നിയമസഭാ ഉപതെരഞ്ഞെടുപ്പില്‍ കനത്ത തിരിച്ചടിയേറ്റതിനു പിന്നാലെ ബിജെപിയുടെ സംസ്ഥാന അധ്യക്ഷനെ തന്നെ മാറ്റിയിരിക്കുകയാണ്. കേരളത്തില്‍ പരീക്ഷിച്ച് പരാജയപ്പെടുന്ന നേതാക്കളെ പുനപ്രതിഷ്ഠിക്കാന്‍ പറ്റിയ ഇടമായി ഐസ്വാളിലെ രാജ്ഭവന്‍ മാറുകയാണ്. കഴിഞ്ഞവര്‍ഷം ചെങ്ങന്നൂര്‍ ഉപതെരഞ്ഞെടുപ്പിന്റെ തലേന്നാണ് സംസ്ഥാന അധ്യക്ഷനായിരുന്ന കുമ്മനം രാജശേഖരനെ മിസോറമിലേക്ക് കടത്തിയത്. പി എസ് ശ്രീധരന്‍പിള്ളയായിരുന്നു അന്ന് ചെങ്ങന്നൂരില്‍ ബിജെപി സ്ഥാനാര്‍ഥി. വിജയപ്രതീക്ഷയില്‍ കളത്തിലിറങ്ങി വലിയ പരാജയം ഏറ്റുവാങ്ങിയ ശ്രീധരന്‍പിള്ള പിന്നീട് ബിജെപി സംസ്ഥാന അധ്യക്ഷനായി. ഇപ്പോള്‍ ഉപതെരഞ്ഞെടുപ്പില്‍ കനത്ത തിരിച്ചടി നേരിട്ടതിന്റെ പിറ്റേന്ന് അദ്ദേഹത്തിനും കുമ്മനം പോയ വഴി കാട്ടിക്കൊടുക്കുകയാണ് ദേശീയനേതൃത്വം.

അഞ്ചുമാസംമുമ്പ് നടന്ന ലോക്‌സഭാ തെരഞ്ഞെടുപ്പിനെ അപേക്ഷിച്ച് അരലക്ഷത്തിലേറെ വോട്ടാണ് ഉപതെരഞ്ഞെടുപ്പ് നടന്ന ആറ് മണ്ഡലങ്ങളിലായി ബിജെപിക്ക് നഷ്ടമായത്. ഇക്കാര്യം ദേശീയനേതൃത്വത്തോട് എങ്ങനെ വിശദീകരിക്കുമെന്ന അങ്കലാപ്പില്‍ നില്‍ക്കവേയാണ് വിചാരണയില്ലാതെ ശിക്ഷ വിധിച്ചത്. ബിജെപിയില്‍ സേവനം മതിയാക്കിക്കൊള്ളൂവെന്നാണ് കേന്ദ്രം നല്‍കുന്ന സന്ദേശം. എന്നാല്‍ ഇത് ശ്രീധരന്‍പിള്ള സന്തോഷത്തോടെ ഏറ്റെടുക്കുകയാണുണ്ടായത്.

ബിജെപി ദേശീയനേതൃത്വം ഏറെ പ്രതീക്ഷയോടെ സംസ്ഥാന അധ്യക്ഷപദവിയിലേക്ക് കൊണ്ടുവന്ന നേതാവാണ് കുമ്മനം രാജശേഖരന്‍. സംഘപരിവാര്‍ നേതാവായിരുന്ന കുമ്മനത്തിന് ബിജെപിയില്‍ അംഗത്വം നല്‍കി അധ്യക്ഷപദവിയില്‍ അവരോധിച്ചത് ആര്‍എസ്എസിന്റെ താല്‍പ്പര്യപ്രകാരമാണ്. മോഡി-അമിത് ഷാ കൂട്ടുകെട്ട് ദേശീയതലത്തില്‍ പയറ്റിയ രാഷ്ട്രീയം കേരളത്തിലും നടപ്പാക്കുന്നതിന്റെ ഭാഗമായിരുന്നു ഇത്. എന്നാല്‍, പരീക്ഷണം വിജയം കണ്ടില്ല.

ചെങ്ങന്നൂര്‍ തെരഞ്ഞെടുപ്പിന്റെ തലേന്നുതന്നെ മിസോറമിലേക്ക് നിയമിതനായ കുമ്മനം ഏതാനും വര്‍ഷംമാത്രം തുടര്‍ന്ന സജീവ രാഷ്ട്രീയം വിടുകയാണെന്ന പ്രതീതിയുണ്ടാക്കി. എന്നാല്‍, ലോക്‌സഭാ തെരഞ്ഞെടുപ്പില്‍ തിരുവനന്തപുരത്ത് സ്ഥാനാര്‍ഥിത്വത്തിനായി കഴിഞ്ഞ മാര്‍ച്ച് എട്ടിന് ഗവര്‍ണര്‍സ്ഥാനം രാജിവച്ചു. പിന്നീട് വട്ടിയൂര്‍ക്കാവിലും കുമ്മനത്തെ പരിഗണിച്ചെങ്കിലും സ്വന്തം പക്ഷക്കാര്‍തന്നെ വെട്ടി.

താന്‍ മാറ്റിനിര്‍ത്തപ്പെടുകയാണെന്ന അതൃപ്തി പ്രകടിമാക്കുന്ന രീതിയിലാണ് സ്ഥാനലബ്ധിക്കുശേഷം ശ്രീധരന്‍പിള്ള മാധ്യമങ്ങളോട് പ്രതികരിച്ചത്. കേരളത്തോട് സമാനമായ കാലാവസ്ഥയുള്ള മിസോറമിലെത്തിയാല്‍ എഴുത്തും വായനയും പുനരാരംഭിക്കാന്‍ കഴിയുമല്ലോ എന്ന ആശ്വാസമാണ് അദ്ദേഹം പ്രകടിപ്പിച്ചത്. തെരഞ്ഞെടുപ്പ് തോല്‍വിയുമായി ബന്ധപ്പെട്ട സ്ഥാനചലനമാണോ എന്ന ചോദ്യത്തോട് വ്യക്തമായി പ്രതികരിച്ചതുമില്ല. വലിയൊരു സമ്മാനവും അംഗീകാരവുമായി ശ്രീധരന്‍പിള്ളപോലും ഗവര്‍ണര്‍സ്ഥാനത്തെ കാണുന്നില്ല എന്ന് വാക്കുകളില്‍ വ്യക്തം. വലിയ സന്തോഷം പ്രകടിപ്പിക്കാറില്ല എന്നതിനൊപ്പം, സങ്കടവും തോന്നാറില്ല എന്നുകൂടി പറഞ്ഞുവച്ചാണ് മറ്റൊരു ബിജെപി അധ്യക്ഷന്‍കൂടി മിസോറമിലേക്ക് യാത്രപുറപ്പെടുന്നത്.

മിസോറാം ഗവര്‍ണറാകുന്ന മൂന്നാമത്തെ മലയാളിയാണ് ശ്രീധരന്‍ പിള്ള. നേരത്തെ 201114 കാലയളവില്‍ വക്കം പുരുഷോത്തമനും 201819ല്‍ കുമ്മനം രാജശേഖരനും മിസോറാം ഗവര്‍ണറായിരുന്നു. നിലവില്‍ ബിജെപി സംസ്ഥാന അധ്യക്ഷനാണ് ശ്രീധരന്‍ പിള്ള. അസം ഗവര്‍ണര്‍ ജഗദീഷ് മുഖിയ്ക്കായിരുന്നു മിസോറാമിന്റെ അധിക ചുമതല. രാഷ്ട്രപതി റാംനാഥ് കോവിന്ദാണ് ഇതുസംബന്ധിച്ച് ഉത്തരവ് പുറപ്പെടുവിച്ചത്.