താരരാജാവ് മോഹൻലാലിനെതിരെ രൂക്ഷ വിമർശനവുമായി പ്രശസ്ത ഗായകൻ വിടി മുരളി. നടൻ മോഹൻലാൽ അവതാരകനായി എത്തുന്ന ബിഗ് ബോസ് ഏഷ്യാനെറ്റിലെ ഏറെ ജനപ്രിയമായ പരിപാടിയാണ്. ബിഗ് ബോസിന്റെ രണ്ടാം സീസണുമായി ബന്ധപ്പെട്ടാണ് മോഹൻലാലിനെതിരെ കടുത്ത ആരോപണവുമായി ഗായകൻ രംഗത്ത് എത്തിയിരിക്കുന്നത്.

ബിഗ്‌ബോസ് പരിപാടിക്കിടെ താന്‍ പാടിയതാണെന്ന് നടന്‍ മോഹന്‍ലാല്‍ അവകാശപ്പെടുന്ന പാട്ട് എന്റെതാണെന്ന് ഗായകന്‍ വിടി മുരളി അവകാശപ്പെടുന്നു. പരിപാടിക്കിടെ പ്രശസ്തമായ മാതള തേനുണ്ണാന്‍ എന്ന പാട്ട് ആരാണ് പാടിയതെന്ന് അറിയാമോയെന്ന് ധര്‍മ്മജനോട് മോഹന്‍ലാല്‍ ചോദിക്കുന്നു. ഇല്ലെന്ന് ധര്‍മ്മജന്‍ പറഞ്ഞപ്പോള്‍ ഇത് ‘ചന്ദ്രകുമാര്‍ സംവിധാനം ചെയ്ത ”ഉയരും ഞാന്‍ നാടാകെ ‘ എന്ന സിനിമയ്ക്ക് വേണ്ടി ഞാന്‍ പാടിയതാണീ പാട്ട് എന്നായിരുന്നു മോഹന്‍ലാലിന്റെ മറുപടി. ഈ പാട്ട് യഥാർത്ഥത്തിൽ താനാണ് പാടിയത് എന്ന് ചൂണ്ടിക്കാട്ടിയാണ് വിടി മുരളി മോഹൻലാലിനെതിരെ രംഗത്ത് വന്നിരിക്കുന്നത്.

ഏഷ്യാനെറ്റ് അവതരിപ്പിക്കുന്ന ബിഗ് ബോസ് എന്ന പരിപാടി ഞാൻ കാണാറില്ലന്നും രാത്രി ആ പരിപാടി സംപ്രേക്ഷണം ചെയ്ത ശേഷം എന്നെ കുറെ പേർ വിളിച്ചു. ബിഗ് ബോസ് കണ്ടില്ലെ എന്ന് ചോദിച്ചു. ഇല്ല എന്ന് ഞാൻ പറഞ്ഞു. എന്താണ് കാര്യം എന്ന് തുടർന്ന് ചോദിച്ചപ്പോൾ അവർ പറഞ്ഞ കാര്യങ്ങൾ എനിക്ക് വിശ്വസിക്കാൻ കഴിഞ്ഞില്ല. ഇന്ന് ആ പരിപാടിയുടെ പുന: സംപ്രേക്ഷണം എത്ര മണിക്കാണെന്നന്വേഷിച്ച് ഇന്ന് ഞാൻ കണ്ടു എന്നും തുടർന്ന് തനിക്ക് അത് വിശ്വസിക്കാൻ കഴിഞ്ഞില്ലെന്നും അദ്ദേഹം ഫേസ്ബുക്കിൽ കുറിച്ചു.

വിഷയത്തിൽ മോഹൻലാലിനെതിരെ കൂടുതൽ പേര് രംഗത്തെത്തി. പി. ചന്ദ്രകുമാർ സംവിധാനം ചെയ്ത് മോഹൻലാൽ അഭിനയിച്ച് 1985ൽ പുറത്തിറങ്ങിയ ചിത്രമാണ് ‘ഉയരും ഞാൻ നാടാകെ’. ഇതിലെ ഏറെ ശ്രദ്ധിക്കപ്പെട്ട ഗാനമാണ് ‘മാതളത്തേനുണ്ണാൻ…’ ഒ.എൻ.വി. കുറുപ്പ് രചിച്ച് കെ.പി.എൻ. പിള്ള സംഗീതം പകർന്ന ഗാനം വി.ടി. മുരളിയാണ് ആലപിച്ചത്. ‘ഓത്തുപള്ളീലന്നു നമ്മൾ പോയിരുന്ന കാലം…’ എന്ന ഹിറ്റ് ഗാനത്തിലൂടെ പ്രശസ്തനാണ് വടകര സ്വദേശിയായ മുരളി.

മികച്ച പ്രേക്ഷക സ്വീകാര്യതയാണ് മോഹൻ ലാൽ അവതാരകനായി എത്തുന്ന ബിഗ്ബോസ് സീസൺ 2 ന് ലഭിക്കുന്നത്. കഴിഞ്ഞ സീസണിലേക്കാലും ഏറെ പുതുമയോടെയാണ് ഇക്കുറി ഷോ ആരംഭിച്ചിരിക്കുന്നത്. അംഗങ്ങളുടെ തിരഞ്ഞെടുപ്പിലായാലും ടാസ്ക്കുകളുടെ ക്രമീകരണത്തിലായാലും ഇത് മുഴച്ച് നിൽക്കുന്നുമുണ്ട്. ഷോ ആരംഭിച്ച് ഒരാഴ്ച പൂർത്തിയായിരിക്കുകയാണ്. വലിയ പൊട്ടലും ചീറ്റലുമില്ലാതെ സമാധനത്തോടെയായിരുന്നു കഴിഞ്ഞ ഒരാഴ്ച പോയത്. പതിവ് പോലെ വാരാന്ത്യത്തിൽ മോഹൻലാൽ ബിഗ് ബോസ് അംഗങ്ങളെ കാണാൻ എത്തിയിരുന്നു. പോയ ഒരാഴ്ചയിലെ അംഗങ്ങളുടെ പ്രശ്നങ്ങളെ കുറിച്ചും അഭിപ്രായഭിന്നതകളെ കുറിച്ചും മോഹൻലാൽ ചോദിച്ചിരുന്നു. തുടർന്ന് പ്രശ്നപരിഹാര ശ്രമങ്ങൾ നടത്തുകയും ചെയ്തു. കൂടാതെ അംഗങ്ങൾക്ക് ഒരു ശക്തമായ മുന്നറിയിപ്പും നിർദ്ദേശവും നൽകുൂകയും ചെയ്തു. ബിഗ് ബേസിൽ ചില നിയമങ്ങളുണ്ട് അത് പാലിക്കാൻ അംഗങ്ങളെല്ലാം ബാധ്യസ്ഥരാണെന്ന് ഷോ ആരംഭിച്ച ദിവസവും പിന്നീട് ധർമജൻ എത്തിയ എപ്പോസിഡിലും ലാലേട്ടൻ പറഞ്ഞിരുന്നു. അത് വീണ്ടും ഓർമിപ്പിച്ചു കൊണ്ടുളള ഒരു മുന്നറിയിപ്പായിരുന്നു താരം നൽകിയത്.