വീണ്ടും സ്ത്രീധന പീഡന വാർത്തയാണ് പുറത്തു വരുന്നത് . കേരളത്തിൽ ഇങ്ങനെയുള്ള സംഭവങ്ങൾ ആവർത്തിക്കുമ്പോഴും വേദനകൾ തിന്നു ജീവിക്കുന്നത് പാവം പെണ്മക്കളാണ് . സ്ത്രീധനത്തിന്റെ പേരില്‍ നവവധുവിന് ഭര്‍ത്താവിന്റെയും ഭര്‍തൃവീട്ടുകാരുടെയും വക മൃഗീയ പീഡനം. കൊല്ലം നീണ്ടകര മണ്ണാത്തറ സ്വദേശിനിയായ 24 കാരിക്കാണ് ഭര്‍ത്താവില്‍നിന്ന് മനസ്സാക്ഷിയെ ഞെട്ടിക്കുന്ന ക്രൂരമര്‍ദനമേറ്റത്. അടിവയറ്റില്‍ ചവിട്ടുകയും തലയില്‍ കുക്കറുകൊണ്ട് അടിക്കുകയും സ്വകാര്യഭാഗങ്ങളില്‍ ഉപദ്രവിക്കുകയും ചെയ്തതായി യുവതി വെളിപ്പെടുത്തി.

ഗുരുതരമായി പരിക്കേറ്റ അഞ്ജു നിലവില്‍ കൊല്ലം ജില്ലാ ജനറല്‍ ആശുപത്രിയില്‍ ചികിത്സയിലാണ്. സംഭവത്തില്‍ ഭര്‍ത്താവ് നന്ദു, ഇയാളുടെ മാതാപിതാക്കള്‍ എന്നിവര്‍ക്കെതിരെ ചവറ പോലീസ് കേസെടുത്തു.നാലുമാസം മുന്‍പായിരുന്നു യുവതിയുടെയും നന്ദുവിന്റെയും വിവാഹം. ജൂലൈ 27നായിരുന്നു വിവാഹം എന്നാല്‍, ഏഴുദിവസം തികയുംമുമ്പേ സ്ത്രീധനം കുറഞ്ഞുപോയെന്ന പേരില്‍ ഭര്‍തൃവീട്ടുകാര്‍ യുവതിയെ മാനസികമായും ശാരീരികമായും പീഡിപ്പിച്ചുതുടങ്ങി. അഞ്ജു സ്വന്തം വീട്ടിലേക്കു പോയെങ്കിലും ഭർതൃവീട്ടുകാർ തിരികെ വിളിച്ചുകൊണ്ടുവന്നു.

വിവാഹം കഴിഞ്ഞ് ഒരുമാസത്തിനുശേഷം സൗദിയിലേക്ക് പോയ നന്ദു, തൊട്ടുപിന്നാലെ അഞ്ജുവിനെയും അങ്ങോട്ടേക്ക് കൊണ്ടുപോയി. എന്നാല്‍, വിദേശത്തെത്തിയതോടെ പീഡനത്തിന്റെ വ്യാപ്തി വര്‍ധിക്കുകയായിരുന്നു.വീട്ടിലെ ഇടികല്ല്, പ്രെഷര്‍ കുക്കര്‍, ലാപ്ടോപ്പിന്റെ ചാര്‍ജര്‍ വയറുകള്‍ തുടങ്ങി കയ്യില്‍ കിട്ടിയ വസ്തുക്കളെല്ലാം ഉപയോഗിച്ചായിരുന്നു മര്‍ദനം.പ്രെഷര്‍ കുക്കറുകൊണ്ട് തലയ്ക്കടിച്ചതിനെത്തുടര്‍ന്ന് അഞ്ജുവിന് ഗുരുതരമായി പരിക്കേറ്റു.അടിവയറ്റില്‍ ചവിട്ടുകയും സ്വകാര്യഭാഗങ്ങളില്‍ ക്രൂരമായി ആക്രമിക്കുകയും ചെയ്തതായി യുവതി വേദനയോടെ ഓര്‍ക്കുന്നു.

യുവതിയുടെ ശരീരത്തിലാകമാനം മര്‍ദനമേറ്റതിന്റെ ആഴത്തിലുള്ള പാടുകളുണ്ട്.മര്‍ദനത്തിനുപുറമേ, ക്രൂരമായ മനഃശാസ്ത്രപരമായ പീഡനങ്ങള്‍ക്കും യുവതി ഇരയായി. കഴുത്തില്‍ കത്തിവെച്ച് ഭീഷണിപ്പെടുത്തി, താന്‍ മോശം സ്ത്രീയാണെന്ന് കുറ്റസമ്മതം നടത്തുന്ന തരത്തിലുള്ള ശബ്ദരേഖകള്‍ നന്ദു നിര്‍ബന്ധിച്ച് റെക്കോര്‍ഡ് ചെയ്യിപ്പിച്ചു. ഈ വ്യാജ ശബ്ദരേഖകള്‍ അഞ്ജുവിന്റെ വീട്ടുകാര്‍ക്കും നാട്ടുകാര്‍ക്കും അയച്ചുകൊടുത്ത് യുവതിയെ സമൂഹത്തില്‍ അപമാനിക്കാനും ശ്രമിച്ചു.