രണ്ടു സുഹൃത്തുക്കളെ കൊലപ്പെടുത്തി ജയിലിൽ കഴിയുന്ന അനിലയുടെ നിലവിലെ അവസ്ഥ എന്താണ്..?സിലിക്കൺ വാലി∙ കലിഫോർണിയ ഇരട്ട കൊലപാതക കേസിൽ പ്രതിയായ അനില ബേബിയുടെ വിചാരണ തീയതി ഒരു മാസം നേരത്തെയാക്കി നിശ്ചയിച്ചതായി പ്രതിഭാഗം അഭിഭാഷകൻ ഷോൺ ജോർജ് അറിയിച്ചു.കേസിന്റെ അടുത്ത വാദം കേൾക്കൽ നവംബർ 17, 2026-ൽ നിന്ന് ഒക്ടോബർ 8, 2026-ലേക്ക് മാറ്റണമെന്ന് ആവശ്യപ്പെട്ട് അദ്ദേഹം കോടതിയിൽ സമർപ്പിച്ച അപേക്ഷ ജഡ്ജി ജോണി സെപെഡ ഗോഗോ അംഗീകരിക്കുകയായിരുന്നു.

അപേക്ഷ സമർപ്പിക്കുന്നതിന് മുൻപ് ഡെപ്യൂട്ടി ഡിസ്ട്രിക്റ്റ് അറ്റോർണി മക്കിയൂണുമായ് ചർച്ച ചെയ്തിരുന്നുവെന്നും, കേസ് ഒക്ടോബർ 8-ലേക്ക് മാറ്റുന്നതിൽ പ്രോസിക്യൂഷന് എതിർപ്പില്ലായിരുന്നുവെന്നും ഷോൺ ജോർജ് വ്യക്തമാക്കി. ഇതിനെ തുടർന്ന് ഡിപ്പാർട്ട്മെന്റ് 31-ൽ ഒക്ടോബർ 8, 2026-ന് രാവിലെ 8:30-ലേക്ക് കേസ് പുനർനിശ്ചയിച്ചതായി കോടതി അറിയിച്ചു.
എങ്കിലും, കേസിൽ മാനസിക അസ്ഥിരത ചൂണ്ടിക്കാണിച്ചുള്ള വാദവുമായോ അതോ കുറഞ്ഞ ശിക്ഷയ്ക്കായുള്ള പ്ലീ ബാർഗെയ്ൻ വഴിയാണോ പ്രതിഭാഗം മുന്നോട്ട് പോകുന്നത് എന്നത് സംബന്ധിച്ച് ഷോൺ ജോർജ് നിലവിൽ പ്രതികരിച്ചിട്ടില്ല.

പ്രോസിക്യൂഷന് കേസിൽ വിജയിക്കാനും ഇരകൾക്ക് നീതി ഉറപ്പാക്കാനും തക്ക ശക്തമായ തെളിവുകൾ ഉണ്ടെന്നിരിക്കെ, കുറ്റം സമ്മതിച്ചുള്ള പ്ലീ ബാർഗെയ്ൻ സ്വീകരിക്കുന്നത് പ്രതിഭാഗത്തിന് കൂടുതൽ ഗുണം ചെയ്തേക്കുമെന്ന് ചില നിയമ വിദഗ്ധർ അഭിപ്രായപ്പെടുന്നു. കോടതിയിൽ വിചാരണ നേരിട്ട് കടുത്ത ശിക്ഷ ലഭിക്കുന്നതിനുള്ള സാധ്യത ഒഴിവാക്കാൻ ഇത് സഹായിച്ചേക്കാം.അതെസമയം എന്താണ് കൊലപാതകത്തിന് പുന്നിലെ കാരണമെന്ന് ഇനിയും പുറത്തുവിടാൻ അന്വേഷകർ തയ്യാറായിട്ടില്ല. ഇത് അന്വേഷണത്തിന് ശേഷം മാത്രമേ പുറത്തുവിടൂ. "ശരിക്കും, ഈ കേസ്സിലെ ഏറ്റവും വലിയ സങ്കടം ഈ കുടുംബങ്ങൾ മികച്ച സുഹൃത്തുക്കളായിരുന്നു എന്നതാണ്.

ഒരാൾ എന്തുകൊണ്ടാണ് തന്റെ സുഹൃത്തുക്കളോട് ഇത് ചെയ്തതെന്ന ചോദ്യത്തിന് ഉത്തരം ലഭിക്കണമെന്ന് കുടുംബാംഗങ്ങളും സുഹൃത്തുക്കളും ആഗ്രഹിക്കുന്നുണ്ട്. ഈ കേസന്വേഷണം പൂർത്തിയാകുമ്പോൾ അവർക്ക് ആവശ്യമായ ഉത്തരങ്ങൾ ലഭിക്കുമെന്ന് ഞാൻ പ്രത്യാശിക്കുന്നു," എന്നാണ് ഡെപ്യൂട്ടി ഡിസ്ട്രിക്റ്റ് അറ്റോർണി മാരിസ മക്‌കിവോൺ പറഞ്ഞത് . 90 മിനിറ്റിന്റെ വ്യത്യാസത്തിലാണ് രണ്ട് കൊലപാതകങ്ങൾ നടന്നതെന്ന് പോലീസ് പറയുന്നു.മുൻകൂട്ടി തയ്യാറെടുത്തുമുള്ള കൊലപാതകമാണ് യുഎസിലെ നിയമവ്യവസ്ഥയിൽ ഫസ്റ്റ് ഡിഗ്രി കൊലപാതകം എന്ന് വിവച്ഛേദിക്കുന്നത്.

വിഷം നൽകി കൊല്ലുക, പീഡിപ്പിച്ച് കൊല്ലുക, ഒളിഞ്ഞിരുന്ന് ആക്രമിക്കുക, സ്ഫോടകവസ്തുക്കൾ ഉപയോഗിക്കുക, കാറിലിരുന്ന് വെടിയുതിർക്കുക തുടങ്ങിയവയെല്ലാം ഫസ്റ്റ് ഡിഗ്രി കൊലപാതകങ്ങളാണ്.