സിലിയെ ഇല്ലാതാക്കാന് ഷാജു ഗൂഢാലോചന നടത്തി, ഷാജുവിനെതിരെ ബന്ധുവിന്റെ മൊഴി
കൂടത്തായി കേസിലെ അവസാനത്തെ ഇര സിലി സെബാസ്റ്റ്യനെ(43) കൊലപ്പെടുത്തുന്നതിനു മുന്പ് ഭ്രാന്തിയായി ചിത്രീകരിക്കാന് ഭര്ത്താവ് ഷാജുവും ഇയാളുടെ രണ്ടാം ഭാര്യ ജോളിയും ചേര്ന്ന് ശ്രമിച്ചിരുന്നതായി സിലിയുടെ ബന്ധുക്കള് മൊഴി നല്കി. സിലിയ്ക്ക് മാനസികരോഗമുണ്ടെന്നു വരുത്തിതീര്ത്ത് സാവധാനം വകവരുത്താന് ജോളിയും ഷാജുവും ചേര്ന്ന് ഗൂഢാലോചന നടത്തിയതായാണ് അന്വേഷണസംഘത്തിനു മുമ്പാകെ നല്കിയ മൊഴി.
ഭക്ഷണത്തില് 2014 മേയ് ഒന്നിന് സയനൈഡ് ചേര്ത്ത് നല്കിയതിനെ തുടര്ന്ന് സിലിയുടെ മകള് ഒന്നരവയസുകാരി ആല്ഫൈന് മേയ് മൂന്നിനാണ് മരിച്ചത്. ഓമനിച്ചു വളര്ത്തിക്കൊണ്ടുവന്ന പിഞ്ചുകുഞ്ഞിന്റെ അപ്രതീക്ഷിത വേര്പാടില് സിലി ഏറെ ദുഃഖിതയായിരുന്നു.
ആല്ഫൈന് കൊല്ലപ്പെടുന്നതിനു മുന്പ് സിലിക്ക് കഷായത്തില് സയനൈഡ് ചേര്ത്ത് നല്കിയെങ്കിലും അളവ് കുറവായതിനാല് മരിച്ചില്ല. അന്ന് വായില്നിന്ന് നുരയും പതയും വന്നത് അപസ്മാര ലക്ഷണമാണെന്ന് ഷാജു പലരോടും പറഞ്ഞു പ്രചരിപ്പിച്ചിരുന്നുവത്രേ.
എന്നാല് ഒരിക്കല്പോലും സിലിക്ക് അപസ്മാരം ഉണ്ടായിട്ടില്ലെന്ന് സഹോദരനടക്കം പറഞ്ഞെങ്കിലും ഷാജു പ്രചാരണം തുടര്ന്നു. ആല്ഫൈന്റെ മരണശേഷം ജോളി ഷാജുവിന് എത്തിച്ചുനല്കിയിരുന്ന ഗുളികകള്, കൂണില്നിന്നുണ്ടാക്കുന്ന പ്രത്യേകതരം ഗുളികയാണെന്നും ഡിപ്രഷന് കുറയ്ക്കാനുള്ള മരുന്നാണെന്നും പറഞ്ഞാണ് ഷാജു സിലിയ്ക്ക് നല്കിയിരുന്നത്.
കുഞ്ഞ് മരിച്ചത് മൂലമുള്ള മാനസിക വിഭ്രാന്തിയും അപസ്മാരവും മാറാനെന്ന പേരില് ഷാജു എന്നും വൈകിട്ട് ഈ ഗുളിക സിലിക്ക് നിര്ബന്ധിച്ചു നല്കുമായിരുന്നു. കുറെക്കാലം കഴിച്ചപ്പോള് സിലി ഈ മരുന്നിന് അടിമയായി. ഗുളിക കിട്ടിയില്ലെങ്കില് അസ്വസ്ഥതകള് കാണിച്ചുതുടങ്ങി. അപ്പോഴാണ് സിലിക്ക് ഭ്രാന്തിന്റെ ലക്ഷണമാണെന്ന് ഷാജുവും ജോളിയും ബന്ധുവീടുകളില് പ്രചരിപ്പിച്ചത്.
സിലിയുടെ സഹോദരന് സിജോയുടെ ഭാര്യ കൂടത്തായി സ്കൂളില് അധ്യാപികയാണ്. ഒരുദിവസം കൂടത്തായി സ്കൂളിലെത്തിയ ഷാജു, നിന്റെ നാത്തൂന് ഭ്രാന്താണ്, ചികിത്സിക്കണം, ഞാന് മടുത്തു എന്ന് ഈ അധ്യാപികയോടു പറഞ്ഞിരുന്നു. സിലിയുടെ കോടഞ്ചേരിയില് താമസിക്കുന്ന മാതൃസഹോദരി ഒരുദിവസം കോടഞ്ചേരി അങ്ങാടിയില് ഭര്ത്തവുമൊത്ത് നില്ക്കുമ്പോള് ഷാജു അടുത്തെത്തി, കുഞ്ഞമ്മേ, അവള്ക്ക് ഭ്രാന്താ എന്നു പറഞ്ഞു. ഗുളിക കിട്ടാതെ വന്നാല് സിലിക്ക് വിറയല് വരുമായിരുന്നു.
സിലിക്ക് ഭ്രാന്താണെന്നു വരുത്തിതീര്ക്കാന് ഷാജുവിനൊപ്പം അയാളുടെ വീട്ടുകാരും ജോളിയും പ്രചാരണം നടത്തി എന്നാണ് സിലിയുടെ ബന്ധുക്കളുടെ മൊഴി. ഇന്നലെ പുലിക്കയത്തെ പൊന്നാമറ്റം വീട്ടിലെത്തിയ അന്വേഷണസംഘം ഷാജുവിനോട് ഗുളികയെക്കുറിച്ച് ചോദിച്ചെങ്കിലും അറിയില്ലെന്നായിരുന്നു മറുപടി. സിലിക്ക് നല്കിവന്ന ഗുളികയെക്കുറിച്ച് ജോളി നല്കിയ മൊഴിയുടെ അടിസ്ഥാനത്തില് പോലീസ് വിശദമായ അന്വേഷണം ആരംഭിച്ചിട്ടുണ്ട്.
https://www.facebook.com/Malayalivartha
