2012 ൽ യു ഡി എഫ് സർക്കാർ നടപ്പിലാക്കാൻ ശ്രമിച്ച നൈറ്റ് ലൈഫ് സോൺ പദ്ധതിപിണറായി വിജയൻ സർക്കാർ പൊടിതട്ടിയെടുത്ത് നടപ്പിലാക്കുന്നു. ഉമ്മൻ ചാണ്ടി സർക്കാർ വേളി ടൂറിസ്റ്റ് വില്ലേജിനോട് ചേർന്ന പതിനെട്ട് ഏക്കർ സ്ഥലത്താണ് കാബറേ തീയേറ്റർ ഉൾപ്പെടെ നടപ്പിലാക്കാൻ ആലോചിച്ചിരുന്നതെങ്കിൽ പിണറായി തിരുവനന്തപുരം ,കോഴിക്കോട്, എറണാകുളം, തൃശൂർ ജില്ലകളിൽ സമാനമായ രീതിയിൽ നിശാക്ലബുണ്ടാക്കുന്നു.

ആർ ബാലകൃഷ്ണപിള്ളയുടെ മരുമകനും ഇൻകെൽ എം ഡിയുമായ ടി. ബാലകൃഷ്ണനോടാണ് സർക്കാർ ഇത് സംബന്ധിച്ച കൂടുതൽ നടപടികൾ സ്വീകരിക്കാൻ ആവശ്യപ്പെട്ടിരിക്കുന്നത്. യു ഡി എഫ് സർക്കാർ രൂപം നൽകിയ നിശാക്ലബിൽ കാബറേ തീയേറ്റർ,ഡിസ്കോ തെക്ക്, മദ്യശാല എന്നിവ ഉണ്ടായിരുന്നെങ്കിൽ താത്കാലിക വിശ്രമത്തിനായി ഹോട്ടൽ സമുച്ചയത്തിന്റെ സാധ്യതകൾ കൂടി പരിശോധിക്കാൻ സർക്കാർ ആവശ്യപ്പെട്ടതായാണ് വിവരം. ഇൻകെലാണ് വേളി ടൂറിസ്റ്റ് വില്ലേജിലെ നിശാക്ലബിന് രൂപം നൽകിയത്.

200 കോടിയുടെ പദ്ധതിക്കാണ് അന്നത്തെ സർക്കാർ രൂപം നൽകിയതെങ്കിൽ തുക ഇരട്ടിയായാലും സാരമില്ലെന്ന മട്ടിലാണ് പിണറായി സർക്കാർ നീങ്ങുന്നത്. കേരളത്തിലെ നഗരങ്ങൾ ബംഗ്ലൂരിന് സമാനമാക്കാനാണ് സർക്കാരിന്റെ ലക്ഷ്യം. ബാംഗ്ലൂരിൽ ഐ. ടി. സ്ഥാപനങ്ങൾ വളർന്നത് നിശാ ക്ലബിന്റെ സഹായത്തോടെയാണെന്നാണ് സർക്കാരിന്റെ കണ്ടെത്തൽ. ഇൻകൽ ഇക്കാര്യം ആദ്യം ശരിവച്ചു.

ഇടതു സർക്കാർ അധികാരത്തിലെത്തിയപ്പോൾ തന്നെ നിശാക്ലബിന്റെ പ്രൊപ്പോസൽ തപ്പിയെടുത്തിരുന്നു. ഇൻകൽ എം ഡി ഇടതു പാളയത്തിനും പ്രിയങ്കരനാണ്. എം ഡിയുടെ അമ്മാവൻ ആർ. ബാലകൃഷ്ണപിള്ള ഇടതു മുന്നണിയുടെ ഭാഗമാണ്.

കേരളത്തിൽ നിശാക്ലബുകൾ ആരംഭിക്കുന്ന കാര്യം മുഖ്യമന്ത്രിയും സമ്മതിച്ചിട്ടുണ്ട്. നാം മുന്നോട്ട് എന്ന ടെലിവിഷൻ പരിപാടിയിലാണ് ഇക്കാര്യം അദ്ദേഹം വ്യക്തമാക്കിയത്. സ്ഥലം കണ്ടെത്താനുള്ള നടപടികൾ ജില്ലാ കളക്ടർമാർ ആരംഭിച്ചതായി അദ്ദേഹം അറിയിച്ചിട്ടുണ്ട് രാത്രി വൈകി ജോലി ചെയ്യുന്നവർക്കായി സംസ്ഥാനത്ത് പബ്ബുകൾ ആരംഭിക്കുമെന്ന് അദ്ദേഹം നേരത്തെ അറിയിച്ചിരുന്നു. കേരളത്തിലെ പല സ്ഥലങ്ങളും നിശാക്ലബിന് യോജിച്ചതാണെന്നും അദ്ദേഹം പറഞ്ഞു.

മുഖ്യമന്ത്രിയുടെ മകൾ ബാംഗ്ലൂരിൽ ഐ. ടി. മേഖലയിലാണ് ജോലി ചെയ്യുന്നത്.മുഖ്യമന്ത്രി ബാംഗ്ലൂർ സന്ദർശിക്കുന്നതും സാധാരണമാണ്. അതേ മാതൃക തന്നെയായിരിക്കും ഇവിടെയും പിന്തുടരുക. തിരുവനന്തപുരത്തെ ടെക്നോ പാർക്ക് നിശാ ക്ലബിന് വേണ്ടി പരിഗണനയിലാണെന്നും മുഖ്യമന്ത്രി പറഞ്ഞു.

സർക്കാർ നല്ല ചിന്തയോടെ ആരംഭിക്കുന്ന ഇത്തരം നിശാകേന്ദ്രങ്ങൾ കേരളത്തെ ബാംഗ്ലൂരാക്കുമെന്ന സംശയം തള്ളികളയാൻ കഴിയില്ല. കാരണം റസ്റ്റാറന്റുകൾ ആരംഭിക്കുന്നതിന് പകരം സർക്കാർ ലക്ഷ്യമിടുന്നത് കാബറേ സെന്ററുകളാണ്. മുമ്പ് വിവാദമായതിനെ തുടർന്നാണ് ഉമ്മൻ ചാണ്ടി അത് വേണ്ടെന്ന് വച്ചത്. ബാംഗ്ലൂരിലെ ഇത്തരം കേന്ദ്രങ്ങൾ മയക്കുമരുന്നിന് പേരുകേട്ടവയാണ്.