എല്ലാം കറങ്ങിത്തിരിഞ്ഞ്... ലോക്സഭാ തെരഞ്ഞെടുപ്പിലേയും നിയമസഭാ ഉപതെരഞ്ഞെടുപ്പിലേയും കനത്ത പരാജയത്തിനൊടുവില് ശ്രീധരന് പിള്ളയെ നാട് കടത്തുമ്പോള് പകരക്കാരനെ ചൊല്ലി ചര്ച്ചകള് സജീവമാകുന്നു; കുമ്മനത്തിനും കെ. സുരേന്ദ്രനും സാദ്ധ്യത; ഒരിക്കല് കൂടി കുമ്മനത്തിന് അവസരം ലഭിച്ചാല് എല്ലാം മാറിമറിയും
കേരളത്തിലെ ബിജെപി നേതൃത്വം വല്ലാത്തൊരു പ്രതിസന്ധിയിലേക്കാണ് പോകുന്നത്. ലോക്സഭാ തെരഞ്ഞെടുപ്പിലും നിയമസഭാ തെരഞ്ഞെടുപ്പിലും കനത്ത തോല്വി ഏറ്റുവാങ്ങിയ ബിജെപി നേതൃത്വത്തെ പൊളിച്ചെഴുതാന് തീരുമാനിച്ചിരിക്കുകയാണ് കേന്ദ്ര നേതൃത്വം. ശ്രീധരന്പിള്ളയെ മാറ്റി കൂടുതല് ശക്തനായ സംസ്ഥാന അധ്യക്ഷനെ കൊണ്ടുവരാനുള്ള ശ്രമത്തിലാണ് കേന്ദ്രം.
നിലവിലെ ബി.ജെ.പി സംസ്ഥാന അദ്ധ്യക്ഷന് പി.എസ് ശ്രീധരന്പിള്ള മിസോറാം ഗവര്ണറാകുന്ന സാഹചര്യത്തില് പാര്ട്ടി സംസ്ഥാന അദ്ധ്യക്ഷസ്ഥാനത്തേക്ക് കുമ്മനം രാജശേഖരന്റെയും കെ. സുരേന്ദ്രന്റെയും പേരുകള് പരിഗണിക്കുമെന്നാണ് പാര്ട്ടി നേതൃത്വത്തില് നിന്ന് ലഭിക്കുന്ന സൂചന. 2018 മേയില് കുമ്മനത്തെ മിസോറം ഗവര്ണറായി നിയമിച്ചതിന് ശേഷം ജൂലായില് ശ്രീധരന്പിള്ള അദ്ധ്യക്ഷ സ്ഥാനത്തേക്ക് എത്തുകയായിരുന്നു. മാത്രമല്ല ചെങ്ങന്നൂര് ഉപതെരഞ്ഞെടുപ്പ് പ്രചാരണത്തിന്റെ ആവേശങ്ങള്ക്കിടയിലാണ് കേന്ദ്രം കുമ്മനത്തെ മിസോറാമിലേക്കയച്ചത്.
തിരഞ്ഞെടുപ്പിന് ശേഷം കേരള രാഷ്ട്രീയത്തെ പിടിച്ചുലച്ച ശബരിമല വിഷയമായിരുന്നു ശ്രീധരന്പിള്ളയ്ക്ക് കൈകാര്യം ചെയ്യേണ്ടിയിരുന്നത്. സംഭവത്തില് ജനവികാരം ബി.ജെ.പിയോടാണെന്നുള്ള പ്രതീതി ഉണ്ടായിരുന്നെങ്കിലും തിരഞ്ഞെടുപ്പില് ബി.ജെ.പി പരാജയപ്പെടുകയാണ് ഉണ്ടായത്. ശബരിമലയടക്കമുള്ള വിഷയങ്ങള് കിട്ടിയിട്ടും ഒരു സീറ്റുപോലും നേടാന് പറ്റാത്തത് ശ്രീധരന്പിള്ളയ്ക്കെതിരെ വിമര്ശനങ്ങള് ഉയരാന് കാരണമായി. തുടര്ന്ന് നടത്തിയ പ്രവര്ത്തനങ്ങളിലും ബി.ജെ.പിക്ക് പച്ചപിടിക്കാന് കഴിഞ്ഞില്ല.നിയമസഭാ ഉപതിരഞ്ഞെടുപ്പിലും ശബരിമല വിഷയം ഉയര്ത്തിക്കാട്ടിയെങ്കിലും ബി.ജെ.പി ഒരു സീറ്റ് പോലും പിടിക്കാനായില്ല. കോന്നിയില് കെ. സുരേന്ദ്രന്റെ വോട്ട് വിഹിതം കൂട്ടാന് കഴിഞ്ഞത് മാത്രമാണ് ആകെ പറയാനുള്ളത്. ഈ സാഹചര്യത്തിലാണ് ശ്രീധരന്പിള്ള ഗവര്ണറായി മിസോറാമിലേക്ക് പോകുന്നത്.
അതേസമയം അദ്ധ്യക്ഷ പദവിയിലേക്ക് കൂടുതല് ഉയര്ന്നു കേള്ക്കുന്നത് സംസ്ഥാന ജനറല് സെക്രട്ടറി കെ സുരേന്ദ്രന്റെ പേരാണ്. പ്രവര്ത്തനങ്ങളും ജനപിന്തുണയും കണക്കിലെടുത്ത് കെ. സുരേന്ദ്രനെ സംസ്ഥാന അധ്യക്ഷ സ്ഥാനത്തേക്ക് കൊണ്ടുവന്നേക്കുമെന്നാണ് ബി.ജെ.പി വൃത്തങ്ങള് നല്കുന്ന സൂചന. ദേശീയ നേതൃത്വത്തിനും സുരേന്ദ്രന് വരുന്നതിനോട് വിയോജിച്ച് ഉണ്ടാകാന് സാദ്ധ്യതയില്ല. കുമ്മനം ഒഴിഞ്ഞതിന് പിന്നാലെ സുരേന്ദ്രനെ സംസ്ഥാന അധ്യക്ഷനാക്കാന് നടത്തിയ ശ്രമം ആര്.എസ്.എസിന്റെ എതിര്പ്പുമൂലം പരാജയപ്പെട്ടിരുന്നു. ഇപ്രാവശ്യവും ആര്.എസ്.എസ് നേതൃത്വം കുമ്മനം രാജശേഖരന് സംസ്ഥാന അധ്യക്ഷ സ്ഥാനത്തേക്ക് എത്തിക്കാനുള്ള നീക്കമുണ്ടെന്നും ബിജെപി വൃത്തങ്ങളില് സൂചന ലഭിക്കുന്നു. ലോക്സഭ തിര!ഞ്ഞെടുപ്പ് പരാജയത്തിന് ശേഷം കുമ്മനത്തിന് സ്ഥാനങ്ങളൊന്നും പാര്ട്ടി നല്കിയിട്ടില്ല എന്നതും ഇതില് ചൂണ്ടിക്കാട്ടുന്നു. അതേസമയം എം.ടി രമേശിന് വേണ്ടി പി.കെ കൃഷ്ണദാസ് പക്ഷവും രംഗത്തെത്തിയിട്ടുണ്ട്.
അതേസമയം പിഎസ് ശ്രീധരന്പിള്ളയെ മിസോറാം ഗവര്ണറായി നിയമിച്ചത് അര്ഹതയ്ക്കുള്ള അംഗീകാരമാണെന്ന് മുന് മിസോറാം ഗവര്ണറും ബിജെപി നേതാവുമായ കുമ്മനം രാജശേഖരന് വ്യക്തമാക്കി. ഉപതെരഞ്ഞെടുപ്പിലെ പ്രകടനവുമായി ഈ നിയമനത്തിന് ബന്ധമില്ലെന്നും കുമ്മനം വ്യക്തമാക്കി.
ഭരണ നൈപുണ്യമുള്ള നിയമവിദഗ്ധനാണ് ശ്രീധരന് പിള്ള. അഭിഭാഷകനായ ശ്രീധരന് പിള്ള പ്രവര്ത്തന പാരമ്ബര്യവും പരിചയവുമുള്ളയാണ്. അതുകൊണ്ടുതന്നെ ഈ പദവിക്ക് ഏറ്റവും അര്ഹനാണെന്നും കുമ്മനം പറഞ്ഞു.
https://www.facebook.com/Malayalivartha
