ചാത്തന്നൂരിനടുത്ത് ചിറക്കര പഞ്ചായത്തിലെ ഉളിയനാട് തേമ്പ്ര മണ്ഡപം കുന്നില്‍ നാല് കുടുംബത്തിലുള്ളവര്‍ മഴക്കാലത്ത് മണ്ണിടിച്ചില്‍ ് ഭീതിയുമായാണ് കഴിയുന്നത്. ഏത് സമയത്തും ഇടിഞ്ഞു വീഴാന്‍ സാധ്യതയുള്ള തരത്തില്‍ അപകടാവസ്ഥയിലായ ഒരു കുന്നിന് താഴെയാണ് ദിനേശന്‍, വിനോദ് ,രമണന്‍, പ്രസന്നന്‍ എന്നിവരുടെ വീട്. മുന്‍വര്‍ഷത്തില്‍ കുന്നിടിഞ്ഞതിനെ തുടര്‍ന്ന് ഇവരെ ദുരിതാശ്വാസ കേന്ദ്രത്തിലേയ്ക്ക് മാറ്റിയിരുന്നു.

കഴിഞ്ഞ ഏപ്രില്‍ മാസം ദുരന്തനിവാരണ അതോറിറ്റി ചെയര്‍മാനായ ജില്ലാ കളക്ടര്‍ അപകടകരമായ നിലയിലുള്ള കുന്ന് ഇടിച്ചു മാറ്റാന്‍ ഉത്തരവ് നല്കിയിരുന്നു.ജിയോളജി വകുപ്പ് ചെറിയ തോതില്‍ മണ്ണ് ഇടിച്ചു മാറ്റാന്‍ പാസ് നല്‍കിയിരുന്നു. ഒരു വീടിന്റെ കുറച്ചു ഭാഗത്തു നിന്നും മണ്ണ് മാറ്റുന്നതിനാണ് പാസ് നല്‍കിയത്.

കഴിഞ്ഞ വര്‍ഷത്തെ പ്രളയത്തില്‍ കുന്നിടിഞ്ഞു വീണ് ഇവരുടെ വീടുകള്‍ക്ക് കേട് പാട് സംഭവിച്ചിരുന്നു. ഭിത്തികള്‍ തകര്‍ന്ന വീടുകളില്‍ നിന്നും കുടുംബാംഗങ്ങള്‍ തലനാരിഴയ്ക്കാണ് രക്ഷപ്പെട്ടത്. ചിറക്കര പഞ്ചായത്തിന്റെ ദുരിതാശ്വാസ ക്യാമ്പിലേയ്ക്ക് ഇവരെ മാറ്റി പാര്‍പ്പിക്കുകയും ചെയ്തു. തുടര്‍ന്ന് റവന്യൂ അധികൃതരും ഗ്രാമ പഞ്ചായത്തും പരിശോധന നടത്തി മണ്ണ് നീക്കം ചെയ്യണമെന്ന് റിപ്പോര്‍ട്ട് നല്കി. തുടര്‍ന്നാണ് കളക്ടര്‍ ഇടപെട്ട് എത്രയും പെട്ടെന്ന് മണ്ണ് നീക്കം ചെയ്യാന്‍ ഉത്തരവിട്ടത്. ആദ്യം ജിയോളജി വകുപ്പ് കുറച്ച് മണ്ണ് നീക്കം ചെയ്യാന്‍ അനുമതി നല്‍കിയെങ്കിലും പിന്നീട് അനുമതി നല്‍കിയില്ല.

മഴ ശക്തമായതോടെ മണ്ണിടിഞ്ഞ് തുടങ്ങി. മണ്‍കൂനനീക്കം ചെയ്ത് ഈ കുടുംബങ്ങള്‍ക്ക് സുരക്ഷിതത്വം ഉറപ്പാക്കണമെന്നാവശ്യപ്പെട്ട് സേഫ് കൊല്ലം പ്രവര്‍ത്തനായ കെ.പി.ഹരികൃഷ്ണന്‍ ജില്ലാ കളക്ടര്‍ക്ക് നിവേദനം നല്‍കി. ഇതേക്കുറിച്ച് അന്വേഷിച്ച് നടപടി എടുക്കാന്‍ ജില്ലാ കളക്ടര്‍ ദുരന്തനിവാരണ അതോറിറ്റിയ്ക്ക് ഉത്തരവ് നല്കി.