സിസ്റ്റര് അഭയ കേസ്... സഭയ്ക്കെതിരെ കളിച്ചവരാരും ഇന്നുവരെ രക്ഷപെട്ടിട്ടില്ല: ഫാ. തോമസ് കോട്ടൂര് തന്നെ നേരിട്ടു ഭീഷണിപ്പെടുത്തിയെന്ന് ജോമോന് പുത്തന്പുരയ്ക്കലിന്റെ മൊഴി
സിസ്റ്റര് അഭയ കേസില് ഒന്നാം പ്രതിയായ ഫാ. തോമസ് കോട്ടൂര് തന്നെ നേരിട്ടു ഭീഷണിപ്പെടുത്തിയെന്ന് ജോമോന് പുത്തന്പുരയ്ക്കല് തിരുവനന്തപുരം സിബിഐ കോടതിയില് മൊഴി നല്കി. 1993 ഡിസംബര് മാസത്തില് കോട്ടയത്ത് ഗാന്ധി പ്രതിമയുടെ മുന്പില് അഭയ കേസുമായി ബന്ധപ്പെട്ട പൊതുയോഗം നടക്കുന്നതിനിടയില് തന്നെ വിളിച്ചു മാറ്റി നിര്ത്തി 'അഭയ കേസുമായി മുന്നോട്ടുപോയാല് നിന്നെ ശരിയാക്കു'മെന്നും 'സഭയ്ക്കെതിരെ കളിച്ചവരാരും ഇന്നുവരെ രക്ഷപെട്ടിട്ടില്ല' എന്നും ഫാ. കോട്ടൂര് പറഞ്ഞു ഭീഷണിപ്പെടുത്തിയെന്നാണ് ആക്ഷന് കൗണ്സില് കണ്വീനറും പ്രോസിക്യൂഷന് ഇരുപത്തിനാലാം സാക്ഷിയുമായ ജോമോന് പുത്തന്പുരയ്ക്കല് മൊഴി നല്കി.
സ്വന്തം സഹോദരന് 1994 നവംബര് 27 ന് തന്നെ കോടാലി കൊണ്ടു വെട്ടി കൊലപ്പെടുത്തുവാന് ശ്രമിച്ചതിനു പിന്നില് അഭയ കേസിലെ പ്രതി ഫാ. കോട്ടൂരാണെന്നും ഈ സഹോദരന് 2014 ല് മരിച്ചപ്പോള് സഹോദരന്റെ കുടുംബത്തിനു സഭാനേതൃത്വം പത്തു ലക്ഷം രൂപ നല്കിയെന്നും ജോമോന് പുത്തന്പുരയ്ക്കല് സിബിഐ കോടതിയില് മൊഴി നല്കി. പ്രോസിക്യൂഷന് ഇരുപത്തിനാലാം സാക്ഷിയായാണ് തിരുവനന്തപുരം സിബിഐ കോടതി ജോമോനെ വിസ്തരിച്ചത്. പ്രതികളുടെ നുണ പരിശോധന നടത്തിയ ഡോക്ടര്മാരെ ഇന്നലെ കോടതിയില് വിസ്തരിക്കാനിരുന്നത് മറ്റൊരു ദിവസത്തേക്കു മാറ്റിയിരിക്കുകയാണ്. രണ്ടു ഡോക്ടര്മാരില് ഒരാള് മരിച്ചുപോയെന്ന് കോടതിയെ അറിയിച്ചതിനെ തുടര്ന്നാണിത്.
സിസ്റ്റര് അഭയ ലൈംഗിക പീഡനത്തിനിരയായിട്ടില്ലെന്ന് തിരുവനന്തപുരം ഫോറന്സിക് ലാബിലെ മുന് ഉദ്യോഗസ്ഥര് കഴിഞ്ഞ ദിവസം സാക്ഷിമൊഴി നല്കിയിരുന്നു. മുന് കെമിക്കല് എക്സാമിനര് ആര് ഗീതയും അനലിസ്റ്റ് ചിത്രയുമാണ് തിരുവനന്തപുരം സിബിഐ കോടതിയില് മൊഴി നല്കിയത്. അഭയയുടെ ആന്തരിക അവയവങ്ങളുടെ രാസപരിശോധനയില് പുരുഷ ബീജത്തിന്റെ അംശം കണ്ടെത്തിയില്ലെന്നും ഇവര് കോടതിയില് മൊഴി നല്കി. സിസ്റ്റര് അഭയയുടെ രാസപരിശോധന റിപ്പോര്ട്ട് തിരുത്തിയ കേസില് സിജെഎം കോടതി നേരത്തെ വെറുതെ വിട്ട ഉദ്യോഗസ്ഥരാണ് മൊഴി നല്കിയ രണ്ട് സാക്ഷികളും. 1992 ഏപ്രില് പത്തിന് തിരുവനന്തപുരം ഫോറന്സിക് ലാബില് കൊല്ലപ്പെട്ട അഭയയുടെ ആന്തരികാവയവങ്ങളുടെ രാസപരിശോധന റിപ്പോര്ട്ടില് തിരുത്തല് വരുത്തിയെന്ന് കാട്ടി ജോമോന് പുത്തന്പുരയ്ക്കലാണ് സിജെഎം കോടതിയില് ഹര്ജി നല്കിയിരുന്നത്.
2009ല് കുറ്റപത്രം സമര്പ്പിച്ച അഭയ കേസില് പത്ത് വര്ഷത്തിന് ശേഷമാണ് വിചാരണ നടക്കുന്നത്. വിചാരണ തടയണമെന്നാവശ്യപ്പെട്ട് കേസിലെ പ്രതികള് ഹൈക്കോടതിയെ സമീപിച്ചതിനെ തുടര്ന്ന് നടപടികള് നിരന്തരം മാറ്റിവയ്ക്കുകയായിരുന്നു. ഫാ.തോമസ് എം കോട്ടൂര്, സിസ്റ്റര് സെഫി എന്നിവരാണ് കേസിലെ മറ്റ് പ്രതികള്. രണ്ടാം പ്രതി ഫാ ജോസ് പൂതൃക്കയില്, ക്രൈം ബ്രാഞ്ച് മുന് എസ് പി, കെ ടി മൈക്കിള് എന്നിവരെ നേരത്തെ കുറ്റവിമുക്തരാക്കിയിരുന്നു.
https://www.facebook.com/Malayalivartha
