കാവനാല് കടവ് പാലത്തിലൂടെയുള്ള വാഹനയാത്ര അപകടഭീഷണി ഉയര്ത്തുന്നു
മല്ലപ്പള്ളിയ്ക്കടുത്ത് കാവനാല് കടവ് പാലം പണി ദീര്ഘനാളത്തെ കാത്തിരിപ്പിനുശേഷം പൂര്ത്തിയായെങ്കിലും പാലത്തിന്റെ സമീപനപാതയില് സംരക്ഷണഭിത്തി പൂര്ണമായി നിര്മിക്കാത്തതും മുരണി കരയില് കുഴല് കിണര്, റോഡിന്റെ മധ്യത്തിലായതും പാലത്തിലൂടെയുള്ള വാഹനയാത്ര അപകടത്തിലാക്കുന്നു.
ആനിക്കാട് കരയിലെ സമീപനപാതയുടെ ഇരുവശങ്ങളിലും കോണ്ക്രീറ്റ് സുരക്ഷാ ഭിത്തികള് സ്ഥാപിച്ചെങ്കിലും 4 അടി ദൂരം ഇടവിട്ടാണ് ഇവ സ്ഥാപിച്ചത്. കോണ്ക്രീറ്റ് സുരക്ഷാ ഭിത്തി പൂര്ണമായും ഇല്ലാത്തതും വാഹനങ്ങള്ക്ക് ഭീഷണിയാണ്. ഇതിനിടയില് കൂടി ഇരുചക്രവാഹനങ്ങളും ചെറിയ വാഹനങ്ങളും കുഴിയില് പെടാനുള്ള സാധ്യതയേറെയാണ്.
അങ്ങനെ സംഭവിച്ചാല് 20 അടിയോളമുള്ള താഴ്ചയില്പെട്ട് വന് ദുരന്തമുണ്ടാകാം. മുരണി കരയിലെ സമീപനപാതയോടു ചേര്ന്നുള്ള കുഴല്കിണര് വര്ഷങ്ങള്ക്കു മുന്പുള്ളതാണ്.
സുലഭമായി വെള്ളമുള്ള കുഴല് കിണര്, റോഡില് പൂട്ടുകട്ട നിരത്തിയതോടെ ഇതിനുള്ളിലായി. അപ്രകാരം റോഡില് സ്ഥിതി ചെയ്യുന്നതിനാല് വാഹനങ്ങള് തട്ടി അപകടമുണ്ടാകാം. പ്രശ്നം പരിഹരിക്കാന് അധികൃതര് നടപടിയെടുക്കണമെന്നാണ് നാട്ടുകാരുടെ ആവശ്യം.
https://www.facebook.com/Malayalivartha