കുടുംബ ജീവിതം വളരെയധികം പൊരുത്തപെടലുകളും വിട്ടുകൊടുക്കലുകളും ചേർന്നതാണെന്നു ഇന്നത്തെ പല ഭാര്യ ഭർത്താക്കന്മാരും മനസ്സിലാക്കാറില്ല. പലപ്പോഴും ചെറിയ ചെറിയ വഴക്കുകളും പിണക്കങ്ങളുമൊക്കെ ചെന്നെത്തി നിൽക്കുന്നത് വലിയ അപകടങ്ങളിൽ ആണ്. ഇത്തരം വഴക്കുകളിലെ വില്ലന്മാർ വളരെ ചെറിയ സംഭവങ്ങളോ വസ്തുക്കളോ ആയിരിക്കും. അത്തരമൊരു വാർത്തയാണ് അടുത്തിടെ മാധ്യമങ്ങളിൽ നിറഞ്ഞത്. ഭർത്താവ് ദേഷ്യം നിയന്ത്രിക്കാനാകാതെ ഭാര്യയുടെ കൈ തല്ലിയൊടിച്ചു. കരണക്കാരനായത് ഒരു മസാല ദോശയും.

മസാലദോശ, പാത്രത്തിൽ നൽകാത്തതിന് ഭാര്യയുടെ കൈ തല്ലിയൊടിച്ച ഭർത്താവ് അറസ്റ്റിലായി. കൊരട്ടി കാതിക്കുടം സ്വദേശി കണ്ഠരുമഠത്തിൽ രവിയാണ് (50) അറസ്റ്റിലായത്. ജോലികഴിഞ്ഞെത്തിയപ്പോൾ രവി വാങ്ങിക്കൊണ്ടുവന്ന മസാലദോശ പൊതിഞ്ഞുകൊണ്ടുവന്ന പൊതിയിൽ തന്നെ നൽകിയതിനാണ് ഭാര്യ ലതയെ (40) മദ്യലഹരിയിലായിരുന്ന ഭർത്താവ് ക്രൂരമായി മർദിച്ചതെന്ന് പൊലീസ് പറയുന്നു. അലുമിനിയം മുഴക്കോലുകൊണ്ടാണ് ഭാര്യയെ ആക്രമിച്ചത്.വലതു കൈ ഒടിയുകയും കൈക്കുഴ തെറ്റുകയും ചെയ്ത ലതയെ ആശുപത്രിയിൽ വിദഗ്ദ്ധ ചികിത്സയ്ക്ക് വിധേയമാക്കി. പൊലീസ് അന്വേഷണം ആരംഭിച്ചതോടെ രവി ഒളിവിൽ കഴിഞ്ഞുവരികയായിരുന്നു. പ്രതിയെ റിമാൻഡ് ചെയ്തു.

മദ്യം ആണ് ദാമ്പത്യ ജീവിതത്തിലെ പ്രധാന വില്ലൻ. മദ്യവും ലഹരിയും തകർക്കുന്ന കുടുംബങ്ങൾ ഇന്ന് ഒട്ടും കുറവല്ല. വേർപിരിയലിനുള്ള അപേക്ഷകളിൽ മിക്കവാറും ഭാര്യമാർ ഉന്നയിക്കുന്ന പ്രധാന കാരണം പലപ്പോഴും അമിത മദ്യപാനം തന്നെയായിരിക്കും. അമിത മദ്യപാനവും ലഹരി വസ്തുക്കളുടെ ഉപയോഗവും പലപ്പോഴും ചെന്നെത്തിക്കുന്നത് ഭാര്യയെയും കുഞ്ഞുങ്ങളെയും അക്രമിക്കുന്നതിലും ഗുരുതര പരിക്കേൽപ്പിക്കുന്നതിലും ആയിരിക്കും. ശാരീരികമായ ഉപദ്രവം മാത്രമല്ല മാനസിക പീഡനങ്ങൾക്കും ലഹരി കാരണമാകുന്നു. ഭാര്യ ഭത്തൃ ബന്ധത്തെ മാത്രമല്ല കുട്ടികളുടെ മാനസിക വളർച്ചയെയും പഠനത്തെയും ഇത് പ്രതികൂലമായി ബാധിക്കുന്നു. മേൽപ്പറഞ്ഞ വാർത്ത സൂചിക്കുന്നതുപോലെ പലപ്പോഴും മദ്യപാനികൾ അക്രമാസക്തരാകുന്നത് വളരെ ചെറിയ കാരണങ്ങൾ മൂലമാണ്. കോപം നിയന്ത്രിക്കാനാകാതെ ഇവർ ചെയ്തുകൂട്ടുന്ന കാര്യങ്ങളും പലപ്പോഴും പരിധി കടക്കുന്നവ ആയിരിക്കും. പരസ്പ്പര ധാരണയും സ്നേഹവും ദാമ്പത്യ ജീവിതത്തിലെ നട്ടെല്ലാകുന്നതുപോലെ തന്നെ പ്രധാനമാണ് അമിത മദ്യപാനവും ലഹരി ഉപയോഗവും ഒഴിവാക്കേണ്ടതും. ഇവ രണ്ടും പരിധി കടക്കുമ്പോൾ ശിഥിലമാകുന്നതും തകരുന്നതും ഒരു കുടുംബം മുഴുവനായി തന്നെയാണ്. സന്തോഷവും സംതൃപ്തിയും നിറഞ്ഞ കുടുംബാന്തരീക്ഷം സൃഷ്ട്ടിക്കാൻ ലഹരിയോടും അമിത മദ്യപാനത്തോടും വിട പറയുക തന്നെ വേണം. കുടുംബത്തിലെ പാഠങ്ങളാണ് കുട്ടികൾ വളരുമ്പോൾ പ്രാവർത്തികമാക്കുന്നത് എന്നോർക്കേണ്ടത് രക്ഷിതാക്കളുടെ തന്നെ ഉത്തരവാദിത്തമാണ്.