കേരളാ കോണ്‍ഗ്രസിലെ അധികാര തര്‍ക്കത്തില്‍ കട്ടപ്പന കോടതി ഇന്ന് പുറപ്പെടുവിച്ചത് ഇരുതലമൂര്‍ച്ഛയുള്ള വാള്‍. തനിക്ക് അനുകൂലമാണ് കോടതി വിധിയെന്ന് പി.ജെ ജോസഫ് മാധ്യമങ്ങളിലൂടെ മേനിപറയുമ്പോഴും, വിധിപ്പകര്‍പ്പ് പരിശോധിച്ചാല്‍ കാര്യങ്ങള്‍ അത്രപന്തിയല്ലെന്ന് വ്യക്തമാകും. പാര്‍ട്ടി ചെയര്‍മാന്‍ മരണപ്പെട്ട സാഹചര്യത്തില്‍ വര്‍ക്കിംഗ് ചെയര്‍മാനായ പി.ജെ ജോസഫിന് ചെയര്‍മാന്റെ അധികാരങ്ങള്‍ നിര്‍വ്വഹിക്കാന്‍ അവകാശമില്ല എന്ന് വിധിയില്‍ വ്യക്തമാക്കുന്നു. വിധിയുടെ 20 ാം പേജില്‍ 31, 32 പാരഗ്രാഫുകളില്‍ ഇക്കാര്യം വ്യക്തമാണ്. ആബ്‌സന്‍സ് ഓഫ് ചെയര്‍മാന്‍ എന്ന കേരള കോണ്‍ഗ്രസ്സ് ഭരണഘടനയില്‍ സൂചിപ്പിക്കുന്നത് ചെയര്‍മാന്‍ മരിച്ചാല്‍ ഉണ്ടാകുന്നത് ഒഴിവല്ല എന്നും താല്‍കാലികമായ അസാനിധ്യം മാത്രമാണെന്നും കൃത്യമായി കോടതി സൂചിപ്പിച്ചിട്ടുണ്ട്. അതിനാല്‍ വിധി ഏകപക്ഷീയമായി തനിക്ക് അനുകൂലമാണെന്ന പി.ജെ ജോസഫിന്റെ വാദം ശരിയല്ല.

 In the Absence of Chairman,  all functions and powers of the Chairman will vest in the  working chairman   എന്ന ഭരണഘടനയിലെ വാദം ഉയര്‍ത്തിയാണ് ചെയര്‍മാന്റെ എല്ലാ അധികാരങ്ങളും തനിക്കാണെന്ന് പി.ജെ ജോസഫ് വാദിച്ചിരിക്കുന്നത്. എന്നാല്‍ ചെയര്‍മാന്റെ മരണം മൂലമുണ്ടാകുന്നത് ആബ്‌സന്‍സ് അല്ലെന്നും അത്തരമൊരു സാഹചര്യത്തില്‍ പുതിയ ചെയര്‍മാനെ തെരെഞ്ഞെടുക്കാതെ എല്ലാ അധികാരങ്ങളും പി.ജെ ജോസഫിന് നിര്‍വഹിക്കാന്‍ ആവില്ലെുമാണ് കോടതി ഇന്ന് പറഞ്ഞിരിക്കുന്നത്. ചെയര്‍മാന്‍ ജീവിച്ചിരിക്കുമ്പോള്‍ യാത്ര, മറ്റ് പരിപാടികള്‍, അസുഖം എന്നീ കാരണങ്ങളാല്‍ ഉണ്ടാകുന്ന അഭാവത്തെ മാത്രമെ ആബ്‌സന്‍സ് (അആടഋചഇഋ ) ആയി കണക്കാക്കാനാവൂ എന്നും കോടതി വ്യക്തമാക്കി. അതിനാല്‍ ജോസ് കെ.മാണി വിഭാഗത്തിന് അനുകൂലമായ കാര്യമാണ് കോടതി പറഞ്ഞിരിക്കുന്നത്. അതേസമയം ജോസ് കെ. മാണിയെ ചെയര്‍മാനായി തെരഞ്ഞെടുത്ത നടപടി തെറ്റാണെന്ന് പറഞ്ഞ് കോടതി സ്‌റ്റേ ചെയ്തിരുന്നു. അതിനെതിരെ നല്‍കിയ അപ്പീലും ഇന്ന് തള്ളി. തെരഞ്ഞെടുപ്പ് നിയമപരമാണെന്ന് തെളിയിക്കാന്‍ ജോസ് കെ. മാണി വിഭാഗത്തിനായില്ല.

കോടതി വിധിയെ തെറ്റായി വ്യാഖ്യാനിച്ചു മാധ്യമങ്ങളിലൂടെ നുണ പ്രചരിപ്പിക്കാനാണ് പി.ജെ ജോസഫ് ശ്രമിക്കുന്നതെന്ന് ജോസ് കെ.മാണി എം.പി ആരോപിച്ചു. ചെയര്‍മാന്റെ അധികാരം തന്നില്‍ നിക്ഷിപ്തമാണ് എന്ന വാദം ഉയര്‍ത്തി പി.ജെ ജോസഫ് എടുത്ത എല്ലാ തീരുമാനങ്ങളെയും അസാധുവാക്കുന്നതും വര്‍ക്കിംഗ് ചെയര്‍മാന്‍ എന്ന നിലയില്‍ ചെയര്‍മാന്റെ അധികാരങ്ങള്‍ പ്രയോഗിക്കാനാവില്ലെന്ന് വ്യക്തമാക്കുന്നതുമാണ് കോടതി വിധി. ചെയര്‍മാന്‍ താനാണെന്ന് കാട്ടിയാണ് പി.ജെ ജോസഫ് തെരഞ്ഞെടുപ്പ് കമ്മീഷനെ സമീപിച്ചത്, അങ്ങനെയാണ് പാലാ ഉപതെരഞ്ഞെടുപ്പില്‍ ഔദ്യോഗിക സ്ഥാനാര്‍ത്ഥിക്ക് രണ്ടില ചിഹ്നം ലഭിക്കാതെ പോയതും ചരിത്രത്തിലെ ആദ്യ തോല്‍വി ഉണ്ടായതും.

അധികാരത്തര്‍ക്കത്തില്‍ ഇരുകൂട്ടരും വടംവലി തുടരുമ്പോള്‍ കട്ടപ്പന കോടതിയുടെ ഇന്നത്തെ വിധി ഏറെ പ്രസക്തമാണ്. പാര്‍ലമെന്റ് തെരഞ്ഞെടുപ്പ് സ്ഥാനാര്‍ത്ഥി നിര്‍ണയം മുതല്‍ കേരളാ കോണ്‍ഗ്രസിനെ പ്രതിസന്ധിയിലാക്കുന്ന കാര്യങ്ങളാണ് പി.ജെ ജോസഫ്. ജോസ് കെ.മാണി വിഭാഗങ്ങളില്‍ നിന്നുണ്ടാകുന്നത്. പാലായില്‍ ഔദ്യോഗിക സ്ഥാനാര്‍ത്ഥിയായ ജോസ് ടോമിനെതിരെ പി. ജെ. ജോസഫ് റിബല്‍ സ്ഥാനാര്‍ത്ഥിയെ നിര്‍ത്തുകയും അവസാനം പിന്‍വലിക്കുകയും ചെയ്തിരുന്നു. തെരഞ്ഞെടുപ്പ് കണ്‍വെന്‍ഷനെത്തിയ പി.ജെ ജോസഫിനെ എതിര്‍പക്ഷം കൂവി വിളിച്ചിരുന്നു. അങ്ങനെ പരസ്പ്പരം പോരടിച്ച് കേരളാ കോണ്‍ഗ്രസുകാര്‍ പാര്‍ട്ടി ചെയര്‍മാനായിരുന്ന കെ.എം മാണിയുടെ തട്ടകത്തില്‍ തോല്‍വി ഇരന്ന് വാങ്ങുകയായിരുന്നു.