ഉത്തരേന്ത്യയിവും വിദേശരാജ്യങ്ങളിലും കേള്‍ക്കുന്ന കുട്ടികള്‍ക്ക് നേരെയുള്ള ലൈംഗികാതിക്രമ കഥ നമ്മുടെ കൊച്ചു കേരളത്തില്‍ നിന്നും പുറത്താകുകയാണ്. പന്ത്രണ്ട് വയസ്സുകാരനെ അശ്ലീല വീഡിയോ കാണിച്ച ശേഷം ലൈംഗികമായി പീഡിപ്പിച്ച രണ്ട് യുവതികള്‍ക്കെതിരെ കേസെടുത്തു. കുട്ടിയുടെ മൊഴിയുടെ അടിസ്ഥാനത്തില്‍ പോക്‌സോ നിയമപ്രകാരമാണ് യുവതികള്‍ക്കെതിരെ കേസ് റജിസ്റ്റര്‍ ചെയ്തിരിക്കുന്നത്. പ്രതികളില്‍ ഒരു യുവതി വിവാഹിതയായ വീട്ടമ്മയാണ്.

ഒരാഴ്ച മുമ്പ് തലശേരിക്ക് അടുത്തുള്ള പഞ്ചായത്തിലാണ് കേസിനാസ്ദമായ സംഭവം ഉണ്ടായത്. വീട്ടമ്മയായ യുവതിയും ഇവരുടെ സുഹൃത്തായ മറ്റൊരു യുവതിയും ചേര്‍ന്ന് പന്ത്രണ്ട് വയസ്സുള്ള ആണ്‍കുട്ടിയെ നീലചിത്രം കാണിക്കുകയിയരുന്നു. തുടര്‍ന്ന് കുട്ടിയ ഇരുവരും ചേര്‍ന്ന് കിടപ്പുമുറിയിലേക്ക് കൂട്ടിക്കൊണ്ട് പോയി ശാരീരിക ബന്ധത്തിന് നിര്‍ബന്ധിക്കുകയായിരുന്നു.

വീട്ടില്‍ തിരികെ എത്തിയ കുട്ടിയുടെ സ്വകാര്യ ഭാഗത്ത് വേദന അനുഭവപ്പെട്ടതോടെ വിവരം മാതാപിതാക്കളെ അറിയിക്കുകയായിരുന്നു. തുടര്‍ന്ന് ഇവര്‍ പോലീസ് സ്‌റ്റേഷനിലെത്തി പരാതി നല്‍കി. സംഭവത്തെ കുറിച്ച് വിശദമായി അന്വേഷിച്ചു വരികയാണെന്നും കുട്ടിയില്‍ നിന്നും 164 പ്രകാരം മൊഴി രേഖപ്പെടുത്തുമെന്നും പൊലീസ് വ്യക്തമാക്കി.

കുട്ടികള്‍ക്ക് നേരെയുള്ള ലൈംഗീകാതിക്രമം വളരെ കുറ്റകരമാണ്. രാജ്യത്ത് ശക്തമായ ശിക്ഷാവിധിയാണ് ഇത്തരം കുറ്റങ്ങള്‍ക്കുള്ളത്. പോക്‌സോ നിയമത്തില്‍ ജാമ്യം പോലും കിട്ടാത്ത ശക്തമായ വകുപ്പുകളാണുള്ളത്.

കുട്ടികളെ ലൈംഗികച്ചുവയോടെ സ്പര്‍ശിക്കുന്നത് മൂന്ന് വര്‍ഷം മുതല്‍ അഞ്ച് വര്‍ഷം വരെ തടവ് ലഭിക്കാനുളള കുറ്റകൃത്യമായി കണക്കാക്കും. ഈ കുറ്റം അധ്യാപകര്‍, മതാധ്യാപകര്‍, ഹോസ്പിറ്റര്‍ സ്റ്റാഫുകള്‍, പൊലീസ് ഉദ്യോഗസ്ഥര്‍ തുടങ്ങിയവര്‍ ചെയ്താല്‍ തടവ് ശിക്ഷ 8 വര്‍ഷം വരെയാകാം. ഒരു കുട്ടി പീഡനത്തിനിരയായാല്‍ അവരുടെ രക്ഷിതാക്കള്‍ക്ക് പരാതിയില്ലെങ്കില്‍ മൂന്നാമതൊരാളുടെ പരാതിയുടെ അടിസ്ഥാനത്തില്‍ പ്രതിയെ ചോദ്യം ചെയ്യാവുന്നതും പരാതി നല്‍കാത്ത രക്ഷിതാക്കള്‍ക്കെതിരെ പോക്‌സോ ചുമത്താവുന്നതുമാണ്. വിദ്യാഭ്യാസ സ്ഥാപനങ്ങളില്‍ ഇത്തരം കേസുകള്‍ അധ്യാപകര്‍ മറച്ചുവച്ചാലും സമാനശിക്ഷ ലഭിക്കും.

കേസിന്റെ പ്രാരംഭം മുതല്‍ രഹസ്യസ്വഭാവം സൂക്ഷിക്കുമെന്നതാണ് പോക്‌സോയുടെ മറ്റൊരു പ്രത്യകത. കുട്ടിയുടെ പേരോ, ഫോട്ടോയോ, ദൃശ്യങ്ങളോ, മേല്‍വിലാസമോ പുറത്തുപറയാന്‍ പാടില്ല. അതായത് പൊതുമാധ്യമങ്ങളില്‍ ഇരയെ തിരിച്ചറിയാന്‍ കഴിയുന്ന തരത്തില്‍ ഒരു വാര്‍ത്തയും വരാന്‍ പാടില്ല. കേസില്‍ കൈക്കൊണ്ട നടപടിക്രമങ്ങളെക്കുറിച്ചും പരിചരണത്തെക്കുറിച്ചും ചൈല്‍ഡ് വെല്‍ഫെയര്‍ കമ്മിറ്റിയെയും കോടതിയെയും ബോധ്യപ്പെടുത്തുകയും വേണം.

ഗോവ ചില്‍ഡ്രന്‍സ് ആക്ട് 2003 മാത്രമായിരുന്നു പോക്‌സോ വരുന്നതിന് മുമ്പ് വരെ ഇന്ത്യയില്‍ കുട്ടികള്‍ക്കെതിരായ ലൈംഗിക ചൂഷണത്തിനെതിരായ ശക്തമായ നിയമം. ഐപിസി (1860) 375ബലാത്സംഗം, ഐപിസി (1860) 354 സ്ത്രീകളെ അപമാനിക്കല്‍, ഐപിസി (1860)377 പ്രകൃതിവിരുദ്ധ ലൈംഗികബന്ധം, ഐപിസി (1860)511 കുറ്റകൃത്യം നടത്താനുളള ശ്രമം എന്നിവയായിരുന്നു പോക്‌സോ നിയമം വരുന്നതിന് മുന്‍പുളള ലൈംഗിക കുറ്റകൃത്യങ്ങള്‍ തടയാനുളള മറ്റ് നിയമങ്ങള്‍.

ഇന്ത്യയില്‍ 53ശതമാനം കുട്ടികള്‍ ഏതെങ്കിലും തരത്തിലുളള ലൈംഗിക ചൂഷണത്തിന് ഇരയാകുന്നുണ്ടെന്നാണ് കണക്ക്. ഈ കണക്കുകളിലും വര്‍ധനവ് വന്നതോടെയാണ് ഇന്ത്യയില്‍ പോക്‌സോ നിയമം കൊണ്ടുവരേണ്ടതിന്റെ ആവശ്യകത ഏറിയതും.