ലോക്സഭാ തെരഞ്ഞെടുപ്പില് യു.ഡി.എഫിന് ചരിത്രവിജയവും ബി.ജെ.പിക്ക് മുന്നേറ്റവും ലഭിച്ചതിന് വഴിയൊരുക്കിയ ശബരിമല യുവതീപ്രവേശന വിഷയം, പാലായ്ക്ക് പിന്നാലെ അഞ്ച് മണ്ഡലങ്ങളിലെ ഉപതെരഞ്ഞെടുപ്പിലും ചീറ്റ് പോകുന്ന കാഴ്ചയാണ് കേരള രാഷ്ട്രീയം ഇന്ന് കണ്ടത്
ലോക്സഭാ തെരഞ്ഞെടുപ്പില് യു.ഡി.എഫിന് ചരിത്രവിജയവും ബി.ജെ.പിക്ക് മുന്നേറ്റവും ലഭിച്ചതിന് വഴിയൊരുക്കിയ ശബരിമല യുവതീപ്രവേശന വിഷയം, പാലായ്ക്ക് പിന്നാലെ അഞ്ച് മണ്ഡലങ്ങളിലെ ഉപതെരഞ്ഞെടുപ്പിലും ചീറ്റ് പോകുന്ന കാഴ്ചയാണ് കേരള രാഷ്ട്രീയം ഇന്ന് കണ്ടത്. കോന്നിയിലും വട്ടിയൂര്ക്കാവിലും കാസര്കോടും ആചാരസംരക്ഷണവും ശബരിമല വിഷയവുമാണ് ചര്ച്ചയാക്കിയത്. മനുഷ്യന്റെ ജീവല്പ്രശ്നങ്ങള് മറികടന്നുള്ള ഈ ചര്ച്ച മുന്നോട്ട് വെച്ച സി.പി.എമ്മിലെ ശങ്കര് റേയ്ക്കും കോണ്ഗ്രസിലെ കെ.മോഹന്കുമാറിനും ബി.ജെ.പിയിലെ കെ.സുരേന്ദ്രനും തോറ്റ് തുന്നംപാടി. ഇത് വഴി സി.പി.എമ്മിനും സര്ക്കാരിനും തങ്ങളുടെ അഴിമതി അടക്കമുള്ള വിഷയങ്ങള് മറച്ചുവയ്ക്കാനുള്ള വഴിയുമായി. കേരള രാഷ്ട്രീയത്തില് ബി.ജെ.പി പടവലങ്ങ പോലെ വളരുന്നു എന്ന വ്യക്തമായ സൂചനയും ഈ തെരഞ്ഞെടുപ്പ് ഫലം നല്കുന്നു.
പെരുന്നയിലും കണിച്ചുകുളങ്ങരയിലും അരമനകളിലും ജമാഅത്തുകളിലും കയറി നിരങ്ങാതെ ജനങ്ങള്ക്കൊപ്പം നിന്ന്, അവരുടെ പ്രശ്നങ്ങള് മനസ്സിലാക്കി രാഷ്ട്രീയ പാര്ട്ടികളും നേതാക്കളും പ്രവര്ത്തിക്കണം എന്ന വ്യക്തമായ സൂചനയാണ് ജനം നല്കിയിരിക്കുന്നത്. അത് രാഷ്ട്രീയ നേതൃത്വത്തിന് എത്രത്തോളം മനസ്സിലായെന്ന് വരുംനാളുകളിലേ മനസ്സിലാക്കാനാകൂ. എന്.എസ്.എസിന്റെ പരസ്യമായ പിന്തുണ തിരിച്ചടിയായെന്ന് വട്ടിയൂര്ക്കാവിലെ കോണ്ഗ്രസ് സ്ഥാനാര്ത്ഥി കെ.മോഹന്കുമാര് വ്യക്തമാക്കി കഴിഞ്ഞു. എന്.എസ്.എസ് പരസ്യമായി കോണ്ഗ്രസ് സ്ഥാനാര്ത്ഥിക്ക് പിന്തുണ അറിയിച്ചപ്പോള്, മറ്റ് ഹൈന്ദവ സംഘടനകള് അതിനെതിരെ ശക്തമായ നിലപാടെടുത്തു എന്നകാര്യം കൂടിയാണ് വട്ടിയൂര്ക്കാവിലെ വിജയത്തില് നിന്ന് മനസ്സിലാക്കേണ്ടത്.
തെരഞ്ഞെടുപ്പിനോട് അടുത്ത ദിവസങ്ങളിലാണ് എന്.എസ്.എസ് വിജയദശമി സമ്മേളനം ആഘോഷിച്ചത്. ആ സമ്മേളനത്തില് സി.പി.എമ്മിനും സര്ക്കാരിനും കേന്ദ്രസര്ക്കാരിനും എതിരെ അതിരൂക്ഷവിമര്ശനമാണ് ജനറല്സെക്രട്ടറി ജി.സുകാമാരന് നായര് നടത്തിയത്. വിശ്വാസസംരക്ഷണത്തിനായി കേന്ദ്ര, സംസ്ഥാന സര്ക്കാരുകള് ഒന്നും ചെയ്തില്ലെന്നും അതിനാല് എന്.എസ്.എസ് സമദൂരത്തില് നിന്ന് ശരിദൂരത്തില് എത്തിനില്ക്കുകയാണെന്നും സുകുമാരന് നായര് പ്രസ്താവിച്ചു. ഒക്ടോബര് 15ന് ഇറങ്ങിയ എന്.എസ്.എസ് മുഖപത്രമായ സര്വ്വീസസിന്റെ എഡിറ്റോറിയയിലും സി.പി.എമ്മിനും സര്ക്കാരിനും കേന്ദ്രസര്ക്കാരിനും എതിരെ വീണ്ടും വിമര്ശനം ഉന്നയിച്ചു. അതൊന്നും സമുദായ അംഗങ്ങള് മുഖവിലയ്ക്ക് എടുത്തില്ലെന്നാണ് തെരഞ്ഞെടുപ്പ് ഫലം വ്യക്തമാക്കുന്നത്.
ശബരിമലയിലെ യുവതീപ്രവേശന വിധി റദ്ദാക്കാന് കേന്ദ്രസര്ക്കാര് നിയമം പാസാക്കുമെന്ന് പറഞ്ഞാണ് ബി.ജെ.പി സംസ്ഥാന അധ്യക്ഷന് പി.എസ് ശ്രീധരന്പിള്ള കോന്നിയിലും വട്ടിയൂര്ക്കാവിലും പ്രചരണം നടത്തിയത്. പുനപ്പരിശോധനാ ഹര്ജിയില് സുപ്രീംകോടതി വിധി പറഞ്ഞ ശേഷമായിരിക്കും തീരുമാനമെന്നും അദ്ദേഹം തള്ളിമറിച്ചു. എന്നാല് ശബരിമലവിധിയില് കേന്ദ്രത്തിന് ഒന്നും ചെയ്യാനാകില്ലെന്ന് കേന്ദ്രആഭ്യന്തര മന്ത്രിയായിരിക്കെ ഇപ്പോഴത്തെ പ്രതിരോധമന്ത്രി രാജ്നാഥ് സിംഗ് തന്നെ വ്യക്തമാക്കിയിരുന്നു. അതിനാല് ശബരിമലയുടെയും വിശ്വാസസംരക്ഷണത്തിന്റെയും പേര് പറഞ്ഞ് തങ്ങളുടെ കണ്ണില് പൊടിയിടാനാകില്ലെന്ന് ജനം വീണ്ടും പറയുകയാണ് ഉപതെരഞ്ഞെടുപ്പ് ഫലത്തിലൂടെ. കോന്നിയില് ത്രികോണ മത്സരത്തിന് ഇറങ്ങിയ ശബരിമല സമര നായകന് കെ.സുരേന്ദ്രന് മൂന്നാം സ്ഥാനത്തേക്ക് കൂപ്പ് കുത്തിയതും അവര് മനസ്സിലാക്കിയാല് നന്നാണ്.
https://www.facebook.com/Malayalivartha
