എഡിജിപി ടോമിന്‍ തച്ചങ്കരി അധ്യക്ഷനായ 11 അംഗ സമിതി, കേരള പൊലീസിന്റെ 180 കോടി രൂപയുടെ വിവാദ ഗതാഗത പദ്ധതിക്കുള്ള ടെന്‍ഡര്‍ റദ്ദാക്കാന്‍ ശുപാര്‍ശ ചെയ്തു. പകരം പുതിയ രാജ്യാന്തര ടെന്‍ഡര്‍ വിളിക്കാനാണ് നിര്‍ദേശം. സ്വകാര്യ കമ്പനിക്കു കൊള്ളലാഭം ഉറപ്പാക്കുന്ന വ്യവസ്ഥ മാറ്റണമെന്നും ഡിജിപി ലോക്‌നാഥ് ബെഹ്‌റയ്ക്കു കൈമാറിയ റിപ്പോര്‍ട്ടില്‍ ശുപാര്‍ശയുണ്ട്.

സ്വകാര്യ കമ്പനികളെ പിന്നില്‍ നിര്‍ത്തി , ആയിരത്തോളം സ്ഥലങ്ങളില്‍ ക്യാമറകള്‍ സ്ഥാപിച്ചുളള ഡിജിറ്റല്‍ ഗതാഗത മേല്‍നോട്ട പദ്ധതി (ഇന്റഗ്രേറ്റഡ് ഡിജിറ്റല്‍ ട്രാഫിക് എന്‍ഫോഴ്‌സ്‌മെന്റ് സിസ്റ്റം) സ്വന്തമാക്കാന്‍ സര്‍ക്കാര്‍ സ്ഥാപനങ്ങളായ കെല്‍ട്രോണും സിഡ്‌കോയുമാണ് രംഗത്തുണ്ടായിരുന്നത്.

ഗതാഗത നിയമലംഘനങ്ങള്‍ ക്യാമറ വഴി പിടികൂടുന്നതാണെങ്കില്‍, പിഴ ട്രഷറിയില്‍ വരുമ്പോള്‍ 90 % തുക കമ്പനിക്കും 10 % മാത്രം സര്‍ക്കാരിനും എന്നതായിരുന്നു വ്യവസ്ഥ. കമ്പനിക്ക് ആദ്യവര്‍ഷം തന്നെ മുടക്കുമുതല്‍ തിരിച്ചുകിട്ടുകയും തുടര്‍ന്ന് 9 വര്‍ഷം വരുമാനത്തിന്റെ 90 % ലഭിക്കുകയും ചെയ്യുമായിരുന്നു. പകരം വരുമാനത്തിന്റെ 50 % എങ്കിലും സര്‍ക്കാരിനു ലഭിക്കണമെന്നും വരുമാനത്തിനു സ്ലാബ് സമ്പ്രദായം വേണമെന്നും പുതിയ ടെന്‍ഡറില്‍ വ്യവസ്ഥ ചെയ്യണമെന്നാണ് സമിതിയുടെ ശുപാര്‍ശ.

കെല്‍ട്രോണിനും സിഡ്‌കോയ്ക്കുമായി സാങ്കേതിക സമിതിയില്‍ ഐപിഎസ് ഉദ്യോഗസ്ഥര്‍ 2 ചേരിയായി മത്സരിച്ചു മാര്‍ക്ക് നല്‍കിയതു വിവാദമായിരുന്നു. സമിതിയില്‍ ഐജി ജി. ലക്ഷ്മണ്‍, ഡിഐജി പി. പ്രകാശ്, എസ്പി ജോണ്‍ കുട്ടി, ട്രാഫിക് എസി സുല്‍ഫിക്കര്‍ എന്നിവര്‍ക്കു പുറമേ ഐടി മിഷന്‍, സിഡാക്, മോട്ടര്‍ വാഹന വകുപ്പ് എന്നിവയുടെ പ്രതിനിധികളുമുണ്ട്. ഐജിയും ഡിഐജിയും രണ്ടു ചേരിയിലായിരുന്നു.