്തിലെത്തിയ എന്.എസ്.എസിന് ആര്.എസ്.എസ് എട്ടിന്റെ പണിയാണ് വട്ടിയൂര്ക്കാവില് നല്കിയത്. എല്.ഡി.എഫ് സ്ഥാനാര്ത്ഥി വി.കെ പ്രശാന്തിന്റെ വിജയം അതാണ് വ്യക്തമാക്കുന്നത്. ശബരിമല വിഷയത്തില് എന്.എസ്.എസിനൊപ്പം നിന്ന ആര്.എസ്.എസിനെയും ബി.ജെ.പിയേയും പെട്ടെന്ന് സുകുമാരന് നായരുടെ നേതൃത്വം തള്ളിപ്പറഞ്ഞപ്പോള് അവര്ക്ക് വലിയതിരിച്ചടിയായിപ്പോയി. വിശ്വാസ സംരക്ഷണത്തിന് കേന്ദ്രസര്ക്കാര് ഒന്നും ചെയ്തില്ലെന്നും വഞ്ചിക്കുകയായിരുന്നെന്നും വിജയദശമി സമ്മേളന സന്ദേശത്തില് അറിയിക്കുകയും ചെയ്തതോടെ ആര്.എസ്.എസ് വലിയ പ്രതിരോധത്തിലായി. കുമ്മനം രാജശേഖരനെ ഇറക്കി ഇത്തവണ വട്ടിയൂര്ക്കാവ് പിടിച്ചെടുക്കാമെന്ന ആത്മവിശ്വാസം ആര്.എസ്.എസിനുണ്ടായിരുന്നു. 42 ശതമാനം നായര് വോട്ടുള്ള മണ്ഡലത്തില് എന്.എസ്.എസ് പിന്തുണ കൂടിയാകുമ്പോള് കാര്യങ്ങള് ഭംഗിയാകുമെന്നും കരുതി.
പക്ഷെ, എന്.എസ്.എസിന്റെ അപ്രതീക്ഷിത നിലപാടിനെ പ്രതിരോധിക്കാന് അവസാന നിമിഷം ആര്.എസ്.എസ് തന്ത്രപരമായ നിലപാട് സ്വീകരിച്ചു. കുമ്മനം മത്സരിച്ചാല് ഒരു പക്ഷെ, കോണ്ഗ്രസ് സ്ഥാനാര്ത്ഥിയും എന്.എസ്.എസ് നോമിനിയുമായിരുന്ന കെ.മോഹന്കുമാര് വിജയിച്ചേക്കും. അത് ആര്.എസ്.എസിനും ബി.ജെ.പിക്കും വലിയ തിരിച്ചടിയാകും. അത് മനസ്സിലാക്കിയ നേതൃത്വം നോമിനേഷന് കൊടുക്കുന്നതിന്റെ തലേദിവസം രാത്രി കാര്യങ്ങള് അട്ടിമറിച്ചു. കുമ്മനത്തിന് പകരം വിജയപ്രതീക്ഷയില്ലാത്ത തിരുവനന്തപുരം ജില്ലാ പ്രസിഡന്റ് അഡ്വ. എസ്. സുരേഷിനെ സ്ഥാനാര്ത്ഥിയാക്കിയത്. സംഘപരിവാറിന്റെയും ബി.ജെ.പിയുടെയും ശക്തരായ പ്രവര്ത്തകരുടെ വോട്ട് വി.കെ പ്രശാന്തിന് ലഭിച്ചു. അതുകൊണ്ടാണ് തുടക്കം മുതല് പ്രശാന്തിന് അപ്രമാദിത്വം നിലനിര്ത്താനായത്.
ജാതി സംഘടനകളെ കൂട്ടുപിടിച്ച് കോണ്ഗ്രസ് നടത്തുന്ന തെരഞ്ഞെടുപ്പ് കളികള്ക്ക് മറുപടി കൊടുക്കണമെന്ന് ബി.ജെ.പിക്കും ആഗ്രഹമുണ്ടായിരുന്നു. കാരണം ബി.ജെ.പി ലക്ഷ്യംവയ്ക്കുന്ന ഹൈന്ദവ വോട്ടുകള് കോണ്ഗ്രസിന്റെ പെട്ടിയിലേക്കാണ് പലപ്പോഴും വീഴുന്നത്. അതിന് അറുതിവരുത്തുകയും കോണ്ഗ്രസ് മുക്തഭാരതം എന്ന, പ്രധാനമന്ത്രി നരേന്ദ്രമോദിയുടെയും പാര്ട്ടി അധ്യക്ഷന് അമിത് ഷായുടെയും ലക്ഷ്യം കൈവരിക്കാനും വട്ടിയൂര്ക്കാവില് എല്.ഡി.എഫ് സ്ഥാനാര്ത്ഥിയെ വിജയിപ്പിക്കുകയല്ലാതെ മറ്റ് മാര്ഗമില്ലായിരുന്നു. എസ്.എന്.ഡി.പി അകന്ന് നില്ക്കുന്നതിനാല് മറ്റൊരു പ്രധാന ഹൈന്ദവ സംഘടനയായ എന്.എസ്.എസിന്റെ പിന്തുണ ബി.ജെ.പിക്ക് അത്യാവശ്യമായിരുന്നു. ശബരിമല വിഷയത്തിലൂടെ അത് നേടിയെടുക്കാനായെങ്കിലും തെരഞ്ഞെടുപ്പ് രാഷ്ട്രീയത്തില് അത് ഗുണം ചെയ്യില്ല.
എന്.എസ്.എസ് ശരിദൂരം പ്രഖ്യാപിച്ചതോടെ തിരുവനന്തപുരം താലൂക്ക് യൂണിയന് പ്രസിഡന്റ് സംഗീത് കുമാര് അടക്കം അതിനായി മുന്നിട്ടിറങ്ങിയിരുന്നു. അതോടെ ജാതി സംഘടകള് വോട്ട് പിടിക്കുന്നെന്ന പരാതിയുമായി സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന് തെരഞ്ഞെടുപ്പ് കമ്മീഷനെ സമീപിച്ചു. അങ്ങനെ എല്.ഡി.എഫിനെയും ബി.ജെ.പിയേയും ആര്.എസ്.എസിനേയും പിണക്കി, തങ്ങളുടെ നോമിനിയായ കെ.മോഹന്കുമാറിനെ വിജയിപ്പിക്കാമെന്ന എന്.എസ്.എസിന്റെ മോഹത്തിന് ശക്തമായ തിരിച്ചടിയാണ് വട്ടിയൂര്ക്കാവില് കിട്ടിയത്. അതിനാല് ശരിദൂരത്തില് നിന്ന് പിന്തിരിയുമോ എന്നാണ് അടുത്ത ചോദ്യം. സമദൂരത്തില് നിന്നാലെ എന്.എസ്.എസിനും ഗുണമുണ്ടാകൂ.
https://www.facebook.com/Malayalivartha
