തമിഴ്നാട്-കേരള അതിർത്തിയായ വാളയാറിൽ നടക്കുന്നത് വമ്പൻ അരി കടത്ത്. ഇരുചക്രവാഹനങ്ങളിൽ ആണ് യഥേഷ്ടം അരി കടത്തുന്നത്. വാണിജ്യനികുതി ചെക്പോസ്റ്റുകൾ അടച്ചതോടെ ഇവിടെ നികുതിവെട്ടിപ്പും കള്ളക്കടത്തും വ്യാപകമായിരിക്കുകയാണ്. വാളയാറിൽ മോട്ടോർവാഹന ചെക്പോസ്റ്റുകളും എക്സൈസ് ചെക്പോസ്റ്റും നിലവിലുണ്ടെങ്കിലും ഈ പകൽക്കൊള്ളയ്ക്ക് ഒരു കുറവുമില്ല.

കേരളത്തിൽ അരിവില ഉയരുന്നത് മുതലെടുത്താണ് തമിഴ്നാട്ടിൽനിന്ന് റേഷനരി ഇവിടേക്ക് കടത്തുന്നത്. തമിഴ്‌നാട്ടിൽ സൗജന്യമായി കിട്ടുന്ന റേഷനരി കേരളത്തിലെ മില്ലുകളിലെത്തിച്ച് പോളിഷ്ചെയ്ത് കളർചേർത്ത് ഉയർന്ന വിലയ്ക്ക് വിൽക്കുന്നു. സ്കൂട്ടറുകളിൽ ഒറ്റത്തവണ 300 കിലോ അരി വരെ റോഡുമാർഗം കടത്താൻ സാധിക്കും. 25-ലേറെ സ്കൂട്ടറുകളിൽ ദിവസവും പലതവണയായി ടൺകണക്കിന് അരിയാണ് കേരളത്തിലേക്ക് അനധികൃതമായി കടത്തുന്നത്.