ഐ. ടി. മേഖലയിൽ ജോലി ചെയ്യുന്നവർ മദ്യപരാണെന്ന് എക്സൈസ് മന്ത്രി ടി.പി. രാമകൃഷ്ണൻ. ഐ.ടി മേഖലയോട് ഇത്രയധികം കൂറു പുലർത്തുന്ന സർക്കാർ തങ്ങളെ പോലെ മറ്റൊന്നില്ലെന്ന് പിണറായി സർക്കാർ അങ്ങനെ വ്യക്തമാക്കിയിരിക്കുന്നു.

ബാറുകൾ നിലനിർത്തിയത് എന്തിനാണെന്ന് വിശദീകരിക്കുകയായിരുന്നു മന്ത്രി. തന്റെ സർക്കാർ കുടിയൻ മാരെ പ്രോത്സാഹിപ്പിക്കുന്നില്ലെങ്കിലും കുടിയൻമാരെ അവഗണിക്കാൻ തയാറല്ല. അവർക്ക് റിലാക്സ് ചെയ്യാനുള്ള അവസരം നൽകാനാണ് സർക്കാർ ശ്രമിക്കുന്നതെന്നും മന്ത്രി പറഞ്ഞു. അതിൽ ഏറിയ കൂറും ഐ. ടി. മേഖലയിൽ ഉള്ളവരാണ്.

ടൂറിസ്റ്റുകളെ വെറുതെ വിടാനും മന്ത്രി തയ്യാറായില്ല. ടൂറിസ്റ്റുകൾ സദാസമയവും പൂസാണത്രേ. കേരളത്തിൽ അവർ വരുന്നതു തന്നെ വെള്ളമടിക്കാൻ വേണ്ടിയാണ്. മന്ത്രിയുടെ സത്യപ്രസ്താവന ഡി വൈ എഫ് ഐ യോഗത്തിലായിരുന്നു എന്നതാണ് ആശ്ചര്യകരം. മന്ത്രിയുടെ പ്രസംഗം അച്ചടക്കത്തോടെ കേട്ടുകൊണ്ടിരുന്ന സഖാക്കൾ നിറഞ്ഞ കൈയടിയാണ് സമ്മാനിച്ചത്. കഴിഞ്ഞ സർക്കാരിന്റെ കാലത്ത് ബാർക്കോഴക്കെതിരെ മന്ത്രിമാരുടെ വാഹനം തടഞ്ഞത് അവർ അപ്പോൾ ഓർത്തു കാണണം.

ലഹരി വർജനമാണ് തങ്ങളുടെ നയമെന്ന് പറഞ്ഞ മന്ത്രി ലഹരി നിരോധനം അപ്രായോഗികമാണെന്ന് പറയാനും മറന്നില്ല. കഴിഞ്ഞ സർക്കാരിന്റെ കാലത്ത് നടത്തിയ ഒരു പഠനമാണ് അദ്ദേഹം അടിസ്ഥാനമാക്കിയത്. പഠനത്തിൽ ബാറുകൾ പൂട്ടിയപ്പോൾ ടൂറിസം കോൺഫാൻസുകൾ കുറഞ്ഞു. മദ്യം ഉണ്ടെങ്കിൽ മാത്രമേ അന്താരാഷ്ട്ര കോൺഫറൻസുകൾ കേരളത്തിൽ വരികയുള്ളു.

ഐ. ടി. മേഖലയിൽ റിലാക്സ് ചെയ്യാൻ അവസരം നൽകിയില്ലെങ്കിൽ കേരളം നെഗറ്റീവ് ആകുമെന്നും മന്ത്രി പറഞ്ഞു. റിലാക്സ് ആകാൻ വേണ്ടിയാണ് ബാർ പോലുള്ള സൗകര്യങ്ങൾ അനുവദിച്ചത്. ചാരായം നിരോധിച്ചപ്പോഴും ബാറുകൾ പൂട്ടിയപ്പോഴും ലഹരി ഉപയോഗം കൂടി. ഇക്കാര്യം വിവിധ പഠനങ്ങളിൽ നിന്ന് സർക്കാർ മനസിലാക്കിയിട്ടുണ്ട്. ഭാവിയിൽ ലഹരി നിരോധനം സർക്കാരിന്റെ അജണ്ടയില്ല. ലഹരി കടത്തുമായി ബന്ധപ്പെട്ട് കഴിഞ്ഞ സർക്കാരിന്റെ കാലത്തേക്കാൾ 800 മടങ്ങ് കേസുകൾ കൂടുതൽ രജിസ്റ്റർ ചെയ്തിട്ടുണ്ടെന്നും മന്ത്രി പറഞ്ഞു.

ഡാൻസ് പബ്ബുകൾ ആരംഭിക്കുന്നതിന്റെ കാരണം മന്ത്രി പറഞ്ഞില്ലെങ്കിലും രഹസ്യം ഇതു തന്നെയാണ്. ഡാൻസ് ബാറുകൾ ആരംഭിക്കുന്നതും ഐ. ടി. മേഖലയിലാണ്. മുംബക്കും ബംഗളുരുവിനും മാതൃകയായി മാറുകയാണ് കേരളം. ബാറുകളാണ് കഴിഞ്ഞ സർക്കാരിന്റെ അന്തകരായി മാറിയത്. ഉമ്മൻ ചാണ്ടിയെ അഭിമറിക്കാൻ പാർട്ടിയിലും സർക്കാരിലും നടന്ന ഗൂഢാലോചനയുടെ ഫലമായാണ് ബാർ,സോളാർ വിവാദങ്ങൾ ഉണ്ടായത്. ആരോപണങ്ങളെ പ്രതിരോധിക്കാൻ അന്നത്തെ സർക്കാരിന് കഴിഞ്ഞതുമില്ല. പിണറായി സർക്കാരിന്റെ മാതൃക പിന്തുടർന്നിരുന്നെങ്കിൽ ഉമ്മൻ ചാണ്ടിക്ക് ഇങ്ങനെയൊരു ഗതിയേട് വരുമായിരുന്നില്ല.

തമിഴ്നാട്ടിലേതു പോലെ കേരളത്തിലും വിദേശമദ്യം വിൽക്കുന്ന പെട്ടികടകൾ തുടങ്ങാനുള്ള കാലം വിദൂരത്തിലല്ലെന്ന് തോന്നുന്നു.