ഇ.കെ. നായനാരുടെ സ്വപ്നപദ്ധതി പിണറായി അട്ടിമറിച്ചു. അങ്ങനെ ശബരിപാത വിസ്മൃതിയിലായി. നായനാരുടെ ആഗ്രഹം അദ്ദേഹത്തിന്റെ മന്ത്രിസഭയിൽ അംഗമായിരുന്ന പിണറായി തന്നെയാണ് അട്ടിമറിച്ചത്. ശബരിപാത റയിൽ പദ്ധതി സംസ്ഥാന സർക്കാർ അട്ടിമറിച്ചതിനെതിരെ വിവിധ സംസ്ഥാനങ്ങളിൽ പ്രചരണം നടത്തുന്നതിന്റെ സാധ്യതയെ കുറിച്ച് ബിജെപി കേന്ദ്ര നേതൃത്വം ആലോചിച്ച് തുടങ്ങി..

ഇടത് - വലത് സർക്കാരുകൾ ചേർന്നാണ് അങ്കമാലിയിൽ നിന്നും ശബരി മലയിൽ നിഷ്പ്രയാസം എത്തിച്ചേരാവുന്ന പദ്ധതി അട്ടിമറിച്ചത് എന്നാണ് ആക്ഷേപം. 111 കിലോമീറ്ററാണ് ശബരി റയിൽ പദ്ധതിക്ക് ഉണ്ടായിരുന്നത്. വിവിധ സംസ്ഥാനങ്ങളിൽ നിന്ന് കേരളത്തിലെത്തുന്ന അയ്യപ്പഭക്തർ ഏറെ ത്യാഗം സഹിച്ചാണ് ഇപ്പോൾ സന്നിധാനത്ത് എത്തുന്നത്. കോട്ടയത്തും ചെങ്ങന്നൂരും എത്തുന്ന ഭക്തർക്ക് ബസോ കാറോ മാത്രമാണ് ശബരി മലയിൽ എത്താൻ ആശ്രയം. ശബരിമലയിലേക്ക് ഒരു തീവണ്ടി ഭക്‌തരുടെ വർഷങ്ങളായുള്ള ആഗ്രഹമായിരുന്നു.

പദധതിയുടെ പകുതി ചെലവ് കേരളം വഹിക്കാൻ തയ്യാറായിരുന്നെങ്കിൽ പദ്ധതി നടപ്പിലാക്കുമായിരുന്നു. കേന്ദ്ര സർക്കാർ പൂർണമായി പദ്ധതിക്ക് അനുകൂലമായാണ് നിലകൊണ്ടത്. ചെലവിന്റെ 50 ശതമാനം വഹിക്കണമെന്ന് ആവശ്യപ്പെട്ട് നരേന്ദ്ര മോദി സർക്കാർ പലവട്ടം കേരളത്തിന് കത്തെഴുതി. എന്നാൽ ഡൽഹിയിൽ ചെയ്യുമ്പോഴെല്ലാം പദധതിയെ കുറിച്ച് പറയുന്ന മുഖ്യമന്ത്രി പക്ഷേ കത്തിന് മറുപടി നൽകാൻ തയ്യാറായില്ല.

കോൺഗ്രസ് സർക്കാരാണ് ശബരി പദ്ധതി പ്രഖ്യാപിച്ചത്. 1997-98ലെ റയിൽ ബജറ്റിലായിരുന്നു പ്രഖ്യാപനം. നിതീഷ് കുമാറായിരുന്നു റയിൽ മന്ത്രി. പി. ചിദംബരം കേന്ദ്ര ധനമന്ത്രിയും. ഇ.കെ. നായനാർ സർക്കാരിന്റെ ആവശ്യം കണക്കിലെടുത്താണ് ശബരി പദധതി റയിൽ ബജറ്റിൽ പ്രഖ്യാപിച്ചത്. പിണറായി വിജയൻ നായനാർ മന്ത്രിസഭയിൽ വൈദ്യുതി മന്ത്രിയായിരുന്നു.

550 കോടിയാണ് അന്ന് ചെലവ് പ്രതീക്ഷിച്ചത്. അങ്കമാലി- കാലടി, കാലടി- പെരുമ്പാവൂർ റയിൽ നിർമ്മാണ പ്രവർത്തനങ്ങൾ മുന്നോട്ടു പോയെങ്കിലും ഭൂമി ഏറ്റെടുക്കുന്നതിനെതിരെ അതിശക്തമായ പ്രക്ഷോഭം ഉയർന്നു. ചിലർ കോടതിയെ സമീപിച്ചു. അതോടെ നായനാർക്ക് ശേഷം വന്ന ആന്റണി സർക്കാർ പദധതിയിൽ നിന്നും പിന്നോട്ട് പോയി. എന്നാൽ കേന്ദ്രത്തിലെത്തിയ വാജ്പേയ് സർക്കാർ പദ്ധതി നടപ്പിലാക്കാൻ ശ്രമം തുടർന്നു. ഒ.രാജഗോപാൽ, പി - സി. തോമസ് തുടങ്ങിയ മലയാളി മന്ത്രിമാർ ഇതിനായി കരുക്കൾ നീക്കിയെങ്കിലും കേരളത്തിന്റെ നിസഹരണം കാരണം മുന്നോട്ടു പോയില്ല.

2011 ൽ 550 കോടി 1566 കോടിയായും 2017 ൽ 2815 കോടിയായും വർധിച്ചതോടെ കേരളസർക്കാർ തടിയൂരി. 512 ശതമാനമാണ് പദ്ധതി ചെലവ് വർധിച്ചത്.ഇത് ഒറ്റയ്ക്ക് വഹിക്കാനാവില്ലെന്ന് കേന്ദ്രം അറിയിച്ചു. 2015 ൽ പദധതിയുടെ പകുതി വഹിക്കുമെന്ന് ഉമ്മൻ ചാണ്ടി കരാർ ഉണ്ടാക്കിയെങ്കിലും 2016 ൽ പിണറായി കാലുമാറി.
പമ്പക്ക് സമീപം വിമാനത്താവളം വേണമെന്ന് പറയുന്ന സർക്കാർ തട്ടുന്നത് വെറും വാചകങ്ങൾ മാത്രമാണെന്നാണ് കേന്ദ്രം പറയുന്നത്. ഇതര സംസ്ഥാനങ്ങളിൽ നിന്നെത്തുന്ന ഭക്തരിൽ നിന്നും കിട്ടുന്ന പണമാണ് കേരളത്തിൽ ലോഭമില്ലാതെ ചെലവാക്കുന്നത്. എന്നിട്ടാണ് അവരെ അവഗണിക്കുന്നത്.