സർവകലാശാല ഭരണത്തിൽ നിന്നും സർക്കാരിനെയും ഉന്നത വിദ്യാഭ്യാസ മന്ത്രിയെയും പൂർണമായും ഒഴിവാക്കാൻ ഗവർണർ തീരുമാനിച്ചേക്കും. അഞ്ച് ദിവസത്തിനുള്ളിൽ ഉത്തരവ് ഇറങ്ങുമെന്നാണ് പ്രതീക്ഷിക്കുന്നത്.

സർവകലാശാല അദാലത്തിൽ മന്ത്രി ജലീലും അദ്ദേഹത്തിന്റെ പ്രൈവറ്റ് സെക്രട്ടറിയും പങ്കെടുത്തതിനെതിരെ സേവ് യൂണിവേഴിസിറ്റി കാമ്പയിൻ നൽകിയ പരാതിയിലുള്ള ഉത്തരവിലായിരിക്കും ഗവർണർ ഇക്കാര്യം സൂചിപ്പിക്കുന്നതെന്ന് അറിയുന്നു.

സർവകലാശാലയുടെ ഭരണം നിരീക്ഷിക്കാൻ മുൻ ഗവർണർ ജസ്റ്റിസ് പി. സദാശിവം രൂപം നൽകിയതു പോലൊരു സമിതിക്ക് രൂപം നൽകാനും ഗവർണർ ആരിഫ് മുഹമ്മദ് ഖാൻ ആലോചിക്കുന്നുണ്ട്.

മന്ത്രി ജലീലിനെതിരെ ഗവർണറുടെ ഉത്തരവിൽ പരാമർശമുണ്ടായാൽ അദ്ദേഹത്തിന് മന്ത്രി സ്ഥാനത്ത് തുടരാൻ ധാർമ്മികമായി അവകാശമില്ലാതാവും. എന്നാൽ മുഖ്യമന്ത്രിയും ഗവർണറും തമ്മിലുള്ള ഇരിപ്പുവശം കാരണം അതിനുള്ള സാധ്യത കാണുന്നില്ല.

സർവകലാശാലകൾക്ക് പൂർണമായും സ്വയംഭരണം നൽകാനാണ് ഗവർണറുടെ തീരുമാനം എന്നറിയുന്നു. ചട്ടവിരുദ്ധമായ ഇടപെടലുകൾ സർക്കാരിന്റെ ഭാഗത്ത് നിന്നും ഉണ്ടാകുന്നുണ്ടെന്ന് വൈസ് ചൻസലർമാർ ഗവർണറെ അറിയിച്ചുവെന്നാണ് വിവരം. അത്തരത്തിൽ സർക്കാർ ഇടപെടൽ ഉണ്ടായാൽ വിസിമാർ അക്കാര്യം ഗവർണറെ അറിയിക്കണം. ഗവർണറെ അറിയിക്കാതിരുന്നാൽ അതിന്റെ പൂർണ ഉത്തരവാദിത്വം വൈസ് ചാൻസലർക്കായിരിക്കും. പരാതി വന്നാൽ വിസി മറുപടി പറയണം എന്ന വിവരം ഗവർണർ കൃത്യമായി വി.സി മാരെ അറിയിച്ചിട്ടുണ്ട്.

സർക്കാർ നിർദ്ദേശം എന്ന നിലയിലാണ് പുനർ മൂല്യ നിർണയം നടത്തണമെന്ന മന്ത്രിയുടെ ആവശ്യം അംഗീകരിച്ചതെന്ന് സാങ്കേതിക സർവകലാശാലാ വൈസ് ചാൻസലർ ഗവർണറെ അറിയിച്ചു. എന്നാൽ സർവകലാശാലക്ക് നിർദ്ദേശം നൽകാനുള്ള അധികാരം സർക്കാരിനില്ലെന്ന് ഗവർണർ അറിയിച്ചു. പല സ്വാശ്രയ എഞ്ചിനീയറിംഗ് കോളേജിലെയും അധ്യാപകർക്ക് വേണ്ടത്ര പരിചയമില്ലെന്ന് വി സി പറഞ്ഞപ്പോൾ എങ്കിൽ നടപടിയെടുക്കാനാണ് ഗവർണർ നിർദ്ദേശിച്ചത്. അതു കൊണ്ടാണ് ഒരു വിദ്യാർത്ഥിയുടെ ഉത്തരകടലാസ് മൂന്നാമതും പരിശോധിച്ചതെന്നാണ് വിസിയുടെ വിശദീകരണം.

ജലീലിന് മുമ്പ് ഉന്നത വിദ്യാഭ്യാസ മന്ത്രിയായിരുന്ന പ്രൊഫ.രവീന്ദ്രനാഥിന്റെ വിശദാംശങ്ങൾ ഗവർണർ ശേഖരിച്ചു. മന്ത്രി രവീന്ദ്രനാഥ് സർവകലാശാലാ ഭരണത്തിൽ ഇടപെട്ടിട്ടില്ലെന്നാണ് ഗവർണർ മനസിലാക്കിയത്. അദ്ദേഹം അദാലത്തുകൾ നടത്തിയിട്ടില്ല. യാതൊരു നിർദ്ദേശവും സർവകലാശാലക്ക് നൽകിയിട്ടില്ല. രവീന്ദ്രനാഥിന് ഇല്ലാത്ത താത്പര്യം മന്ത്രി ജലീലിന് എന്തിനാണെന്നാണ് ഗവർണറുടെ ചോദ്യം.

സാങ്കേതിക സർവകലാശാലാ വിസിക്കെതിരെ നടപടി വരാനുള്ള സാധ്യതയും തള്ളികളയാനാവില്ല. അവർക്കെതിരെ ഗുരുതരമായ ആരോപണങ്ങളാണ് പരാതി നൽകിയവർ ഗവർണർക്ക് മുന്നിൽ സമർപ്പിച്ചിരിക്കുന്നത്.

ഏതായാലും ജലീലിന്റെ രാജഭരണത്തിന് ഗവർണറുടെ കൂച്ചുവിലക്ക് വരും. ഗവർണറുടെ ഉത്തരവ് കിട്ടിയാൽ വൈസ് ചാൻസലർമാർ ജലീലിനെ കണ്ടാൽ ആലുവ മണപ്പുറത്ത് കണ്ട പരിചയം പോലും കാണിക്കില്ല. വൈസ് ചാൻസലർ ഒരു രാഷ്ട്രീയ നിയമനമാണ്. കഴിഞ്ഞ ഗവർണർ സർക്കാരിന്റെ ശുപാർശകൾ അതേപടി അംഗീകരിച്ചിരുന്നില്ല.