എന്ത് വന്നാലും കേരളത്തിലെ കോഴികള്‍ക്ക് കിടക്കപ്പൊറുതിയില്ലെന്നാണ് പറയാറ്. വ്യാജപ്രചരണങ്ങള്‍ക്കെതിരെ ശക്തമായ നടപടികളാണ് സര്‍ക്കാര്‍ സ്വീകരിച്ചിരിക്കുന്നത്. മൂന്ന് പേരാണ് ഇതുവരെ വ്യാജ പ്രചരണം നടത്തി അറസ്റ്റിലായത്.

ഏത് രോഗം വന്നാലും കോഴിക്ക് കിടക്കപ്പൊറുതിയില്ലെന്നതാണ് ഇന്നത്തെ അവസ്ഥ. ഇക്കാലമത്രയും പക്ഷിപനി മാത്രമാണ് സംസ്ഥാനത്ത് കോഴി വില്‍പന തകര്‍ത്തിരുന്നത്.

എന്നാല്‍ ചൈനയില്‍ ജനിച്ച് ചൈനയില്‍ വളര്‍ന്ന കൊറോണ വൈറസ് വന്നപ്പോഴും തങ്ങള്‍ക്ക് കിടക്കപൊറുതിയുണ്ടാവില്ലെന്ന് കോഴികള്‍ മനസാ വാചാ കരുതിയില്ല.

കോഴിയിറച്ചി കഴിച്ചാല്‍ വൈറസ് പകരുമെന്നാണ് പുതിയ കണ്ടുപിടുത്തം ഉണ്ടായത്. അതും നല്ല വിദ്യാഭ്യാസമുള്ളവരാണ് പ്രചാരണത്തിന് ചുക്കാന്‍ പിടിച്ചത് എന്നതാണ് രസകരം.

ചുരുക്കത്തില്‍ കേരളത്തില്‍ കോഴി വില കുത്തനെ ഇടിഞ്ഞു. വ്യാപാരികള്‍ ധര്‍മ്മസങ്കടത്തിലായി. ഒടുവില്‍ കോഴികളെ രക്ഷിക്കാന്‍ രംഗത്തെത്തിയത് കേരള വെറ്റിനറി സര്‍വകലാശാല വൈസ് ചാന്‍സലര്‍ ഡോ. എം. ആര്‍. ശശീന്ദ്രനാഥാണ്. മൃഗങ്ങളിലൂടെ രോഗം പകരാനുള്ള സാധ്യത വിരളമാണെന്നാണ് വി.സി. പറഞ്ഞത്. കോഴികളില്‍ നിന്നോ മറ്റ് മൃഗങ്ങളില്‍ നിന്നോ വൈറസ് പകര്‍ന്നതിന്റെ ഒരു തെളിവും കണ്ടെത്താന്‍ കഴിഞ്ഞിട്ടില്ലെന്ന് അദ്ദേഹം പറഞ്ഞു. ലോകം മുഴുവന്‍ പരിശോധന നടത്തിയെന്നും അദ്ദേഹം അവകാശപ്പെട്ടു.

പാമ്പില്‍ നിന്നും വൈറസ് മനുഷ്യരിലേക്ക് പടര്‍ന്നു എന്ന് ചൈന പ്രാഥമികമായി കണ്ടെത്തിയിട്ടുണ്ട്. കാരണം ചൈനയില്‍ മനുഷ്യര്‍ പാമ്പ് ഇറച്ചി കഴിക്കാറുണ്ട്. എന്നാല്‍ പിന്നീട് ഉണ്ടായ പഠനങ്ങളില്‍ വവ്വാലുകളില്‍ നിന്നാണ് വൈറസ് പടര്‍ന്നതെന്ന സംശമാണ് ഉണ്ടായിരിക്കുന്നതെന്നും വൈസ് ചാന്‍സലര്‍ പറഞ്ഞു.

അതേസമയം വന്യമൃഗങ്ങളില്‍ നിന്ന് രോഗം പകരാനുള്ള സാധ്യത വി സി തള്ളികളന്നില്ല. കാട്ടില്‍ വേട്ടയാടാന്‍ പോകുന്നവര്‍ക്ക് രോഗം ബാധിക്കാന്‍ സാധ്യതയുണ്ട്. എന്നാല്‍ കോഴി, താറാവ്, ആട് തുടങ്ങി ഒരു വളര്‍ത്തു മൃഗത്തില്‍ നിന്നും രോഗം പകരാനുള്ള സാധ്യതയില്ലെന്ന് അദ്ദേഹം പറഞ്ഞു.

സംഗതി എന്തായാലും ഇറച്ചി നന്നായി വേവിച്ച ശേഷം മാത്രമേ കഴിക്കാവൂ എന്നും അദ്ദേഹം പറഞ്ഞു. അത് ആരോഗ്യത്തിന് നല്ലതാണ്. വൈറസ് ഉണ്ടെങ്കിലും ഇല്ലെങ്കിലും.

മണ്ണുത്തി വെറ്റിനറി സര്‍വകലാശാലയില്‍ ഗവേഷണത്തില്‍ ഏര്‍പ്പെട്ടിരിക്കുന്ന വിദ്യാര്‍ത്ഥികള്‍ മൃഗങ്ങളില്‍ കൊറോണ സാധ്യതയെ കുറിച്ച് പഠിക്കുന്നുണ്ടെങ്കിലും ഒന്നും കണ്ടെത്താന്‍ കഴിഞ്ഞിട്ടില്ലെന്നും അദ്ദേഹം പറഞ്ഞു.

വൈറസ് എന്നു കേള്‍ക്കുമ്പോള്‍ തന്നെ കേരളത്തിലെ ഇറച്ചി വിപണി തകരാന്‍ തുടങ്ങിയിട്ട് കാലമേറെയായി. എന്തൊക്കെ ബോധവത്കരണം നടത്തിയാലും വൈറസ് ബാധ ശ്രദ്ധയില്‍ പെട്ടാല്‍ ജനങ്ങള്‍ ഇറച്ചി ഒഴിവാക്കും. ഇത് ലക്ഷകണക്കിന് കോഴി കര്‍ഷകരെയാണ് ബാധിക്കുന്നത്. ഒടുവില്‍ കോഴി മേള നടത്തിയാണ് ജനങ്ങളുടെ സംശയം ദൂരികരിക്കുന്നത്. കോഴി മേള നടത്തിയാലും വിശ്വസിക്കാത്തവരും കേരളത്തിലുണ്ട്. കേരളത്തിലാണ് കോഴി പ്രധാന മെനുവായിട്ടുള്ളത്. ആയതിനാല്‍ കോഴികള്‍ പറയുന്നു, നിസഹായരായ ഞങ്ങളെ കൊല്ലാന്‍ ശ്രമിക്കരുതേ!