കോട്ടയത്തെ ജനറല്‍ ആശുപത്രിയ്ക്കു മുകളില്‍ മരം വീണു അഞ്ചു പേര്‍ക്ക് പരിക്കേറ്റു. ഇവര്‍ അത്യാഹിത വിഭാഗത്തില്‍ ചികിത്സയിലാണ്. ഇന്നലെ രാത്രിയില്‍ ഉണ്ടായ അപകടത്തില്‍ പാക്കില്‍ കാരുണ്യ ഭവനില്‍ കരുണാകരന്‍ (68), കഞ്ഞിക്കുഴ അലീന നിവാസില്‍ ഓമന (49), അയ്മനം ചിറയില്‍ തന്പി (43), ഭാര്യ ബിന്ദു (40), തോട്ടയ്ക്കാട് സ്വദേശിനി സരസമ്മ (65) എന്നിവര്‍ക്കാണ് പരിക്കേറ്റത്.

ആശുപത്രിയിലെ പതിനൊന്നാം വാര്‍ഡിനു സമീപം നിന്നിരുന്ന കൂറ്റന്‍മരം മറിഞ്ഞു ഷീറ്റു മേഞ്ഞ കെട്ടിടത്തിന്റെ മുകളിലേക്കു പതിക്കുകയായിരുന്നു. മേല്‍ക്കൂരയിലെ ഷീറ്റും സിലിംഗും തകര്‍ന്നു വീണാണ് എല്ലാവര്‍ക്കും പരിക്കേറ്റത്. കരുണാകരന്‍ ആശുപത്രിയില്‍ ചികിത്സയില്‍ കഴിയുകയായിരുന്നു. മറ്റുള്ളവര്‍ രോഗികളുടെ കൂട്ടിരിപ്പുകാരായിരുന്നു.

വലിയ ശബ്ദത്തോടെ മരം കെട്ടിടത്തിനു മുകളിലേക്കു വീണതോടെ രോഗികളും കൂട്ടിരിപ്പുകാരും ഉള്‍പ്പെടെയുള്ളവര്‍ ഭയന്ന് നിലവിളിച്ചുകൊണ്ട് പുറത്തേക്ക് ഓടി. കിടപ്പു രോഗികളായിരുന്ന ചിലര്‍ ഭയന്നു കട്ടിലില്‍ നിന്നും നിലത്തു വീഴുകയുമുണ്ടായി. ഒടിഞ്ഞുവീണ മരം മേല്‍ക്കൂരയില്‍ തട്ടി നിന്നതിനാലാണ് വന്‍ദുരന്തം ഒഴിവായത്.

ഇവിടെ കഴിഞ്ഞിരുന്ന രോഗികളെ മറ്റു വാര്‍ഡുകളിലേക്കു മാറ്റി. കുറച്ചുസമയത്തിനുശേഷം ഫയര്‍ഫോഴ്‌സ് ഉദ്യോസ്ഥര്‍ എത്തി മരം മുറിച്ചുനീക്കി. ജില്ലാ പഞ്ചായത്ത് പ്രസിഡന്റ് സെബാസ്റ്റ്യന്‍ കുളത്തുങ്കല്‍ ഉള്‍പ്പെടെയുള്ളവര്‍ രാവിലെ സ്ഥലം സന്ദര്‍ശിച്ചശേഷമായിരിക്കും തുടര്‍ നടപടികള്‍ സ്വീകരിക്കുകയെന്ന് ജനറല്‍ ആശുപത്രി അധികൃതര്‍ അറിയിച്ചു.