കോതമംഗലം താലൂക്കില്‍ ഉള്‍പ്പെടെ റേഷന്‍ കടകളില്‍ വിതരണത്തിനെത്തിച്ചിരിക്കുന്നത് ഭക്ഷ്യയോഗ്യമല്ലാത്ത അരിയെന്ന് വ്യാപകപരാതി. മുവാറ്റുപുഴ, ആലുവ പ്രദേശത്തും സമാന പ്രശ്‌നം ഉണ്ടായതിനാല്‍ റേഷന്‍ വ്യാപാര സംഘടന ജില്ലാ ഭാരവാഹികള്‍ ഇത് സംബന്ധിച്ച് ഭക്ഷ്യസുരക്ഷാ കമ്മീഷന് പരാതി നല്‍കിയിട്ടുണ്ട്. എല്ലാമാസവും 15-ന് മുമ്പ് റേഷന്‍ കടകളില്‍ വിതരണത്തിനുള്ള സാധനങ്ങള്‍ എത്തിച്ച് നല്‍കണമെന്ന് നിര്‍ദ്ദേശം നല്‍കിയിട്ടുണ്ടെങ്കിലും, പല റേഷന്‍ കടകളിലും അരി ഉള്‍പ്പെടെയുള്ളവ വിതരണത്തിന് എത്തിച്ച് നല്‍കിയതു തന്നെ എട്ട് ദിവസം വൈകി ഇന്നലെയാണ്.

അതും പൂപ്പല്‍ പിടിച്ചതും, ദുര്‍ഗ്ഗന്ധം വമിക്കുന്നതുമായ ഭക്ഷ്യയോഗ്യമല്ലാത്ത അരി. ഇത് വ്യാപകമായ പരാതിക്ക് ഇടയാക്കിയിട്ടുണ്ട്. ഇനിയും അരിയും മറ്റ് ഉല്‍പ്പന്നങ്ങളും എത്താത്ത റേഷന്‍ കടകളുമുണ്ട്. പല റേഷന്‍ കടകളിലും വിതരണത്തിന് നല്‍കിയിട്ടുള്ള ഗോതമ്പില്‍ നിറയെ ജീവനുള്ള ചെള്ള് ഉള്ളതായും പരാതി ഉയര്‍ന്നിട്ടുണ്ട്. ഇത് മറ്റ് ധാന്യങ്ങളിലേക്കും വ്യാപിക്കാനും ഇടയുണ്ട്.

കോതമംഗലം താലൂക്കിലെ വാരപ്പെട്ടി, പല്ലാരിമംഗലം, കോട്ടപ്പടി പഞ്ചായത്തുകളിലെ റേഷന്‍കടകളില്‍ വിതരണത്തിനെത്തിയ അരിയാണ് പുപ്പല്‍ ബാധിച്ച് കട്ടപിടിച്ച് ദുര്‍ഗ്ഗന്ധം വമിക്കുന്നതായി ശ്രദ്ധയില്‍പ്പെട്ടത്. ത്യക്കാരിയൂര്‍ റേഷന്‍ കടയില്‍ ഉപഭോക്താക്കാള്‍ അരി മടക്കിയെത്തിച്ച് വ്യാപാരിയുമായി വാക്കേറ്റത്തിന് വരെ ഇടയായി. താലൂക്കില്‍ ഉപയോഗശൂന്യമായ ടണ്‍ കണക്കിന് അരിയാണ് റേഷന്‍കടകളിലുള്ളത്.

പൂപ്പല്‍ പിടിച്ചതും ദുര്‍ഗന്ധമുള്ളതുമായ അരി വാങ്ങിയവരെല്ലാം റേഷന്‍ കടകളില്‍ തിരികെയെത്തെിച്ചെന്ന് വ്യാപാരികള്‍ പറഞ്ഞു. ഇതോടെ മോശപ്പെട്ട അരി വിതരണം ചെയ്യേണ്ടെന്ന് റേഷന്‍ വ്യാപാരികളുടെ സംഘടന നിര്‍ദ്ദേശം നല്‍കിയതായാണ് അറിയുന്നത്.

അരി തിരിച്ചെടുത്ത് ഗുണനിലവാരമുള്ള അരി എത്തിച്ചുനല്‍കണമെന്ന് റേഷന്‍ വ്യാപാരികള്‍ അധികൃതരോട് ആവശ്യപ്പെട്ടിട്ടുണ്ട്. വിതരണത്തിനുള്ള അരി റേഷന്‍ കടകളില്‍ എത്തിക്കുന്നതിലും കാലതാമസ്സമുണ്ടായിട്ടുണ്ട്. മാസം അവസാനിക്കാന്‍ ഒരാഴ്ചമാത്രമാണ് അവശേഷിക്കുന്നത്. ഇപ്പോഴും പലകടകളിലും അരി എത്തിച്ചുനല്‍കിയിട്ടില്ല.

ഇത്തരം കാര്യങ്ങളില്‍ വേണ്ടുന്ന പരിശോധനയും നടപടിയും സ്വികരിക്കാതെ സിവില്‍ സപ്ലൈസ് ഉദ്യോഗസ്ഥരും ഭക്ഷ്യസുരക്ഷാ വിഭാഗവും വിതരണകരാറുകാര്‍ക്ക് ഒത്താശ നല്‍കുകയാണെന്നും ആക്ഷേപമുണ്ട്.