ചാക്കില്‍ പൊതിഞ്ഞ മൃതദേഹം പിതാവിന്റേതെന്ന് അറിയാതെ മകള്‍ കാഴ്ചക്കാരിയായി എത്തിമടങ്ങി!
സ്വന്തം പിതാവിന്റെതാണെന്നറിയാതെ മറയൂര്‍ ബാബുനഗറില്‍ വൈദ്യുത ഓഫിസിന് പിന്‍വശത്ത് ചാക്കില്‍ പൊതിഞ്ഞ് ഉപേക്ഷിച്ച നിലയില്‍ കണ്ടെത്തിയ മാരിയപ്പന്റെ മൃതദേഹം ജനക്കൂട്ടത്തിനൊപ്പമെത്തി മകള്‍ ഉഷ തമ്പിദുരൈ കണ്ടു മടങ്ങിയിരുന്നു.
രാവിലെ നാട്ടുകാര്‍ക്കൊപ്പം ഉഷയും, ഗുരുതരമായി പരുക്കേല്‍പിച്ചിരുന്ന മൃതദേഹം കണ്ടെങ്കിലും തിരിച്ചറിയാന്‍ കഴിഞ്ഞിരുന്നില്ല. പിന്നീട് ഒരു മണിക്കൂറിനുശേഷം പൊലീസും മറ്റ് ചിലരും മൃതദേഹത്തിന്റെ ഫോട്ടോ കാണിച്ചപ്പോഴാണ് അത് തന്റെ പിതാവാണെന്ന് മകള്‍ ഉഷ തമ്പിദുരൈ തിരിച്ചറിഞ്ഞത്.
അതിനിടെ ജില്ലയിലെ ശാസ്ത്രീയ പരിശോധന വിദഗ്ധര്‍ക്കും വിരലടയാള വിദഗ്ധര്‍ക്കും നിന്നുതിരിയാന്‍ പറ്റാത്തവിധത്തില്‍ തിരക്കുണ്ടായ ദിവസമായിരുന്നു കഴിഞ്ഞ ദിവസം! കൊലപാതകങ്ങളില്‍ ഇടുക്കി ജില്ല മുങ്ങിയപ്പോള്‍ ശാസ്ത്രീയ പരിശോധന നടത്തുന്നവരും വിരലടയാള വിദഗ്ധരും തിങ്കളാഴ്ച മാത്രം ഓടിയത് ഒട്ടേറെ കിലോമീറ്ററുകള്‍. വണ്ടിപ്പെരിയാര്‍, മറയൂര്‍, തൂക്കുപാലം, കമ്പംമെട്ട് എന്നിവിടങ്ങളിലെത്തി പരിശോധന നടത്താന്‍ പാടുപെട്ട സംഘം തിങ്കള്‍ വൈകിട്ടാണ് മറയൂരിലെ അന്വേഷണം പൂര്‍ത്തിയാക്കിയത്.
ഗൃഹനാഥയെ മരിച്ച നിലയില്‍ കണ്ടെത്തിയ വണ്ടിപ്പെരിയാറില്‍ രാവിലെ ശാസ്ത്രീയ പരിശോധനാ വിദഗ്ധരും വിരലടയാള വിദഗ്ധരും എത്തി. മറയൂരില്‍ ചാക്കില്‍ പൊതിഞ്ഞു കെട്ടിയ നിലയില്‍ മൃതദേഹം കണ്ടെത്തിയ കേസ് അന്വേഷിക്കാനാണ് പിന്നീടു പുറപ്പെട്ടത്. ശരീരമാസകലം വെട്ടും കുത്തും ഏറ്റ നിലയിലാണ് മറയൂരില്‍ മൃതദേഹം കണ്ടെത്തിയത്. ഈ കേസില്‍ ശാസ്ത്രീയ പരിശോധന നടത്താന്‍ മണിക്കൂറുകള്‍ എടുത്തു. തുടര്‍ന്ന് കമ്പംമെട്ടില്‍ വാക്കുതര്‍ക്കത്തിനിടെ പരുക്കേറ്റതിനെത്തുടര്‍ന്നു മരിച്ച ടോമിയുടെ മൃതദേഹം പരിശോധിക്കാന്‍ വിദഗ്ധ പരിശോധനാ സംഘം തൂക്കുപാലത്ത് എത്തി.
കഴിഞ്ഞ 2 മാസത്തിനിടെ ജില്ലയില്‍ റിപ്പോര്‍ട്ട് ചെയ്തത് 7 കൊലപാതകക്കേസുകളാണ്. ജനുവരിയില്‍ 3 കേസുകളും ഈ മാസം 4 കേസുകളും റിപ്പോര്‍ട്ട് ചെയ്തു. 4 കേസുകള്‍ കഴിഞ്ഞ 2 ദിവസത്തിനിടെയാണ് റിപ്പോര്‍ട്ട് ചെയ്തത്. മറയൂരില്‍ 70 വയസ്സ് പ്രായമുള്ള ആളെ വീട്ടില്‍ വച്ചു വെട്ടിക്കൊലപ്പെടുത്തി ചാക്കില്‍ കെട്ടി വൈദ്യുതി ഓഫിസിന് സമീപം മൃതദേഹം ഉപേക്ഷിച്ച നിലയില്‍ കണ്ടെത്തിയ സംഭവമാണ് ഇതിലൊന്ന്.
മറയൂര്‍ ബാബുനഗറില്‍ മുന്‍ പഞ്ചായത്ത് വൈസ് പ്രസിഡന്റും നിലവിലെ പഞ്ചായത്ത് അംഗവുമായ ഉഷാ തമ്പിദുരൈയുടെ പിതാവ് മാരിയപ്പനെയാണ് (70 മരിച്ച നിലയില്‍ കണ്ടെത്തിയത്. കമ്പംമെട്ട് അച്ചക്കടയില്‍ മര്‍ദനമേറ്റ് ആറ്റിന്‍കര കൊല്ലപ്പള്ളില്‍ ടോമി (49) മരിച്ചതാണ് അടുത്ത സംഭവം. വണ്ടിപ്പെരിയാര്‍ ഡൈമുക്ക് 24 പുതുവേല്‍ ഭാഗത്ത് പുന്നവേലി വീട്ടില്‍ വിക്രമന്‍ നായരുടെ ഭാര്യ വിജയമ്മയെ (50) പീഡനശ്രമത്തിനിടെ വെട്ടിക്കൊലപ്പെടുത്തിയതാണ് മറ്റൊരു കേസ്.
ഓട്ടോറിക്ഷ വാങ്ങാന്‍ പണം നല്‍കാത്തതിന് പിതാവിനെ മകന്‍ അടിച്ചുകൊന്ന സംഭവവുംജില്ലയില്‍ ഉണ്ടായി. ഉപ്പുതോട് പുളിക്കക്കുന്നേല്‍ ജോസഫാണ് (കൊച്ചേട്ടന്‍-64) മരിച്ചത്. മകന്‍ രാഹുലിനെ (32) അറസ്റ്റ് ചെയ്തു. കഴിഞ്ഞ 9-ന് ആയിരുന്നു ആ സംഭവം. മകന്റെ ക്രൂരമര്‍ദനമേറ്റ് പരുക്കേറ്റ് ചികിത്സയിലായിരുന്ന ജോസഫ് ശനിയാഴ്ചയാണ് മരിച്ചത്.
https://www.facebook.com/Malayalivartha
