അമ്മമ്മേ ഓടിവാ, എന്നെ കൊല്ലാന്‍ പോകുന്നേ എന്ന അഷികയുടെ നിലിവിളി അപ്പൂപ്പന്റെയും അമ്മൂമ്മയുടെയും കാതുകളില്‍ ഇപ്പോഴും മുഴങ്ങുന്നു. കൊച്ചുമകളെ കഴുത്തറുത്ത് നിലയില്‍ കണ്ട അവര്‍ വാവിട്ട് നിലവിളിക്കുകയാണ്. എല്ലാം കഴിഞ്ഞത് ഒരു നിമിഷം കൊണ്ട്. തിരുവനന്തപുരത്തെ കാരക്കോണത്ത് പത്തൊന്‍പതുകാരിയെ കാമുകന്‍ വീട്ടില്‍ കടന്നുകയറി കഴുത്തറുത്ത് കൊലപ്പെടുത്തിയശേഷം സ്വയം കഴുത്തറുത്ത് ജീവനൊടുക്കിയ സംഭവം ഞെട്ടലോടെയാണ് നാട്ടുകാര്‍ കേട്ടത്.

കാരക്കോണം സി.എസ്.ഐ മെഡിക്കല്‍ കോളേജിനു സമീപം തുറ്റിയോടാണ് നാടിനെ ഞെട്ടിച്ച സംഭവം നടന്നത്. തുറ്റിയോട് അപ്പുവിലാസം വീട്ടില്‍ അജിത്കുമാറിന്റെയും സീമയുടെയും മകള്‍ അഷിതയും (അമ്മു) വിളവംകോട് രാമവര്‍മ്മന്‍ചിറ ചെറുകുഴന്തല്‍കാല്‍ വീട്ടില്‍ മണിയുടെയും രമണിയുടെയും മകന്‍ അനുവുമാണ് (24) മരിച്ചത്. ഇന്നലെ രാവിലെ ഒന്‍പതരയോടെ അനു അഷിതയുടെ വീട്ടിലേക്കു ഓടിക്കയറുകയായിരുന്നു. അഷികയുടെ അപ്പൂപ്പന്‍ അപ്പുവാസു (ചെല്ലപ്പന്‍) വീടിന്റെ മുറ്റത്തും അമ്മൂമ്മ ബേബി തുണിവിരിക്കാനായി ടെറസിലുമായിരുന്നു അപ്പോള്‍.

അപ്പൂപ്പനെ തള്ളിമാറ്റിയ അനു അഷികയുടെ മുറിയിലേക്ക് കയറി കതകടച്ചു. 'അമ്മമ്മേ ഓടിവാ, എന്നെ കൊല്ലാന്‍ പോകുന്നേ' എന്ന് അഷിക നിലവിളിച്ചു. ഇതിനിടയില്‍ അനു കൈയില്‍ കരുതിയിരുന്ന കത്തിയെടുത്ത് അഷിതയുടെ കഴുത്ത് മുറിക്കുകയായിരുന്നു. തുടര്‍ന്ന് അഷിതയെ കട്ടിലില്‍ തള്ളിയിട്ട ശേഷം അനു സ്വയം കഴുത്ത് മുറിച്ചു. വാതില്‍ തുറന്നു നോക്കുമ്പോള്‍ ഇരുവരുടേയും കഴുത്തറത്ത നിലയിലാണ് നാട്ടുകാര്‍ കണ്ടത്. രണ്ടു പേരേയും കാരക്കോണം ആശുപത്രിയിലേക്കു ഉടന്‍ തന്നെ കൊണ്ടു പോയി.

അഷിക ആശുപത്രിയിലെത്തും മുന്‍പു തന്നെ മരിച്ചു. അനു ആശുപത്രിയിലാണ് മരിച്ചത്. മൃതദേഹങ്ങള്‍ മെഡിക്കല്‍ കോളേജ് മോര്‍ച്ചറിയിലാണ്. ഇന്ന് രാവിലെ പോസ്റ്റമോര്‍ട്ടത്തിനു ശേഷം ബന്ധുക്കള്‍ക്ക് വിട്ടുകൊടുക്കും. വെള്ളറട പൊലീസ് കേസെടുത്തു. അനു ലഹരി ഉപയോഗിക്കുമായിരുന്നെന്ന് പൊലീസ് പറഞ്ഞു. ഇരുവരുംവളരെക്കാലമായി പ്രണയത്തിലായിരുന്നെങ്കിലും അഷിക അടുത്തിടെ അടുപ്പം ഉപേക്ഷിച്ചിരുന്നെന്നാണ് ബന്ധുക്കള്‍ പറയുന്നത്.