മുൻ ഡിജിപി സെൻകുമാർ പത്രപ്രവർത്തകർക്കെതിരെ നൽകിയ പരാതിയിലുള്ള നടപടി അവസാനിപ്പിക്കാൻ മുഖ്യമന്ത്രി നൽകിയ നിർദ്ദേശം കോടതി കയറുമോ? പോലീസ് രജിസ്റ്റർ ചെയ്ത കേസ് അവസാനിപ്പിക്കാൻ മുഖ്യമന്ത്രിക്ക് നിർദ്ദേശം നൽകാൻ കഴിയുമോ? കേസിന്റെ മെറിറ്റിനെ കുറിച്ച് മുൻകൂറായി തീരുമാനമെടുക്കാൻ ആഭ്യന്തരമന്ത്രിക്ക് കഴിയുമോ എന്നാണ് ബിജെപി വ്യത്തങ്ങൾ ഉന്നയിക്കുന്നത്.

അതോ നിയമസഭയിൽ സാധാരണ മുഖ്യമന്ത്രി പറയുന്നതു പോലെ ഒരിക്കലും പ്രാവർത്തികമാവാത്ത ഒന്നായി ഇത് മാറുമോ? കേരളം ഉറ്റുനോക്കുന്ന ചോദ്യങ്ങളാണ് ഇത്. മുഖ്യമന്ത്രി നിർദ്ദേശം നൽകിയിരിക്കുന്നത് സംസ്ഥാന പോലീസ് മേധാവിക്കാണ്. അതേ സമയം കേസിൽ നിന്നും താൻ പിന്നോട്ടില്ലെന്ന നിലപാടിൽ തന്നെയാണ് സെൻകുമാർ നീങ്ങുന്നത്.

സെൻകുമാറിന്റെ പരാതിയിൽ പത്രപ്രവർത്തകരായ കടവിൽ റഷീദിനും പി.ജി സുരേഷ്കുമാറിനും എതിരെ പോലീസ് കേസെടുത്തത് തികച്ചും അനാവശ്യമായിരുന്നു. അതിപ്പോൾ കോടതിയുടെ പരിഗണനയിലാണ്. കോടതിയുടെ പരിഗണനയിലുള്ള വിഷയങ്ങളിൽ മുഖ്യമന്ത്രിക്ക് അഭിപ്രായം പറയാൻ നിയമ പ്രകാരം കഴിയാറില്ല. എന്നാൽ കോടതിയിലുള്ള കേസ് പിൻവലിക്കാൻ അനുമതി നൽകാം. കോടതിയുടെ അനുമതി ഉണ്ടെങ്കിൽ മാത്രമേ കേസ് പിൻവലിക്കാൻ കഴിയുകയുള്ളു.

രണ്ട് പത്രപ്രവർത്തകർക്കെതിരെ കേസെടുക്കാൻ സാധാ പോലീസിന് കഴിയില്ല. കേസെടുത്തത് കന്റോൺമെന്റ് പോലീസാണ്. മുഖ്യമന്ത്രിയുടെ മൂക്കിന് കീഴിലാണ് കന്റോൺമെന്റ് സ്റ്റേഷൻ. സർക്കാരിന് വേണ്ടപ്പെട്ടവരെയാണ് അവരെ നിയമിക്കാറുള്ളത്. കടവിൽ റഷീദിനും പി ജി സുരേഷ് കുമാറിനുമെതിരെ കേസെടുത്തത് തീർച്ചയായും സർക്കാരിന്റെ അറിവോടെയാണ്. അല്ലാതെ കന്റോൺമെന്റ് പോലീസിന് ഒന്നും ചെയ്യാനാവില്ല.

തെറ്റായ നടപടിയിലൂടെ കേസെടുത്തിട്ടുണ്ടെങ്കിൽ പോലീസുകാർക്കെതിരെ സർക്കാരിന് അച്ചടക്കനടപടി സ്വീകരിക്കാം. എന്നാൽ അത്തരമൊരു കാര്യം സർക്കാർ ഇതുവരെ ചെയ്തിട്ടില്ല. സെൻകുമാറിന്റെ സ്വാധീനമാണ് കേസിന് പിന്നിലുള്ളതെന്ന് മുഖ്യമന്ത്രി പറഞ്ഞത് തികച്ചും അന്യായമായ കാര്യമാണ്. പിണറായി വിജയനാണ് കേരളത്തിന്റെ ആഭ്യന്തര മന്ത്രി. ലോക്നാഥ് ബഹ്റയാണ് ഡിജിപി. ഇരുവരും അറിയാതെ പോലീസിൽ ഒരില പോലും അനങ്ങുകയില്ല.

അതായത് പി.ജി സുരേഷ്കുമാറും കടവിൽ റഷീദും സർക്കാരിന് ഒരു പ്രതീകം മാത്രമാണ്. മാധ്യമപ്രവർത്തകർ ഒരിക്കലും അതിര് ലംഘിക്കരുതെന്ന സൂചനയാണ് ഇതിലൂടെ സർക്കാർ നൽകിയത്. മുൻ ഡിജി പി നൽകിയ കേസ് സർക്കാരിന് തോന്നും പോലെ പിൻവലിക്കാനാവില്ല.

ഫയൽ നിയമ വകുപ്പ് കാണണം. കേസ് പിൻവലിക്കാൻ നിയമ വകുപ്പിന്റെ അനുമതി വേണം. ആഭ്യന്തര വകുപ്പാണ് കേസ് പിൻവലിക്കാൻ അനുമതി നൽകേണ്ടത്. ഭാവിയിൽ കോടതി അനുമതി നൽകിയില്ലെന്ന് പറഞ്ഞ് സർക്കാരിന് തലയൂരുകയും ചെയ്യാം.