റോഡ് മുറിച്ച് കടക്കുന്നതിനിടെ ഒല്ലൂർ പനംകുറ്റിച്ചിറയ്ക്കു സമീപം ജനുവരി 29 നാണു മാള–തൃശൂർ ഫാസ്റ്റ് പാസഞ്ചർ അവിണിശേരി വള്ളിശേരി കുറ്റിക്കാട്ട് വീട്ടിൽ ജോയി (48) യെ ഇടിക്കുന്നത്.ആ അപകടം കണ്ടവരും ആദ്യം തൊട്ടവരും ഉറപ്പിച്ചത് ജോയി മരിച്ചെന്നാണ്. ജോയിയെ ഇടിച്ച കെഎസ്ആർടിസി ബസിലെ യാത്രക്കാരിയായ ആ ഡോക്ടർ അവസരോചിതമായി ഇടപെട്ടില്ലായിരുന്നുവെങ്കിൽ ആ സംശയം യാഥാർഥ്യമായേനെ . ഡോ. ടി.എസ്. സൗമ്യ ബസിലെ ജീവനക്കാരെയും കൂട്ടി ജോയിയെ ഒരു വാഹനത്തിൽ കയറ്റി. തലച്ചോറിലേക്കുള്ള ഓക്സിജൻ നിലയ്ക്കാതിരിക്കാൻ നെഞ്ചിൽ ശക്തമായി അമർത്തിയും ശ്വാസം നൽകിയും (കാർഡിയോ പൾമനറി റെസസിറ്റേഷൻ– സിപിആർ) അവർ എലൈറ്റ് ആശുപത്രിയിലേക്കു പുറപ്പെട്ടു. അപകടസ്ഥലമായ ഒല്ലൂർ പനംകുറ്റിച്ചിറയിൽ നിന്നു കൂർക്കഞ്ചേരി എലൈറ്റ് ആശുപത്രി വരെയുള്ള 15 മിനിറ്റു നേരം നിർത്താതെ നെഞ്ചിലമർത്തി ജീവൻ നിലനിർത്തിയ രക്ഷാപ്രവർത്തനം.

ആളുകൾ ഓടിക്കൂടി വാഹനത്തിൽ കയറ്റുമ്പോൾ അവസാന ശ്വാസമെടുത്തു ശരീരം നിലച്ചു. ‘ആളു പോയല്ലോ ഡോക്ടറേ’ എന്നു കൂടെയുള്ളവർ പറഞ്ഞിട്ടും സൗമ്യ കൈവിട്ടില്ല. അവിടെ നിന്ന് എലൈറ്റിൽ എത്തുന്നതുവരെ തുടർച്ചയായി നെഞ്ചമർത്തി. കൈ തളർന്നപ്പോൾ സൗമ്യ ഒപ്പമുണ്ടായിരുന്ന കെഎസ്ആർടിസി ഡ്രൈവറെ ഈ രക്ഷാരീതി പരിശീലിപ്പിച്ചു. ആശുപത്രിയിലെത്തിയ ഉടൻ വിദഗ്ധ ഡോക്ടർമാർ ആ മിടിപ്പു മുറിയാതെ ജോയിയെ ഏറ്റെടുത്തു. ഇല്ലായിരുന്നെങ്കിൽ ‘ആശുപത്രിയിലെത്തിച്ചെങ്കിലും മരിച്ചിരുന്നു’ എന്ന ഒറ്റവരിയിൽ ഈ വാർത്ത അവസാനിച്ചേനെ.

തലയോട്ടിയിൽ ഒട്ടേറെ പൊട്ടലുണ്ടായിരുന്നു. വാരിയെല്ലുകളും തകർന്നിരുന്നു. രണ്ടാഴ്ചയോളം ബോധരഹിതനായിക്കിടന്നു. അടിയന്തര ശസ്ത്രക്രിയകളിലൂടെയും തുടർച്ചയായ പരിചരണത്തിലൂടെയുമാണു ജോയിയുടെ ജീവൻ രക്ഷിച്ചത്. എങ്കിലും ഹൃദയസ്തംഭനം കണ്ടെത്തിയ ആ ആദ്യ നിമിഷത്തെ പ്രഥമ ശുശ്രൂഷയാണു മരണത്തിൽ നിന്നു രക്ഷിച്ചതെന്നു ചികിത്സയ്ക്കു നേതൃത്വം നൽകിയ എലൈറ്റ് ആശുപത്രിയിലെ ന്യൂറോ സർജൻ ഡോ.ആൽഫ്രഡ് മൈക്കിൾ പറയുന്നു.

എമർജൻസി മെഡിസിൻ ഫിസിഷ്യൻ ഡോ.ടി.രഘു, ക്രിട്ടിക്കൽ കെയർ ഫിസിഷ്യൻ ഡോ.സിജോ സി.ബാബു, ന്യൂറോ സർജൻ ഡോ.എം.കെ. നന്നുകുമാർ എന്നിവരടങ്ങിയ സംഘമാണു വിദഗ്ധ ചികിത്സ നൽകിയത്. രക്ഷാപ്രവർത്തനം നടത്തിയ ഡോ.സൗമ്യ അശ്വിനി ആശുപത്രിയിലെ കാർഡിയോളജി വകുപ്പിലെ ജൂനിയർ ഡോക്ടറും മാള വടമ തൃപ്പേക്കുളത്ത് സുകുമാരന്റെയും രമണിയുടെയും മകളുമാണ്. ഒല്ലൂർ പനംകുറ്റിച്ചിറയ്ക്കു സമീപം കാർ വർക്‌ഷോപ് നടത്തുകയാണ് ജോയ്.