ഇസ്രയേലിലേക്കുള്ള ഫ്ലൈദുബായ് വിമാനത്തിലെ കോക്പിറ്റ് ആക്രമണം അതിജീവിച്ച് നൂറുകണക്കിന് യാത്രക്കാരുടെ ജീവൻ രക്ഷിച്ച ഇന്ത്യൻ പൈലറ്റ് ക്യാപ്റ്റൻ സ്മിത് മച്ചാറിന് ഇസ്രയേലിന്റെ ആദരം. ഇസ്രയേൽ സ്വാതന്ത്ര്യദിനാഘോഷത്തിൽ പങ്കെടുക്കാനും അവിടെ പവിത്രമായ ജ്വാല തെളിയിക്കാനും ക്യാപ്റ്റൻ സ്മിത്തിനെയും ഇന്ത്യൻ പ്രധാനമന്ത്രി നരേന്ദ്ര മോദിയെയും നെതന്യാഹു ഔദ്യോഗികമായി ക്ഷണിച്ചു. സ്മിത്തിനെ ഇസ്രയേലിന്റെയും ഇന്ത്യയുടെയും മാത്രമല്ല, ലോകത്തിന്റെ തന്നെ ഹീറോയെന്നാണ് നെതന്യാഹു വിശേഷിപ്പിച്ചത്.

യുഎഇയിലെ ആശുപത്രിയിൽ ചികിത്സയിൽ കഴിയുന്ന 38കാരനായ സ്മിത്തുമായി ശനിയാഴ്ച നെതന്യാഹു ഫോണിൽ സംസാരിച്ചു. വികാരനിർഭരമായ സംഭാഷണത്തിനിടെ വിമാനത്തിന്റെ കോക്പിറ്റിൽ സഹപൈലറ്റ് നടത്തിയ ആക്രമണത്തെക്കുറിച്ച് സ്മിത്ത് വിശദീകരിച്ചു. ആക്രമണത്തിനു തൊട്ടുമുൻപുള്ള നിർണായക നിമിഷങ്ങളെക്കുറിച്ചും അദ്ദേഹം വെളിപ്പെടുത്തി.

“ഇസ്രയേൽ സ്വാതന്ത്ര്യദിനത്തിൽ നൽകുന്ന ഏറ്റവും വലിയ ബഹുമതിയാണിത്. സാധാരണയായി ഇത് ഇസ്രയേൽ പൗരന്മാർക്കാണ് നൽകുന്നത്. എന്നാൽ ഈ സാഹചര്യത്തിൽ ഇസ്രയേലിലെ മുഴുവൻ ജനങ്ങളും നിങ്ങളെ സ്വീകരിക്കുമെന്ന് ഞാൻ കരുതുന്നു. അവർ ഇപ്പോൾ തന്നെ നിങ്ങളെ ഹൃദയപൂർവം സ്വീകരിച്ചുകഴിഞ്ഞു. അന്നും അങ്ങനെ തന്നെയായിരിക്കും. വളരെ പെട്ടെന്നുതന്നെ നിങ്ങളെ ഇസ്രയേലിൽ കാണാനാകുമെന്ന് പ്രതീക്ഷിക്കുന്നു,” നെതന്യാഹു പറഞ്ഞു.

പിന്നാലെ പ്രധാനമന്ത്രിയുടെ ഓഫിസും സ്മിത്തിനുള്ള ക്ഷണം എക്സിലൂടെ സ്ഥിരീകരിച്ചു. “ഇസ്രയേലിനും ഇന്ത്യയ്ക്കും മുഴുവൻ ലോകത്തിനും നിങ്ങളൊരു ഹീറോയാണ്. ഇസ്രയേൽ സ്വാതന്ത്ര്യദിനത്തിൽ പ്രധാനമന്ത്രി നരേന്ദ്ര മോദിയെയും നിങ്ങളെയും ദീപം തെളിയിക്കാൻ ഞാൻ ക്ഷണിക്കുന്നു,” പ്രധാനമന്ത്രിയുടെ ഓഫിസ് കുറിച്ചു.

ആക്രമണം എങ്ങനെയാണ് ആരംഭിച്ചതെന്ന് നെതന്യാഹു ചോദിച്ചപ്പോഴാണ് സ്മിത്ത് കോക്പിറ്റിലെ സംഭവങ്ങൾ വിശദീകരിച്ചത്. ആക്രമണത്തിനു മുൻപ് സഹപൈലറ്റ് പ്രാർഥിക്കാൻ ആവശ്യപ്പെട്ടിരുന്നുവെന്നാണ് സ്മിത്തിന്റെ മൊഴി. സഹപൈലറ്റിന്റെ പ്രാർഥനയെ ബഹുമാനിച്ച് താൻ മുന്നിലേക്ക് നോക്കിയിരിക്കുകയായിരുന്നുവെന്നും അദ്ദേഹം പറഞ്ഞു.

“അയാൾ പ്രാർഥിക്കുമ്പോൾ ബഹുമാനാർത്ഥം ഞാൻ മുന്നിലേക്കാണ് നോക്കിയിരുന്നത്. പിന്നിലേക്ക് നോക്കിയിരുന്നില്ല. ഏകദേശം നാലോ അഞ്ചോ മിനിറ്റിനു ശേഷം പെട്ടെന്ന് എന്റെ തലയുടെ പിന്നിൽ വലിയൊരു അടി കിട്ടി. വിമാനത്തിന് എന്തോ വലിയ തകരാർ സംഭവിച്ചുവെന്നും ഗുരുതരമായ പ്രശ്നമാണെന്നും ആദ്യം കരുതി,” സ്മിത്ത് പറഞ്ഞു. എന്നാൽ തുടർച്ചയായി അടിയേറ്റതോടെയാണ് ആക്രമണം തിരിച്ചറിഞ്ഞത്. “ഒന്നിനു പിന്നാലെ ഒന്നായി അടികൾ തുടർന്നു. അപ്പോഴാണ് വിമാനത്തിനല്ല പ്രശ്നമെന്നും കോക്പിറ്റിലുണ്ടായിരുന്ന മറ്റേയാളാണ് എന്നെ ആക്രമിക്കുന്നതെന്നും മനസ്സിലായത്,” സ്മിത്ത് പറഞ്ഞു.