നിരപരാധിയെ അറസ്റ്റ് ചെയ്തു 47 ദിവസം ജയിലിലടച്ച കേസില്‍ അന്വേഷണത്തിന് മനുഷ്യാവകാശ കമ്മീഷന്റെ ഉത്തരവ്
നിരപരാധിയെ അറസ്റ്റുചെയ്തു ജയിലിലടച്ച പോലീസ് ഉദ്യോഗസ്ഥര്‍ക്കെതിരേ അന്വേഷണത്തിന് സംസ്ഥാന മനുഷ്യാവകാശ കമ്മീഷന്‍ ഉത്തരവ്.
സ്വര്‍ണമാല മോഷ്ടിച്ചെന്ന മൊഴിയുടെ അടിസ്ഥാനത്തില്‍ മാവേലിക്കര സ്വദേശി രമേഷ് കുമാറിനെയാണ് അറസ്റ്റുചെയ്ത് 47 ദിവസം ജയിലില്‍ അടച്ചത്.
ആലപ്പുഴ ജില്ലാ പോലീസ് മേധാവി , ഡിവൈഎസ്പി റാങ്കില്‍ കുറയാത്ത പോലീസ് ഉദ്യോഗസ്ഥനെ നിയോഗിച്ച് അന്വേഷണം നടത്തി 30 ദിവസത്തിനകം അന്വേഷണ റിപ്പോര്‍ട്ട് സമര്‍പ്പിക്കണമെന്ന് കമ്മീഷന്‍ ജുഡീഷ്യല്‍ അംഗം പി. മോഹനദാസ് ആവശ്യപ്പെട്ടു.
കായംകുളത്തെ സ്വകാര്യ സ്‌കൂളില്‍ ഡ്രൈവറായ രമേഷ് കുമാറിനെയാണ് മുതിര്‍ന്ന വനിതയുടെ മൊഴിയുടെ അടിസ്ഥാനത്തില്‍ അറസ്റ്റുചെയ്ത് 47 ദിവസം ജയിലില്‍ അടച്ചത്. താനാണ് മാല മോഷ്ടിച്ചതെന്ന് യഥാര്‍ത്ഥ പ്രതി വെളിപ്പെടുത്തിയതോടെയാണ് രമേഷ് കുമാറിന്റെ നിരപരാധിത്വം വാര്‍ത്തയായത്.
നിരപരാധിയെ അറസ്റ്റുചെയ്ത് ജയിലിലടച്ചിട്ടുണ്ടെങ്കില്‍ അതുചെയ്ത പോലീസ് ഉദ്യോഗസ്ഥര്‍ ഗുരുതരമായ മനുഷ്യാവകാശ ലംഘനമാണ് നടത്തിയതെന്ന് കമ്മീഷന്‍ ഉത്തരവില്‍ പറഞ്ഞു. പത്രവാര്‍ത്തയുടെ അടിസ്ഥാനത്തില്‍ സ്വമേധയാ രജിസ്റ്റര്‍ ചെയ്ത കേസിലാണ് നടപടി.
https://www.facebook.com/Malayalivartha
