മദ്യപാനത്തിനിടെയുണ്ടായ അടിപിടിയില്‍ ഒരാള്‍ മരിച്ചു; ഗുരുതരമായി പരിക്കേറ്റ മറ്റൊരാള്‍ ചികിത്സയില്‍
പുല്‍പ്പള്ളിയില്‍ മദ്യപാനത്തിനിടെയുണ്ടായ അടിപിടിയില്‍ വെട്ടേറ്റ് ചികിത്സയിലായിരുന്നയാള്‍ മരിച്ചു. താമരശേരി കൂടത്തായി സ്വദേശി ലൈജുവാണ് മരിച്ചത്. ആക്രമണത്തില്‍ ഗുരുതരമായി പരിക്കേറ്റ കൊല്ലം തഴവ സ്വദേശി ഷഫീഖ് അബ്ദുല്‍ സലാം ചികിത്സയില്‍ തുടരുകയാണ്. സംഭവത്തില്‍ രണ്ട് പേരെ പൊലീസ് കസ്റ്റഡിയില്‍ എടുത്തു.
വയനാട് പുല്‍പ്പള്ളി ആനപ്പാറയിലെ വാടക കോട്ടേജില്‍ ഇന്നലെ രാത്രി ഒന്‍പതരയോടെയായിരുന്നു സംഭവം. ലൈജുവും ഷഫീഖും ഒരുമിച്ചിരുന്ന് മദ്യപിക്കുകയായിരുന്നു. ഈ സമയം തമിഴ്‌നാട് നാഗപട്ടണം സ്വദേശിയായ പനീര്‍ സെല്‍വം ഇവരുടെ മുറിയിലേയ്ക്ക് കടന്നുവരികയും ഇവര്‍ തമ്മില്‍ വാക്കുതര്‍ക്കമുണ്ടാകുകയുമായിരുന്നു. ഇതിനിടെ പനീര്‍ സെല്‍വം തന്റെ സുഹൃത്തായ ശേഖറിനെ സ്ഥലത്തേയ്ക്ക് വിളിച്ചുവരുത്തി.
തുടര്‍ന്ന് ഇരുവരും ചേര്‍ന്ന് ലൈജുവിനെയും ഷഫീഖിനെയും ആയുധം ഉപയോഗിച്ച് ക്രൂരമായി വെട്ടിപരിക്കേല്‍പ്പിക്കുകയായിരുന്നുവെന്നാണ് വിവരം. പിന്നാലെ ഗുരുതരമായി പരിക്കേറ്റ ലൈജുവിനെയും ഷഫീഖിനെയും കോഴിക്കോട് മെഡിക്കല്‍ കോളേജില്‍ പ്രവേശിപ്പിച്ചിരുന്നു. ഇവിടെ ചികിത്സയിലിരിക്കെയാണ് ലൈജുവിന്റെ മരണം. സംഭവത്തില്‍ പനീര്‍ സെല്‍വത്തിനെയും ശേഖറിനെയും പുല്‍പ്പള്ളി പൊലീസ് കസ്റ്റഡിയിലെടുത്തു.
https://www.facebook.com/Malayalivartha
