ചെറുകിട വ്യവസായം തുടങ്ങാന്‍ വായ്പ തരപ്പെടുത്തി നല്‍കാമെന്ന് പറഞ്ഞ് 30 പേരില്‍ നിന്നും പണം വാങ്ങി തട്ടിപ്പ് നടത്തിയ യുവതിയെ അറസ്റ്റ് ചെയ്തു. പത്തനംതിട്ട, ചെന്നീര്‍ക്കര തുമ്പമണ്‍ ഏറം മുറിയില്‍ ഊന്നുകല്‍, കണ്ണങ്കര വീട്ടില്‍ ആതിരയെ(39) യാണ് ചെങ്ങന്നൂര്‍ പോലീസ് അറസ്റ്റുചെയ്തത്. ചെങ്ങന്നൂര്‍ അങ്ങാടിക്കല്‍ ഭാഗം കേന്ദ്രമാക്കിയായിരുന്നു തട്ടിപ്പ്.

യുവതി ഇവിടെ എത്തിയത് പത്തനാപുരം കേന്ദ്രമാക്കി പ്രവര്‍ത്തിക്കുന്ന പവര്‍ടെക് കമ്പനിയുടെ പ്രതിനിധിയാണെന്ന് പറഞ്ഞാണ്. ആഴ്ചയില്‍ 300 രൂപ വീതം എഴുപതിനായിരം രൂപ നല്‍കിയാല്‍ ഒരുലക്ഷം രൂപ കമ്പനി നല്‍കുമെന്ന വാഗ്ദാനം നല്‍കിയായിരുന്നു തട്ടിപ്പ്. പണം കൊടുത്തവര്‍ക്ക് ഒരാഴ്ച കഴിഞ്ഞപ്പോള്‍ സംശയം തോന്നുകയും അവര്‍ സ്ഥാപനവുമായി ബന്ധപ്പെടുകയും ചെയ്തു. സ്ഥാപനത്തിന്റെ പ്രതിനിധി സ്ഥലത്തെത്തിയതോടെ യുവതിയുടെ കള്ളി വെളിച്ചത്തായി.

പത്തനാപുരം ഭാഗത്തു നിന്നാണ് യുവതിയെ അറസ്റ്റുചെയ്തത്. റിമാന്‍ഡിലായ യുവതി പത്തനാപുരം ഭാഗത്തുനിന്ന് സമാനമായ തട്ടിപ്പ് നടത്തി 40 ദിവസം റിമാന്‍ഡില്‍ കഴിഞ്ഞിരുന്നു. അതിനുശേഷം പുറത്തിറങ്ങിയപ്പോഴാണ് ചെങ്ങന്നൂര്‍ ഭാഗത്ത് സമാന തട്ടിപ്പ് നടത്തിയത്. മാന്നാറിലും ഇവര്‍ തട്ടിപ്പ് നടത്തിയതായി പോലീസ് സംശയിക്കുന്നു. ചെങ്ങന്നൂരില്‍ ഇപ്രകാരം 30 പേരെയാണ് പറ്റിച്ചത്.

ചെങ്ങന്നൂര്‍ പ്രിന്‍സിപ്പല്‍ എസ്‌ഐ എസ്.വി. ബിജു, എസ്‌ഐ മുരളീധരന്‍ പിള്ള, പ്രൊബേഷണറി എസ്‌ഐ വിഷ്ണു, വനിതാ പ്രൊബേഷണറി എസ്‌ഐ അലീന, വനിതാ സിവില്‍ പോലീസ് ഓഫീസര്‍മാരായ രാജി, ബിന്ദു എന്നിവരാണ് കേസന്വേഷണത്തിനു നേതൃത്വം നല്‍കിയത്. യുവതിയെ റിമാന്‍ഡ് ചെയ്തു.