വിവാഹ ആഘോഷങ്ങളിൽ ക്ഷണിക്കപ്പെടാതെ നിരവധിപേർ എത്താറുണ്ട്. എന്നാൽ തിക്കിനും തിരക്കിനും ഇടയിൽ ഇവരെ പലപ്പോഴും കണ്ടുപിടിക്കാൻ കഴിയാറില്ല. വധുവിന്റെയോ വരന്റെയോ സുഹൃത്തുക്കൾ അല്ലെങ്കിൽ ബന്ധുക്കൾ എന്നാകും പരിചയമില്ലാത്തവരെ കല്യാണ വീട്ടുകാർ കരുതുക. എന്നാലിനി പരിചയമില്ലാത്തവർ വിവാഹ ചടങ്ങുകൾക്കിടയിൽ കാണപ്പെടുന്നുണ്ടെങ്കിൽ ഒന്ന് സൂക്ഷിക്കേണ്ടതുണ്ട്. കാരണം ഇവർ ഓസിനു പുട്ടടിക്കാൻ വന്നവരാകില്ല.

വിവാഹത്തിനും ഗൃഹപ്രവേശത്തിനുമൊക്കെ ക്ഷണിച്ചില്ലെങ്കിലും അതിഥികളായി എക്സൈസ് ഉദ്യോഗസ്ഥർ ഇനി വീടുകളിലും ചടങ്ങു നടക്കുന്ന വേദികളിലും എത്തും. ആഘോഷവേളകളിൽ മദ്യത്തിന്റെയും മറ്റ് ലഹരി വസ്തുക്കളുടെയും ഉപഭോഗം കുറയ്ക്കാനും ബോധവത്കരണത്തിനുമാണ് ഇവർ ക്ഷണിക്കാതെ തന്നെ വരുന്നത്. മദ്യത്തിന്റെയും ലഹരിവസ്തുക്കളുടെയും വ്യാപനം തടയാൻ നടപ്പാക്കിവരുന്ന വിമുക്തി പദ്ധതിയുടെ ഭാഗമായാണ് ഈ ക്ഷണിക്കപ്പെടാത്ത വരവ് . ഇന്ന് വിവാഹത്തിന് മുൻപുള്ള ബാച്ചിലർ പരിപാടികളും അതുപോലെ വിവാഹം, വിവാഹ നിശ്ചയം, തുടങ്ങി എല്ലാ ആഘോഷങ്ങളിലും ഇന്ന് മദ്യം ഒഴിച്ചുകൂടാനാകാത്ത ഒന്നാണ്. സുഹൃത്തുക്കളുടെയും ബന്ധുക്കളുടെയും മറ്റും വിവാഹസത്കാരവും ഗൃഹപ്രവേശം പോലുള്ള ചടങ്ങുകളും ഉത്സവാഘോഷങ്ങളുമാണ് പുതുതലമുറയെ മദ്യപിക്കാനും ലഹരി ഉപയോഗിക്കാനും പലപ്പോഴും പ്രേരിപ്പിക്കുന്നത്. വീര്യം കൂട്ടാൻ വ്യാജമദ്യം നിർമ്മിച്ച് ആഘോഷിക്കുന്നവരും ഇന്ന് കുറവല്ല. ഇത് ദുരന്തങ്ങൾക്ക് വഴിവയ്ക്കാനുളള സാദ്ധ്യതയും വളരെ കൂടുതലാണ്. അത് തടയുകയാണ് ഈ പുതിയ നീക്കത്തിന്റെ ലക്‌ഷ്യം. എക്സൈസ് റേഞ്ച് ഓഫീസുകളിലും വിമുക്തി പ്രവ‌ർത്തന ചുമതലയുള്ളവരും സിവിൽ എക്സൈസ് ഓഫീസർമാരും ഇനി മുതൽ ഗൃഹസമ്പർക്ക പരിപാടിയിൽ പങ്കെടുക്കും.

ആഘോഷങ്ങളെ തടസപ്പെടുത്തുകയോ ആരെയും ബുദ്ധിമുട്ടിക്കുകയോ അല്ല ഗൃഹസമ്പർക്ക പരിപാടിയിലൂടെ ലക്ഷ്യമിടുന്നത്. മദ്യത്തിന്റെയും ലഹരി വസ്തുക്കളുടെയും ദൂഷ്യവശങ്ങളെപ്പറ്റി ബോധവത്കരിക്കുകയും പുതിയതലമുറയെ നേർവഴിക്ക് നയിക്കുകയുമാണ് പുതിയ പദ്ധതി ഉദ്ദേശിക്കുന്നത് . എൻഫോഴ്സ്മെന്റ് പ്രവർത്തനങ്ങൾക്കൊപ്പം ബോധവത്കരണവും ലഹരി ഉപയോഗത്തിന് കുറവ് വരുത്താൻ അത്യന്തം അനിവാര്യമാണ്. ഇന്ന് പല രീതിയിൽ ബോധവത്കരണ പരിപാടികൾ പോലീസും മറ്റും സംഘടിപ്പിക്കുന്നുണ്ടെങ്കിലും ഇവയൊക്കെ പലപ്പോഴും ലക്‌ഷ്യം കാണാറില്ല. മറിച്ച് ഒരു ചെവിയിൽ കുടി കേട്ട് മറു ചെവികൊണ്ട ഉപേക്ഷിക്കുന്ന തലമുറയാണ് ഇന്നുള്ളത്. ആയതിനാൽ തന്നെ ബോധവത്കരണം ഒരു പരിധി വരെ മാത്രമേ ലക്‌ഷ്യം കാണുകയുള്ളു. നിയന്ത്രിക്കാൻ അധികാരമുള്ളവർ ഉണ്ടെങ്കിൽ തീർച്ചയായും അമിത ഉപയോഗം തടയാൻ സാധിക്കുമെന്നതിൽ സംശയമില്ല. ഇന്നത്തെ തലമുറ ഉപദേശങ്ങൾ ചെവിക്കൊള്ളാൻ പലപ്പോഴും ഇഷ്ട്ടപെടാറില്ല. ഉപദേശത്തിനപ്പുറം കർശന നടപടികൾ കൂടിയായാൽ തീർച്ചയായും അമിത ലഹരി വസ്തുക്കളുടെ ഉപയോഗത്തിനും അജുവഴി ഉണ്ടാകുന്ന കുട്ടാ കൃത്യങ്ങൾക്കും അറുതി ഉണ്ടാകുമെന്നതിൽ സംശയമില്ല. ഇനി ക്ഷണിക്കപ്പെടാത്ത അതിഥികൾ നമ്മുടെ ആഘോഷങ്ങൾക്കിടയിൽ കടന്നു വന്നാലും ഭയപ്പെടേണ്ടതില്ല, വിമര്ശിക്കേണ്ടതുമില്ല. അവർ എത്തുന്നത് നശിച്ചുപോകുന്നു തലമുറയെ തിരികെ കൊണ്ട് വരാൻ തന്നെയാണ്.