അയ്യന് തുണ അയ്യന് തന്നെ; ശബരിമല യുവതി പ്രവേശന വിഷയത്തില്‍ പരിഗണിക്കേണ്ട വിഷയങ്ങള്‍ക്ക് വിശാലബെഞ്ച് അന്തിമ രൂപം നല്‍കും; ശബരിമലയ്ക്ക് പുറമെ മറ്റ് മതങ്ങളിലെ ലിംഗസമത്വവുമായി ബന്ധപ്പെട്ട വിഷയങ്ങളും വിശാലബെഞ്ച് പരിഗണിക്കും
ശബരിമല യുവതി പ്രവേശന വിഷയത്തില്‍ പരിഗണിക്കേണ്ട വിഷയങ്ങള്‍ക്ക് വിശാലബെഞ്ച് അന്തിമ രൂപം നല്‍കും. യുവതി പ്രവേശനവുമായി ബന്ധപ്പെട്ട നിയമപരമായ ചോദ്യങ്ങളാണ് വിശാലബെഞ്ച് നിശ്ചയിക്കുക. ശബരിമലയ്ക്ക് പുറമെ മറ്റ് മതങ്ങളിലെ ലിംഗസമത്വവുമായി ബന്ധപ്പെട്ട വിഷയങ്ങളും വിശാലബെഞ്ച് പരിഗണിക്കും. മുസ്ലിം സ്ത്രീകളുടെ പള്ളി പ്രവേശനം, പാര്‍സി സ്ത്രീകളുടെ ആരാധനാ സ്വാതന്ത്ര്യം എന്നീ പ്രധാനവിഷയങ്ങളാണ് പരിഗണനയില്‍ വരുന്നത്.
പരിഗണനാ വിഷയത്തില്‍ സമവായത്തിലെത്താന്‍ മുതിര്‍ന്ന അഭിഭാഷകരെ കോടതി ചുമതലപ്പെടുത്തിയിരുന്നു .എങ്കിലും വിഷയത്തില്‍ അന്തിമരൂപം ഉണ്ടാക്കാനോ സമവായത്തിലെത്താനോ സാധിച്ചില്ലെന്ന് മുതിര്‍ന്ന അഭിഭാഷകരായ ഇന്ദിര ജെയ്സിംഗ്, വി ഗിരി, അരവിന്ദ് ദത്താര്‍, ഗോപാല്‍ ശങ്കരനാരായണന്‍ എന്നിവര്‍ കോടതിയെ അറിയിക്കുകയായിരുന്നു.
2019 നവംബര്‍ 14 ന് ശബരിമല അവലോകന ഹരജികള്‍ പരിഗണിച്ച അഞ്ചംഗ ബെഞ്ച് ഏഴ് ചോദ്യങ്ങള്‍ പരിഗണിച്ചിരുന്നു. ഭരണഘടനയുടെ ആര്‍ട്ടിക്കിള്‍ 25 നും 26 നും കീഴിലുള്ള മതസ്വാതന്ത്ര്യവും മറ്റ് മൗലികാവകാശങ്ങളും, ആര്‍ട്ടിക്കിള്‍ 14 പ്രകാരം സമത്വത്തിനുള്ള അവകാശം, ആവിഷ്‌കാര സ്വാതന്ത്ര്യത്തില്‍ ഭരണഘടനാ ധാര്‍മ്മികത, ഒരു പ്രത്യേക സമ്പ്രദായത്തിന് എത്രത്തോളം മതത്തിന്റെ അവിഭാജ്യ ഘടകമാകാന്‍ സാധിക്കും എന്നീ ചോദ്യങ്ങളാണ് പ്രധാനമായും പരിഗണിക്കപ്പെട്ടത്.
എങ്കിലും ജനുവരി 13 ന് 9 അംഗ ഭരണഘടനാ ബെഞ്ച് വാദം കേള്‍ക്കുമ്പോള്‍ പരിഗണിക്കേണ്ട ചോദ്യങ്ങള്‍ക്ക് സമവായമുണ്ടാക്കാനാണ് ചീഫ് ജസ്റ്റിസ് ബോബ്ഡെ കക്ഷികളോട് ആവശ്യപ്പെട്ടത്.കോടതിയുടെ ഉത്തരവ് അനുസരിച്ച് ജനുവരി 17 ന് സുപ്രിംകോടതി രജിസ്ട്രാര്‍ ജനറല്‍ യോഗം വിളിച്ചെങ്കിലും അത് പരാജയപ്പെടുകയായിരുന്നു .
ജനുവരി 17 ന് ആണ് ഇതു സംബന്ധിച്ച മുതിര്‍ന്ന അഭിഭാഷകരുടെ യോഗം നടന്നത്. യോഗത്തില്‍ പങ്കെടുത്ത അഭിഭാഷകര്‍ക്ക് പ്രശ്‌നങ്ങളില്‍ സമവായത്തിലെത്താന്‍ സാധിച്ചില്ലെന്ന് സോളിസിറ്റര്‍ ജനറല്‍ തുഷാര്‍ മേത്ത ജനുവരി 28 ന് കോടതിയെ അറിയിക്കുകയായിരുന്നു.യോഗത്തില്‍ പങ്കെടുത്ത മറ്റ് മുതിര്‍ന്ന അഭിഭാഷകരും കോടതിയെ ഇക്കാര്യം അറിയിച്ചു. മുതിര്‍ന്ന അഭിഭാഷകന്‍ വി ഗിരി അഭിഭാഷകര്‍ തയ്യാറാക്കിയ ചോദ്യങ്ങള്‍ ഉള്‍ക്കൊള്ളുന്ന ഒരു റിപ്പോര്‍ട്ട് ചീഫ് ജസ്റ്റിസ് ബോബ്ഡെയ്ക്ക് കൈമാറുകയും ചെയ്തു.
പരിഗണന വിഷയങ്ങളില്‍ അഭിഭാഷകര്‍ക്ക് ഇടയില്‍ അഭിപ്രായ ഐക്യം ഉണ്ടാകാത്തതില്‍ നിരാശയുണ്ടെന്ന് അറിയിച്ച ചീഫ് ജസ്റ്റിസ് ഫെബ്രുവരി 3 ന് ബെഞ്ച് ഈ വിഷയത്തില്‍ വാദം കേള്‍ക്കുമെന്നും വ്യക്തമാക്കി .തിങ്കളാഴ്ച നടക്കുന്ന നടക്കുന്ന വാദം കണക്കിലെടുത്ത് ഒന്‍പത് ജഡ്ജിമാര്‍ തന്നെ വിഷയത്തില്‍ ചര്‍ച്ച നടത്തി അന്തിമരൂപം നല്‍കുമെന്ന് ചീഫ് ജസ്റ്റിസ് അറിയിക്കുകയും ചെയ്തു.ചോദ്യങ്ങള്‍ ആവര്‍ത്തിക്കാതിരിക്കാന്‍ ഓരോ അഭിഭാഷകരും ശ്രദ്ധിക്കണമെന്ന അഭിപ്രായവും മുതിര്‍ന്ന അഭിഭാഷകര്‍ മുന്നോട്ടുവെച്ചു.
https://www.facebook.com/Malayalivartha
