കാസര്‍കോട് ജില്ലയിലെ വിദ്യാഭ്യാസ സ്ഥാപനങ്ങള്‍ക്ക് വെള്ളിയാഴ്ച അവധി. പ്രൊഫഷണല്‍ കോളേജുകള്‍ ഉള്‍പ്പെടെയുള്ള വിദ്യാഭ്യാസ സ്ഥാപനങ്ങള്‍ക്കാണ് ജില്ലാ കളക്ടര്‍ അവധി പ്രഖ്യാപിച്ചത്. മധ്യകിഴക്കന്‍ അറബിക്കടലിനുമുകളില്‍ രൂപംകൊണ്ട ന്യൂനമര്‍ദം ശക്തമായ ചുഴലിക്കാറ്റായി രൂപം പ്രാപിച്ച് കര്‍ണാടകതീരത്തേക്കടുക്കുമെന്ന മുന്നറിയിപ്പിനെ തുടര്‍ന്ന് തീരമേഖലയില്‍ ജാഗ്രതാനിര്‍ദേശം പുറപ്പെടുവിച്ചിട്ടുണ്ട്. മത്സ്യത്തൊഴിലാളികള്‍ ജാഗ്രതപാലിക്കണമെന്ന് മുന്നറിയിപ്പ് നല്‍കിയിട്ടുണ്ട്.

ഇന്ന് വൈകീട്ടുവരെ ശക്തമായ കാറ്റിനും മഴയ്ക്കും സാധ്യതയുള്ളതായാണ് കാലാവസ്ഥാ നിരീക്ഷണവകുപ്പിന്റെ മുന്നറിയിപ്പ്. ദക്ഷിണകന്നഡ, ഉഡുപ്പി, ഉത്തര കന്നഡ, ഗോവ മേഖലകളില്‍ കനത്ത കാറ്റിനും മഴയ്ക്കും സാധ്യതയുണ്ട്. വ്യാഴാഴ്ച രാത്രിയോടെ മംഗളൂരുവില്‍ ശക്തമായ കാറ്റും മഴയുമുണ്ടായതിനാല്‍ ദക്ഷിണ കന്നഡ ജില്ലയില്‍ വെള്ളിയാഴ്ച റെഡ് അലര്‍ട്ട് പ്രഖ്യാപിച്ചു.ദക്ഷിണ കന്നഡ ജില്ലയിലെ പി.യു.സി. (പ്ലസ് ടു) വരെയുള്ള വിദ്യാഭ്യാസ സ്ഥാപനങ്ങള്‍ക്കും വെള്ളിയാഴ്ച ജില്ലാ ഡെപ്യൂട്ടി കമ്മിഷണര്‍ അവധി പ്രഖ്യാപിച്ചിരുന്നു.