വാഹനപരിശോധനയുടെ ദൃശ്യങ്ങള്‍ പകര്‍ത്തി സമൂഹമാധ്യമങ്ങളിലൂടെ പങ്കുവച്ചതിന് മണക്കാട് കരിമഠം കോളനിയില്‍ ടി.സി 39/1920 ല്‍ അജിത്ത് എന്ന് വിളിക്കുന്ന അജേഷി(19) നെ് ഫോര്‍ട്ട് പൊലീസ് അറസ്റ്റ് ചെയ്തു.

പിഴ അടയ്ക്കാന്‍ നിര്‍ദേശിച്ചതിന് വനിതാ ഉദ്യോഗസ്ഥയോട് കയര്‍ത്ത് സംസാരിച്ചു, ജീപ്പിന് മുകളില്‍ വച്ചിരുന്ന രേഖകള്‍ വലിച്ചെറിഞ്ഞു, പൊലീസിന്റെ കൃത്യ നിര്‍വഹണം തടസ്സപ്പെടുത്തി, സമൂഹ്യമാധ്യമങ്ങളില്‍ പൊലീസ് മോശമായി പെരുമാറിയെന്ന് വ്യാജ പ്രചരണം നടത്തി തുടങ്ങിയ വകുപ്പുകള്‍ ചുമത്തിയാണ് അറസ്റ്റ്.

പൊലീസും അജേഷും തമ്മില്‍ തര്‍ക്കമുണ്ടായത് കിഴക്കേക്കോട്ടയ്ക്ക് സമീപം വെട്ടിമുറിച്ച കോട്ട ഭാഗത്ത് ഇന്നലെ ഉച്ചയ്ക്കാണ്. വനിതാ എസ്‌ഐയുടെ നേതൃത്വത്തിലാണ് വാഹന പരിശോധന നടത്തിയത്. അജേഷിന്റെ വാഹനത്തിന്റെ നമ്പര്‍ എസ്‌ഐ ചോദിക്കുന്നത് മുതലുള്ള രംഗങ്ങളാണ് സാമൂഹ്യമാധ്യമങ്ങളില്‍ വന്ന വിഡിയോയില്‍ ഉള്ളത്.

താന്‍ വര്‍ക്ഷോപ്പിലേക്ക് ഇരുചക്രവാഹനം ഉരുട്ടിക്കൊണ്ടു പോവുകയാണെന്നും എന്തിനാണ് പിഴ ഈടാക്കുന്നതെന്നും അജേഷ് ചോദിക്കുന്നു. ഇതിനിടയില്‍ ദൃശ്യങ്ങള്‍ പകര്‍ത്തിയ മൊബൈല്‍ പിടിച്ച് വാങ്ങാന്‍ പൊലീസുകാര്‍ ശ്രമിക്കുന്നുണ്ട്. ബഹളം വച്ച് ആളെ കൂട്ടരുതെന്നും വനിതാ എസ്‌ഐ പറയുന്നുണ്ട്. ഒടുവില്‍ അജേഷിന്റെ പ്രതികരണത്തില്‍ സഹികെട്ട് പരിശോധന മതിയാക്കി വാഹനം എടുത്ത് പൊലീസ് തിരിച്ച് പോവുന്നതും കാണാം.

അജേഷ് പോസ്റ്റ് ചെയ്ത വീഡിയോ ഒട്ടേറെപ്പേര്‍ ഏറ്റെടുക്കുകയും ചെയ്തു. എന്നാല്‍ ഇയാള്‍ അമിത വേഗതയില്‍ ഇരുചക്രവാഹനം ഓടിച്ച് വന്നുവെന്നും കൈകാണിച്ചിട്ട് നിര്‍ത്താതെ അടുത്ത പമ്പില്‍ കയറ്റി നിര്‍ത്തുകയായിരുന്നുവെന്നും പൊലീസ് ആരോപിക്കുന്നു. ഹെല്‍മറ്റ് ധരിക്കാത്തതിന് പിഴ അടയ്ക്കാന്‍ നിര്‍ദേശിച്ചപ്പോള്‍ പൊലീസ് ഉദ്യോഗസ്ഥയോട് കയര്‍ത്ത് സംസാരിക്കുകയായിരുന്നെന്നും അതിനെ തുടര്‍ന്നാണ് അറസ്റ്റ് എന്നുമാണ് പൊലീസ് ഭാഷ്യം.