ഒളരി ഗവ.യുപി സ്‌കൂള്‍ പരിസരം വൃത്തിയാക്കിക്കൊണ്ടിരിക്കെ സ്‌കൂളിലേക്ക് അണലി പാഞ്ഞുകയറി. വിദ്യാര്‍ഥികളും അധ്യാപകരും കണ്ടതിനാല്‍ ഇതിനെ ഉടനെ തന്നെ പിടികൂടാന്‍ കഴിഞ്ഞു. എഇഒ ഓഫിസ് കൂടി പ്രവര്‍ത്തിക്കുന്ന ഈ സ്‌കൂളില്‍ കുട്ടികള്‍ ഉച്ചയ്ക്കു മുറ്റത്തു കളിച്ചുകൊണ്ടിരിക്കെയാണു പാമ്പു കയറിയത്. വനം വകുപ്പ് ജീവനക്കാരനാണ് 4 അടി നീളമുള്ള വമ്പന്‍ അണലിയെ പിടികൂടിയത്.

പാമ്പു കയറിയത് അധ്യാപകരുടെ ബാഗും പാഠപുസ്തകങ്ങളും സൂക്ഷിക്കുന്ന മുറിയിലേക്കാണ്. അവിടത്തെ ഷെല്‍ഫില്‍നിന്നു പാമ്പിനെ പിടികൂടി. ക്ലാസുകളോടു ചേര്‍ന്ന മുറിയാണിത്. വിദ്യാര്‍ഥികളെ മറ്റൊരു കെട്ടിടത്തിലേക്കു മാറ്റി. തൊഴിലുറപ്പു പദ്ധതിപ്രകാരം സ്‌കൂളില്‍ ശുചീകരണം നടത്തുന്ന തൊഴിലാളികള്‍ ഉച്ചയ്ക്കു പണിനിര്‍ത്തി പിരിഞ്ഞ ശേഷമാണ് പാമ്പിനെ കണ്ടത്. 5, 6, 7 ക്ലാസുകളിലെ ഓരോ ഡിവിഷനുകളാണു പാമ്പുകയറിയ കെട്ടിടത്തില്‍ പ്രവര്‍ത്തിക്കുന്നത്.

സ്‌കൂള്‍ കെട്ടിടത്തില്‍ പ്രവര്‍ത്തിക്കുന്ന തൃശൂര്‍ വെസ്റ്റ് എഇഒ ഓഫിസില്‍ നിന്നാണ് സഹായം ആവശ്യപ്പെട്ടു പറവട്ടാനി വനംവകുപ്പ് ഓഫിസിലേക്കു വിളിച്ചത്. സ്‌പെഷല്‍ പ്രൊട്ടക്ഷന്‍ സ്‌ക്വാഡിലെ വൈല്‍ഡ് ലൈഫ് റെസ്‌ക്യൂവര്‍ ജോജു മുക്കാട്ടുകരയാണു പാമ്പിനെ പിടികൂടിയത്. ഇതിനെ വനമേഖലയില്‍ തുറന്നുവിടും.

എല്‍പി, യുപി വിഭാഗങ്ങളിലായി 209 കുട്ടികള്‍ പഠിക്കുന്ന സ്‌കൂളാണിത്. കടുത്ത ചൂടുള്ള സമയവും പാമ്പുകള്‍ ഇണചേരുന്ന കാലവുമായതിനാല്‍ കൂടുതല്‍ ജാഗ്രത പാലിക്കണമെന്നു ജോജു പറഞ്ഞു. അധ്യാപകര്‍ക്കും സമീപത്തെ തൊഴിലാളികള്‍ക്കും ബോധവത്കരണ സന്ദേശം നല്‍കി.