കൊറോണ വൈറസ് ബാധക്ക് തുടക്കം കുറിച്ച ചൈനയില്‍ നിന്ന് കേരളത്തിലേക്ക് എത്തിയ രണ്ടുപേര്‍ സര്‍ക്കാര്‍ നിര്‍ദേശം മറികടന്ന് വിദേശത്തേയ്ക്ക് മടങ്ങി. ചൈനയില്‍ നിന്ന് വരുന്നവര്‍ ആരോഗ്യവകുപ്പിന്റെ നിര്‍ദേശം അനുസരിച്ച്‌ പ്രവര്‍ത്തിക്കണമെന്ന നിർദ്ദേശം മറികടന്നാണ് ചൈനയില്‍ നിന്ന് കോഴിക്കോട്ട് എത്തിയ രണ്ടു പേര്‍ തിരിച്ചു വിദേശത്തേയ്ക്ക് തന്നെ മടങ്ങിയത്.

ചൈനയില്‍ നിന്ന് വരുന്നവര്‍ നിരീക്ഷണത്തില്‍ കഴിയണമെന്നാണ് ആരോഗ്യവകുപ്പിന്റെ നിര്‍ദേശം. കൊറോണ ബാധിത സ്ഥലങ്ങളില്‍ നിന്നും എത്തുന്നവര്‍ക്ക് ഒരു മാസത്തെ നിരീക്ഷണമാണ് നിർദ്ദേശിച്ചിരിക്കുന്നത്. ഇത് മറ്റുളളവരിലേക്ക് പകര്‍ന്നാല്‍ വലിയ ആപത്താണെന്നും ആരോഗ്യമന്ത്രി കെ കെ ശൈലജ മുന്നറിയിപ്പ് നല്‍കിയിട്ടുണ്ട്. ഇത്തരത്തിൽ സംസ്ഥാന സര്‍ക്കാരിന്റെ ജാഗ്രതാ നിര്‍ദേശം നിലനില്‍ക്കേയാണ്, ചൈനയില്‍ നിന്ന് കോഴിക്കോട്ട് എത്തിയ രണ്ടുപേര്‍ വിദേശത്തേയ്ക്ക് തിരിച്ചുപോയത്.

ഇവരെ മടക്കിക്കൊണ്ടുവരാന്‍ ശ്രമം ആരംഭിച്ചതായി ആരോഗ്യവകുപ്പ് അറിയിച്ചു. ഇവര്‍ക്ക് കൊറോണ വൈറസ് ബാധയുടെ രോഗലക്ഷണങ്ങളില്ല. എങ്കിലും മുന്‍കരുതലിന്റെ ഭാഗമായി ഇവര്‍ നിരീക്ഷണത്തില്‍ കഴിയേണ്ടതാണെന്നും ആരോഗ്യവകുപ്പ് വ്യക്തമാക്കുന്നു.

കൊറോണ ബാധിത പ്രദേശങ്ങളില്‍ നിന്ന് വന്നവര്‍ ഉടന്‍ തന്നെ ആരോഗ്യ വകുപ്പുമായി ബന്ധപ്പെടേണ്ടതാണെന്ന് മന്ത്രി കെ കെ ശൈലജ ആവശ്യപ്പെട്ടിട്ടുണ്ട്. ആ നിർദ്ദേശങ്ങൾ പലരും അനുസരിക്കുന്നില്ല. ഇത് അത്യന്തം ആപത്താണ് വിളിച്ചു വരുത്തുന്നത്. ഇത് കുറ്റകരമായി കണക്കാക്കേണ്ടതായി വരുമെന്നും മന്ത്രി മുന്നറിയിപ്പ് നല്‍കിയിട്ടുണ്ട്. വുഹാനില്‍ ഏറ്റവും കൂടുതല്‍ വിദ്യാര്‍ത്ഥികള്‍ പഠനത്തിനായി പോയത് കേരളത്തില്‍ നിന്നാണ്. അതിനാലാണ് കേരളത്തിൽ ജാഗ്രതാ നിർദ്ദേശം പുറപ്പെടുവിച്ചത്.

സംസ്ഥാനത്ത് മൂന്നുപേര്‍ക്കാണ് ഇതുവരെ കൊറോണ വൈറസ് ബാധ സ്ഥിരീകരിച്ചിട്ടുള്ളത്. ഒരാള്‍ തൃശൂര്‍ മെഡിക്കല്‍ കോളജിലും രണ്ടാമത്തെയാള്‍ ആലപ്പുഴ മെഡിക്കല്‍ കോളജിലും ചികില്‍സയിലാണ്. മൂന്നാമത്തെ രോഗി കാസര്‍കോട് കാഞ്ഞങ്ങാട് ജില്ലാ ആശുപത്രിയിലാണുള്ളത്. സംസ്ഥാനത്ത് കൂടുതല്‍ കൊറോണ കേസുകള്‍ ഉണ്ടാകാന്‍ സാധ്യതയുണ്ടെന്നും മന്ത്രി നിയമസഭയില്‍ വ്യക്തമാക്കിയിരുന്നു

കേരളത്തില്‍ കൊറോണ വൈറസ് ബാധിതരുടെ എണ്ണം വര്‍ധിച്ചതോടെ, സംസ്ഥാന അതിര്‍ത്തികളില്‍ പരിശോധനയും നിരീക്ഷണവും ശക്തമാക്കിയിരിക്കുകയാണ്. തമിഴ്‌നാടും കര്‍ണാടകയുമാണ് അതിര്‍ത്തി ചെക്ക്‌പോസ്റ്റുകളില്‍ പരിശോധന കര്‍ശനമാക്കിയത്. വിദഗ്ധ മെഡിക്കല്‍ സംഘത്തെ പരിശോധനയ്ക്കായി ചെക്ക്‌പോസ്റ്റുകളില്‍ നിയോഗിച്ചിട്ടുമുണ്ട്.

തമിഴ്‌നാട് സര്‍ക്കാര്‍ കോയമ്ബത്തൂര്‍, കന്യാകുമാരി, തൂത്തുക്കുടി അതിര്‍ത്തികളിലാണ് പരിശോധന ശക്തമാക്കിയത്. കേരളത്തില്‍ നിന്നുള്ള വാഹനങ്ങള്‍ അടക്കം കര്‍ശന പരിശോധനയ്ക്ക് വിധേയമാക്കിയ ശേഷമാണ് കടത്തിവിടുന്നത്. അതിര്‍ത്തികളില്‍ യാത്രക്കാര്‍ക്ക് മാര്‍ഗനിര്‍ദേശവും നല്‍കുമെന്ന് തമിഴ്‌നാട് ആരോഗ്യവകുപ്പ് അധികൃതര്‍ അറിയിച്ചു.

കേരളവുമായി അതിര്‍ത്തി പങ്കിടുന്ന ചെക്‌പോസ്റ്റുകളില്‍ കര്‍ണാടക ആരോഗ്യ വകുപ്പും പരിശോധന കര്‍ശനമാക്കിയിട്ടുണ്ട്. ദക്ഷിണ കന്നഡ, കൊടക്, ചാമരാജ് നഗര്‍, മൈസൂരു എന്നീ ജില്ലകളിലെ കേരളാ അതിര്‍ത്തി ചെക്‌പോസ്റ്റുകളിലാണ് ചൊവ്വാഴ്ച മുതല്‍ പരിശോധന നടത്തുന്നത്. അതിര്‍ത്തി പ്രദേശത്തെ ആശുപത്രികളില്‍ പ്രത്യേക വാര്‍ഡുകളും തുറന്നു. പനിയോ മറ്റ് ലക്ഷണങ്ങളോ കാണുന്നവരോട് ഏറ്റവും അടുത്ത ആശുപത്രിയില്‍ ചികിത്സ തേടണമെന്ന് ആരോഗ്യ സംഘം നിര്‍ദ്ദേശിക്കുന്നുണ്ട്. ഗുണ്ടല്‍പേട്ട് സര്‍ക്കാര്‍ ആശുപത്രിയില്‍ ഉള്‍പ്പെടെ പ്രത്യേക ഐസൊലേഷന്‍ വാര്‍ഡ് ഒരുക്കിയിട്ടുണ്ട്.

കോഴിക്കോട് മൈസുരു ദേശീയപാതയിലെ മൂലഹള്ള ചെക്‌പോസ്റ്റില്‍ കര്‍ശനമായ പരിശോധനയാണ് നടക്കുന്നത്. ഒരു ഡോക്ടറിന്റെ നേതൃത്വത്തിലുള്ള ഏഴംഗ സംഘമാണ് ഇവിടെ പരിശോധന നടത്തുന്നത്. ബസുകളുള്‍പ്പെടെ മുഴുവന്‍ വാഹനങ്ങളും തടഞ്ഞുനിര്‍ത്തി നോണ്‍ കോണ്‍ടാക്‌ട് ഇന്‍ഫ്രാറെഡ് തെര്‍മോമീറ്റര്‍ ഉപയോഗിച്ചാണ് യാത്രക്കാര്‍ക്ക് പനിയോ മറ്റ് അസുഖങ്ങളോ ഉണ്ടോയെന്ന് പരിശോധിക്കുന്നത്.