ചേര്ത്തല ആര്ടിഒ ഓഫീസിലെ മോട്ടോര് വെഹിക്കിള് ഇന്സ്പെക്ടര്ക്ക് ഏജന്റിന്റെ മര്ദനം, ഓഫീസിന്റെ നിയന്ത്രണം ഏജന്റുമാരുടെ കൈകളിലാണെന്ന് ആക്ഷേപം
ചേര്ത്തല ജോയിന്റ് ആര്ടിഒ ഓഫീസിലെ മോട്ടോര് വെഹിക്കിള് ഇന്സ്പെക്ടര്, ഏജന്റിന്റെ മര്ദ്ദനമേറ്റ് ഗവ. താലൂക്ക് ആശുപത്രിയിലായി.
സംഭവത്തില് പോലീസ് അന്വേഷണം ആരംഭിച്ചു. ചേര്ത്തല ജോയിന്റ് ആര്ടിഒ ഓഫീസിലെ എംവിഐ കെ.ജി. ബിജുവാണ് ആശുപത്രിയില് കഴിയുന്നത്. അതേസമയം എംവിഐ തന്നെ ആക്രമിച്ചെന്ന് ആരോപിച്ച ഏജന്റായ തുറവൂര് തിരുമലഭാഗം പുത്തന്തറ വീട്ടില് തമ്പി(50)യും ഇതേ ആശുപത്രിയില് അഡ്മിറ്റായിട്ടുണ്ട്.
ഇന്നലെ രാവിലെ ഓഫീസിനുള്ളിലെ കൗണ്ടറിന് സമീപം നിന്ന് അപേക്ഷ പൂരിപ്പിക്കുകയായിരുന്ന ഏജന്റ് തമ്പിയോട് മാറി നില്ക്കാന് ആവശ്യപ്പെട്ടിട്ടും അനുസരിക്കാത്തതിനെ തുടര്ന്ന് എംവിഐ അത് മൊബൈല് ഫോണില് പകര്ത്തി. പടമെടുത്ത ബിജുവിന്റെ കൈ പിടിച്ച് തിരിക്കുകയും ഷര്ട്ട് വലിച്ചു കീറുകയും പിടിച്ചു തള്ളുകയും ചെയ്തെന്നാണ് പരാതി.
ഓഫീസിലെത്തുന്നവര്ക്ക് തടസമായി നിന്നതിനാലാണ് തമ്പിയോട് മാറി നില്ക്കാന് ആവശ്യപ്പെട്ടതെന്ന് കെ.ജി ബിജു പറഞ്ഞു. ബിജുവിന്റെ ചില നടപടികള്ക്കെതിരെ ഒരു പരാതി കഴിഞ്ഞദിവസം ട്രാന്സ്പോര്ട്ട് കമ്മീഷണര്ക്ക് നല്കിയിരുന്നെന്നും ഇതിന്റെ വൈരാഗ്യത്തിലാണ് ഓഫീസില് ജോലി സംബന്ധമായ ആവശ്യത്തിനെത്തിയ തന്നെ അകാരണമായി മര്ദിച്ചതെന്നും തമ്പിയും പരാതിപ്പെട്ടു. കഴുത്തിനും നെഞ്ചിനും ഇടിക്കുകയും കൈ പിടിച്ചു തിരിക്കുകയും ചെയ്തെന്നും പരാതിയിലുണ്ട്.
അതേസമയം ചേര്ത്തല ജോയിന്റ് ആര്ടിഒ ഓഫീസിന്റെ നിയന്ത്രണം ഏജന്റുമാരുടെ കൈകളിലാണെന്ന് ആക്ഷേപം ഉയര്ന്നിട്ടുണ്ട്. വിവിധ ആവശ്യങ്ങള്ക്കായി ജനങ്ങള് മണിക്കൂറുകള് ക്യൂവില് നില്ക്കുമ്പോള് ഏജന്റുമാര് പിന്നിലൂടെ കാര്യങ്ങള് സാധിക്കുകയാണെന്നും ആക്ഷേപം ഉയരുന്നുണ്ട്.
ഒരാളില് നിന്നും ഒരു അപേക്ഷ മാത്രമേ സ്വീകരിക്കാവൂ എന്നും ഏജന്റുമാരെ ഓഫീസില് കയറ്റരുതെന്നും വകുപ്പ് അധികൃതരുടെ നിര്ദേശം ഉണ്ടെങ്കിലും ചേര്ത്തലയിലെ ആര്ടിഒ ഓഫീസിലെ അധികൃതര് അത് അറിഞ്ഞ മട്ടില്ല. അപേക്ഷയുമായി ജനങ്ങള് ക്യൂവില് നില്ക്കുമ്പോള് പോലും ഏജന്റുമാര് കെട്ടുകണക്കിന് അപേക്ഷകളുമായി എത്തും. മണിക്കൂറുകള് ജനങ്ങള് ക്യൂവില് നില്ക്കേണ്ട അവസ്ഥയാണ്. ഇന്നലെ നടന്ന കൈയാങ്കളിക്കു പിന്നിലെ തുടക്കവും ഇതായിരുന്നു. സംഘര്ഷം ഓഫീസിന്റെ പ്രവര്ത്തനം അല്പനേരം തടസപ്പെടുത്തുകയും ചെയ്തു.
ചേര്ത്തല ആര്ടിഒ കേന്ദ്രീകരിച്ച് നിരവധി ഓട്ടോ ഏജന്റുകളാണ് പ്രവര്ത്തിക്കുന്നത്. കിട്ടേണ്ട 'പടി' യഥാസമയം ലഭിക്കുന്നതിനാല് ആര്ടിഒ ഓഫീസിലെ എല്ലാ പ്രവര്ത്തനങ്ങളിലും ഏജന്റുമാര്ക്ക് മുന്ഗണനയാണ്. ഏജന്റുമാര് വഴി വരുന്ന അപേക്ഷകള് പെട്ടെന്ന് തീര്പ്പാകുമ്പോള് സാധാരണ ജനങ്ങളുടെ അപേക്ഷകള് മനപൂര്വം വൈകിക്കുന്നുവെന്ന് പരാതിയുണ്ട്.
https://www.facebook.com/Malayalivartha
